Pewüjüatonü jamatabükuenebarüyaej̈ana Dioso

José Jacob pej̈ünato juyapijinü itsanü. José pematapijiwi yapütane paj̈a bitso piasiwajawatsi José. ¿Dejamatabükueneitsi meta bajarapamonae? Bajarapamonae kuenekaübiaya naükotatsi, itoyatsinua. Itsamatakabi, José anijajawakueniabeje amajitsinae, nej̈ata tsipaeba pematapijiwijawabelia. Bajarapamonae najamatabüj̈aina itsamatakabi yaiyataeyakuenia pematabakabüta tonubenaena pitabarata José. Bajaraj̈uata nej̈ata bitso itoyatsi.

Itsamatakabi, José pematapijiwi ovejamonae eweta Siquemtomara imoj̈oyojawata. Jacob nej̈ata itoroba José petaenej̈alia pakuenia itsi tsawanapae pematapijiwi. Bajarapamonae itsa tanetsi tajüwelia, nej̈ata najumaitsi: “Piamajitsinaenü rabaja najetaruka. ¡Beyaj̈uabianatsi!”. Nej̈ata waetabatsi j̈uabarekatsinua meramütjü petsewekaejawata. Itsiata Judá pematapijinüyajuwününü José, jumaitsi: “Pütsa pabeyaj̈uabame. Biji rajane kanajetsianatsi esclavonükuenia”. J̈uakujinae najetarubena penawijatsiwi Madián nakuapijiwi Egipto nakuajawabelia peponaewi, nej̈ata kanajetaj̈uabatsi José matamopitatsi 20 ponübeje palatanüanü.

J̈uakujinae, José pematapijiwi penaj̈atatsijawami kajapiba cabranüyo pejanata, bajaraj̈uakujinae bajarapenaj̈atatsijawa rajuta paj̈ajawabelia, yanijobatsinua: “¿Bajarapenaj̈atatsijawa meta José pijaeseto?”. Nej̈ata Jacob jamatabüjumaitsi: “Piayainü meta dajubi unupijinü j̈anetsi José”, bajaraj̈uata bitso jamatabükuenenatsonina. Itsajiwiyo ata apokuenekaüjüpaetsi pejamatabükuenebabatsijawa Jacob.

Pakujinae José pata Egipto nakuajawabelia, Potifar komuatatsi petonakuenebaponaponaenej̈atsi esclavonükuenia. Itsiata Jehová ewetabiaba José. Potifar tane pakuenia José j̈aniawaetsia nakuenebabiaba, bajaraj̈uata itaj̈utuajamatejema. Kaeepatoyokujinae, José baja toewetaponapona daj̈itaj̈uajawanü j̈aina Potifar.

Potifar pijawa taeyabiaba José peyaj̈aniawaetsinükuene, pej̈anianünua. Kaematakabi kanakujitsia bajarapowa jumaitsitsi: “Neisabokare”. ¿Deitsi tsabiabi José? Nawekuaitawetabiaba bajarapowa, jumaitsi tsabiabinua: “Jume, bajaraj̈ua abeje. J̈amü raja tajatuj̈anenü pijawamü, bajaraponü najamatabüruta j̈anüjawawerena. Itsa kabarümajitatsi, nanekonitsipajü Dioso pitabarata”.

Itsamatakabi Potifar pijawa jamatabüitoroba José pebarümajitsinej̈atsi. Pepanawaetabaruta itsiata bajaraponü najetabijirawa. Pakujinae Potifar patanajetaruka pijabojawawerena, bajarapowa najumetsünütsiaya jumaitsi: “José raja netaika”. Nej̈ata Potifar anaepana bitso, j̈uakujinae penanekonitsibojawabelia etatsi. Itsiata Jehová kaeto ata aponakofünütsi José.