Petajueyekaenaemüyo

Moiséspijinü baponapona 40 pawaibeje Madián nakuajawata. Bajarapamatakabianü, nacasaba yajawa pej̈i j̈aina. Itsamatakabi ewetaponapona pijaovejaj̈i imoj̈oyo Sinaíwünü ibotsutoj̈anetojawata, tane ayaikuenejawa. Naemüyo tajueyeka, ¡itsiata apoweriajawi! Pakujinae Moisés naimoj̈oyota petaenej̈a bajarapanaemüyo, jumetane naemüyojawawerena pebarükuaikuaijaijawatsi. Nej̈ata jumaitsitsi: “¡Moisés! Pütsa naimoj̈oyotame. Nataj̈ujonore nenataj̈uj̈atatsijawa tsipaji nukame pitabarata Dioso”. Jehová raja itoroba pijaángelnü pebarükuaikuaijainej̈a Moisés.

Moisés bitso junawa, bajaraj̈uata naitabarakaranata. Nej̈ata Dioso pijaángelnü barükuaikuaijaitsi: “Tanejü israelitawi pebejiobiaej̈anaponaejawatsi bitso. Bajaraj̈uata kapanepaejitsianü Egipto nakuapijiwiwekua, kaponaejitsianü pej̈aniairajawabelia. Jitsipajü j̈amü nejutsijawa tajajiwi Egipto nakuawekua”. ¿Dejumaitsimü tsipae? ¿Dejamatabükueneitsi meta Moisés j̈ua Jehová itorobatsi peitsinej̈a?

Moisés nej̈ata jumaitsi: “Itsa itsajiwiyo neyanijobijitsipa, ¿depatsa kaitoroba?, ¿dej̈umaitsinü tsipae?”. Dioso jumepitatsi: “Jumaitsimüre Jehová raja nitoroba, pijaDiosonü Abrahán, Isaac yajawa Jacob”. Moisés jumaitsi: “¿Itsa nijajiwi aponejumekowünütsi?, ¿deitsinü tsane?”. Nej̈ata Jehová tsitajüta pakuenia yawenonaejitsia Moisés. J̈uakujinae jumaitsitsi: “Nijanaebo j̈uabare irabelia”, itsa bajaraj̈ua baitsi nej̈ata ¡pijanaebo naej̈anajunua jomo! J̈uakujinae, Moisés pebosotowaetaba jomo ikatsia nej̈ata naej̈anajunua pijanaebo. Jehová jumaitsi: “Pakujinae itsimü tsane bajarapapinijikuene taasaüta, tsitajütsianame j̈anü takaitorobijawa”.

Moisés jumaitsi: “Aponetoyapüj̈anepanae j̈aniawaetsia tabarükuaikuaijainej̈a jiwi pitabarata”. Nej̈ata Jehová najumekapanepaeya jumaitsi: “J̈anü kakujarubianatsi j̈ua jumaitsijitsiamü, itorobianajünua nematapijinü Aarón pekayawenonaenej̈a”. Moisés peyapütaej̈ae Jehová pewetsinej̈atsi, nej̈ata nawiata Egipto nakuayabelia kapona pijawa yajawa pej̈i.