Jehová aponakofünütsi José

Pakujinae José penanekonitsibojawata eka, faraón pematakaitorobinü Egipto nakuajawata, amajitsinae itsiata itsajiwiyo ata apoyapütae j̈ua yabara faraón piamajitsinaejawanü. Nej̈ata faraón petonakuenebinütsi jumaitsitsi: “José katsipaebijitsipa j̈ua yabarajumaitsi niamajitsinaejawa”. Nej̈ata faraón junatsiayaej̈anatsi José bepijiayokuenia.

Faraón nej̈ata yanijoba Joséjawabelia: “¿Dej̈ua yabarajumaitsijitsia taamajitsinaejawa?”. José jumekanawiata: “Egipto nakuajawata raja ayaikuenia pej̈aejawa j̈ainaena siete pawaibeje, j̈uakujinae raja janiboj̈aneto tsane siete pawaibeje. Itapere peyapütaejiwiyo pej̈aejawa pejebinej̈a jiwi petüpaeyaniwa janibojawata”. Faraón jumaitsi: “¡J̈amü kaitapetatsi! J̈anükujinae, j̈amü nejamatabükuenematatoj̈enetsinü Egipto nakuapijiwiwekua”. ¿Dej̈uajitsia itsiata José yapütane j̈ua yabara faraón amajitsinae? Tsipaji Jehová yawenonabiabatsi.

José j̈aniawaetanajetaruka pej̈aejawa siete pawaibeje. Bajaraj̈uakujinae, daj̈itanakuanüjawa janiboj̈aneto, pakuenia baja bajaraponü jumaitsi, jiwi patabiaba daj̈itanakuanüjawaberena pekomuakaenej̈a pej̈aejawa. José paj̈a yapütane Egipto nakuajawata pej̈aejawa pej̈ainaejawa, nej̈ata itoroba 10 pej̈i pematapijiwibeje pekomuakaenej̈a pej̈aejawa.

Jacob pej̈i ponalia José petaenej̈a, nej̈ata José kaekuenia yapütane pematapijiwikuene. Biji rajane pematapijiwi apoyapütaetsi Josékuene. Pematabakabüta nubenajunua José pitabarata, pakuenia baja kajena bajaraponü amajitsinae itsa pewüjüato. José jitsipa peyapütaejawa itsa abaj̈ü tsitekaeya pitoyajawatsi, bajaraj̈uata jumaitsi: “Paj̈amü raja paneyaenebame, paneyapütaenej̈a pakuenia pajinawanapajü panakuataje”. Bajarapamonae jumekanawiata: “¡Paj̈anü raja apopatayaenebiwi! Panajetarubenajü Canaánjawaberena. Pikani 12 papej̈ijiwinübeje, patajuyapijinü yajawaponapona pataj̈a, itsiata itsanü tüpa”. Nej̈ata José jumaitsitsi: “Panejuyapijinü pakaponaremena bajarapakuenia pakajumej̈aniataenatsi”. Bajarapamonae baja nej̈ata nawiaba paj̈a pijabojawabelia.

Jacob pijamonae ikatsia pej̈aejawa apoj̈ainae, bajaraj̈uata bajaraponü ikatsia pej̈i itoroba Egipto nakuajawabelia. Bajarapakujinae jane baja barüpona pejuyapijinü Benjamín. José pekueneüjübinej̈a pematapijiwi, matayata pijacopa platajawa Benjamín pijadorota, bajaraj̈uakujinae kowü wünüjonatsi penakobetoj̈otsijawa pijacopa. Pakujinae José petonakuenebiwitsi kaj̈itajaraba bajarapacopa Benjamín pijadorota, pematapijiwi bajaraj̈ua apojumej̈aniatae. Bajarapamonae yapijiwikuaikuaijai ayaikuenia Joséjawabelia pebejiobiaej̈anaeyaniwa Benjamín, biji rajane bajarapamonae pebejiobiaej̈anaenej̈atsi.

José baja kajena jamatabükueneyapütane pematapijiwi penajamatabükuenej̈anetsijawa. Aponajamatabükuenekataitsi baja aüaüjai bitso, nej̈ata jumaitsi: “J̈anü raja Josénü panejuyapijinünü. ¿Abajü taj̈a ponapona?”. Pematapijiwi bitso jamatabükuenenabenajaka. José jumaitsi: “Pütsa panajamatabüj̈ainame j̈ua paneitsimü. Dioso nekarena patakakapanepaenej̈a. Itsiata ¡naj̈atsiayo!, taj̈a pakaponaremena”.

Nej̈ata pematapijiwi José pona pijaboyabelia paj̈a petsipaebinej̈a pej̈aniajailiwaisi, j̈uakujinae pebarüponaenej̈a paj̈a Egipto nakuajawabelia. Ayaiwaimonaekujinae José, paj̈abeje natanebeje, jane baja najuaponaponabeje ikatsia.