Abrahánpijinü Dioso jamatabükueneüjütatsi

Abrahán yawenona pej̈ünato Isaac piasiwanej̈a, penajamatabükuenekopatsinej̈anua penajumekapanepaeliwaisijawanü Jehovájawabelia. Pakujinae Isaac j̈aina 25 pawaibeje, Jehová jumaitsi Abrahánjawabelia piayapübejejawakuene peitsinej̈a. ¿Yapütaneme j̈ua Jehová itoroba peitsinej̈a?

Dioso jumaitsi Abrahánjawabelia: “Barüponare pepo kaenü nej̈ünato Isaac Moria irajawabelia, nej̈ata nerajutsianame ofrendakuenia”. Abrahán apoyapütae j̈ua yabara bajaraj̈ua Jehová itorobatsi, itsiata bajaraponü jumekowünüta.

Itsamatakabikujinae bajayakunua, Abrahán barüpona Isaac yajawa anijapetonakuenebijiwitsibeje Moria irajawabelia. Akueyabi pamatakabibejekujinae, nej̈ata tajüwelia tanebeje petsutojawanü Moriajawata. Abrahán jumaitsi petonakuenebijiwitsibejejawabelia pewetsinej̈atsibeje, tsipaji bajaraponü yajawa Isaac rajutsijitsiabeje ofrendakuenia. Abrahán kapona kusiupa, rajuta ata pej̈ünato isopanü isotonej̈a. Isaac yanijoba paj̈ajawabelia: “¿Dejota dajubinuka wajarajutsinej̈abeje ofrendakuenia?”. Abrahán jumepita pej̈ünato: “Taj̈ünatonüyo, Jehová nakarajutsianabeje”.

J̈ua baja patabeje pajumatsutojawabetsia, nej̈ata ej̈anabeje altarjawa. Bajarajota Abrahán kobeküta, taj̈uküta ata pej̈ünato Isaac, j̈uakujinae buata altarjawata.

Abrahán pita kusiupa. Nej̈ata bajarapaepatota, Jehová pijaángelnü jumaitsi atjübüwetsikakujinae: “¡Abrahán! ¡Pütsa itsakuene ej̈aname bajaraponü! Yapütaniji baja kajena j̈amü nejumekowünütsijawa Dioso, tsipaji aponewekuaasiwamü nej̈ünato”. Nej̈ata Abrahán taenuta carneronüyo pemataearübanukaenütsi pemaj̈üranawitsinaeyojawabelia. Bepijiayo kobeisina, taj̈uisina ata Isaac, nej̈ata baja rajuta ofrendakuenia bajarapacarneronüyo pej̈ünatowekua.

Bajarapamatakabijawaweliakujinae, Jehová jumaitsi tajaamigonü kajena jai Abrahán yabara. ¿Yapütaneme dej̈uajitsia? Tsipaji Abrahán itsi daj̈itaj̈ua Jehová itorobatsi, apojumeyapütae ata.

Jehová ikatsia najumekapanepa Abrahánjawabelia: “Pej̈aniakuene karajutsianatsi nemomoj̈i ayaibitsaüto penaej̈anaponaenej̈a, pakuenia tuluputuanü nawita”. Bajaraj̈ua yabara jumaitsi Abrahán pijamonae pejamatabükueneta, Jehová pej̈aniakuene rajutsiana daj̈itajiwi pejumekowünütsiwitsi.