Akueyabi piayaikuenejawanü

Egipto nakuapijiwi itorobabiaba israelitawijawabelia ayaikuenia penakuenebinej̈a esclavowikuenia. Jehová itoroba Moisés, Aarónbeje liwaisi petsipaebinej̈a faraónjawabelia: “Kopare tajajiwi peponaenej̈a petsewiirajawabelia tanenawajükaenej̈a”, jai Jehová. Faraón ayaijamatabükuenenü natane, bajaraj̈uata jumaitsi: “Aponetsitaj̈anepanae pakuenia jumaitsi Jehová. Apokopatsinü tsane itsiata israelitawi peponaejawa”. Bajaraj̈uakujinae, faraón itoroba israelitawijawabelia bebeliayo petonakuenebinej̈a Egipto nakuapijiwi. Itsiata Jehová jitsipa peyapütaenej̈atsi ponükuene. ¿Deitsi nej̈ata? Tsiitoroba 10 piayaikuenejawanü Egipto nakuajawabelia. Jehová jumaitsi Moisésjawabelia: “Faraón aponejumekowünütsi. Merawia bajayakunua bajaraponü ponaena Nilo menejawabelia. Ponare netsipaebinej̈a bajarapamene naej̈anaena pejana, tsipaji bajaraponü aponetokopatsi tajajiwi peponaenej̈a”. Moisés jumekowünüta Jehová, bajaraj̈uata taeponalia faraón. Nej̈ata faraón tane Aarón itamene pekonitaj̈uabijawa pijanaebota Nilo mene, bajarapamene naej̈ana pejana. Daj̈ita dujuai tüpa bajarapameneta pejinawanapaewi, bitso tuj̈utsaeba, jiwi janijunawa bajarapamera piapaenej̈a ata. Itsiata abajü tsitekaeya faraón apokopatsi Jehová pijajiwi peponaejawa petsewiirajawabelia.

Siete pamatakabibejekujinae, Jehová itoroba ikatsia Moisésjawabelia pejumaitsinej̈a faraónjawabelia: “Itsa j̈amü aponetokopatsimü tsane peponaenej̈a tajajiwi, nej̈ata Egipto nakua kuaitomonae yawünükaeyaej̈anaenajü”. Bajarapakuenia faraón apopejumekowünütsij̈ae, Aarón namaj̈üyota pijanaebo, nej̈ata bajarapanakua yawünüka kuaitomonae. Daj̈itabojawanüta, camajawanüta, pijaplatojawanüta pej̈aejawa ata kuaitomonae yawünüka … ¡Daj̈itajawa kajena yawünüka! Faraón nej̈ata jumaitsi Moisésjawabelia: “Wajüre Jehovájawabelia piajibiaej̈anaenej̈a kuaitomonae, bajaraj̈uakujinae tapitsapaeyaej̈anaenej̈a israelitawi”. Nej̈ata Jehová ajibiaej̈ana bajarapaayaikuenejawa, j̈uakujinae Egipto nakuapijiwi kaetuata kuaitomonae penajumajebaponaenej̈a kaejawata. Ira kajena tuj̈utsaeba, itsiata ikatsia baja kajena faraón apokopatsi Jehová pijajiwi peponaenej̈a.

Bajaraj̈uakujinae Jehová jumaitsi Moisésjawabelia: “Aarón irajuma konitaj̈uabiana pijanaebota. Itsa irajuma konitaj̈uaba, bajarapaatsa irajumapürümi penaej̈anaenej̈a wakapemonae”. Bajarapakuenia, daj̈itajawa yawünüka wakapemonae, nej̈ata sünenajetarubena jiwi. Itsamonae Egipto nakuapijiwi jumaitsi faraónjawabelia: “¡Bajarapapiayaikuenejawa najetaruka Diosojawaberena!”. Itsiata baitsi jane, faraón ikatsia apokopatsi israelitawi peponaenej̈a.