Itsaseis piayaikuenejawanü

Moisés, Aarónbeje taeponalia faraón petsipaebinej̈a Dioso pejumeliwaisi: “Itsa tajajiwi apokopatsimü tsane peponaenej̈a, itorobianajü maparamonae Egipto nakuajawabelia”, jai Jehová. Maparato raja pakuenia dainatoj̈anetonü süne jiwijawabelia. Mapara ayaibitsaütoj̈aneto junua Egipto nakuapijiwi pijabonüjawa: palata pej̈ainaewi, bepejiobiwi ata. Daj̈itanakua maparamonae yawünüka. Itsiata jota israelitawi jinawanapa Gosén nakuajawata, ajibi maparamonae. Akueyabi papiayaikuenejawanükujinae üEgipto nakuapijiwi bejiobiaej̈anatsi, itsiata baitsi jane apobejiobiaej̈anaetsi israelitawi. Faraón ayaikuenia wajüta Moisésjawabelia: “Wajüre Jehovájawabelia piajibiaej̈anaenej̈a maparamonae, itsa ajibi tsane, kopatsianajü nijajiwi peponaenej̈a”. Itsiata, pakujinae Jehová ajibiaej̈ana maparamonae, faraón itsaliwaisi j̈aina. ¿Itsamatakabi meta faraón jumekowünütsipa j̈ua Jehová itoroba?

Bajaraj̈uakujinae Jehová jumaitsi: “Itsa faraón apopitsapaeyaej̈anae tsanetsi tajajiwi, nej̈ata daj̈ita Egipto nakuapijiwi pijadajubi awitane tsane, tüpaena atanua”. Merawia pitsajawata baja nej̈ata itsi pakuenia Jehová jumaitsi, biji rajane baja israelitawi pijadajubi apoitsakuene. Itsiata faraón baja kajena Dioso apojumekowünütsi, saya itsi pejitsipaekuenia tsipaji ayaijamatabükuenenü natane.

Nej̈ata, Jehová itoroba Moisés ikatsia peponaenej̈a faraónjawabelia, itorobatsinua pekayajabiaj̈uabinej̈a atjübüabelia ipumana. Nej̈ata bajarapaipumanajawami naej̈anajonena pebeno, bajarapakuenia bajarapebeno tsijopatsi daj̈ita Egipto nakuapijiwijawabelia. Bajarapebeno perabütsabanaej̈anatsi daj̈ita Egipto nakuapijiwijawabelia, pijadajubimonaejawabelia ata, bajaraj̈ua bitso toatane tsabiabitsi. Itsiata ikatsia Faraón jumaitsi israelitawijawabelia: “apopakatokopatsitsi paneponaenej̈a”.

Jehová ikatsia itoroba Moisés peponaenej̈a faraónjawabelia petsipaebinej̈a paliwaisije: “¿Abaj̈ü tsitekaeya apojamatabükopatsimü tajajiwi? Merawia nej̈ata otjopaeyaej̈anaenajü piarewekainejebitoj̈anetonü”. Merawia pitsijawata, Jehová itoroba piarewekainejebitoj̈anetonü, yamaj̈üjawanü, isotokotia ata. Egipto nakuajawata kaeto ata bajarapitsikuene abaj̈ü apotae. Bijiana daj̈itajawanü, wayafonua Egipto nakuajawata. Nej̈ata faraón jumaitsi: “Wajure Jehovájawabelia patanetoajibinej̈a bajarapiayaikuenejawanü, bajarapakuenia paponaename”. Itsiata baja pakujinae piarewekainejebitoj̈anetonü baja apootjopaitsika, apoemanua, faraón nej̈ata itsa liwaisi j̈aina.

Nej̈ata Moisés jumaitsi: “Aekonoj̈aeta bosesemonaenü j̈aena daj̈itawirianaejawanü, baj̈uwereniana ata”. Bosesemonaenü najüpabeje ayaitübütoj̈anetonü. Ayaibitsaütobosesej̈aneto daj̈ita j̈ane panaejawanü nubena wayafojawata. Nej̈ata faraón jumaitsi Moisésjawabelia: “Wajüre Jehovájawabelia tanewekuaajibiaej̈anaenej̈a bosese majotaje”. Jehová piajibiaej̈anaekujinae bosese, itsiata faraón apokopatsi peponaenej̈a israelitawi.

J̈uakujinae, Jehová jumaitsi Moisésjawabelia: “Nijanaebo kobena namaj̈üyore atjübüabelia”. Bajaraj̈uakujinae pinijikuenia aitakiri. Egipto nakuapijiwi apokaüjüpaetsi petaejawa akueyabi pamatakabibeje. Biji rajane jota israelitawi jinawanapa apotoaitakiritsi.

Faraón jumaitsi Moisésjawabelia: “J̈amü, nijajiwi yajawa paponare, itsiata baitsi jane panijadajubi pakopabanubare jotaje”. Nej̈ata Moisés jumekanawiata: “Bepakaponajü patadajubij̈i patarajutsinej̈a ofrendakuenia patajaDioso”. Itsiata faraón bitso anaepana, nej̈ata matajunata Moisés: “¡Baja newekuapitsaparemelia! Itsa patsianame ikatsia maberenaje, kabeyaj̈uabiaej̈anaenatsi”.