Moisés itapeta petoponaponaenej̈a üJehová

Itsa abajü Jacob pijamonae jinawanapa Egiptojawata, bajarapamonae wünürubatsi israelitawikuenia. Jacob, Josébeje petüpaekujinae, itsafaraón taj̈uj̈uaba pematakaitorobijawa. Bajarapafaraón junawa, tsipaji israelitawi bitso jamatabükuenematatoj̈enetatsi Egipto nakuapijiwi. Nej̈ata taikatsi esclavowikuenia petonakuenebinej̈atsi. Bajarapamonae nakuenebabiaba ladrillojawanü, ayaikuenia petusatojawata ata. Itsiata ayaikuenia nakuenebiaej̈anabiabi atatsi Egipto nakuapijiwinej̈a, israelitawi ayaibitsaütoj̈aneto naej̈anapona. Bajaraj̈ua faraón apotsitaj̈anepanaetsi, bajaraj̈uata itoroba pebeyaj̈uabaponaenej̈a pejananaej̈anaenüj̈i. ¿Dejamatabükueneitsi meta tsabiabi israelitawi? Bajarapamonae bitso junawabiaba.

Israelitawa pewünü Jokébed j̈aina pej̈aniapenakuetonüyo. Pitsakueneyaniwa, beyoj̈obokueniajawatayaruta Nilo meneitapata betjamanakuenejawanütuatuajüta matayataruta. Míriam, penakuetonüyo pematapijiwa, bajarapowa imoj̈oyo nukajopa petaenej̈a pakuenia ruka.

Faraón pej̈ünatowayo pona penawaenej̈a, bajarapaepatota taeruta penakuetonüyo beyoj̈obokueniajawata nueruka, nej̈ata itaj̈utobejiobiatane. Míriam naimoj̈oyota pejumaitsinej̈a: “Jitsipame takatojunatsinej̈a itsapetiriwa penamirajutsinej̈a bajarapapenakuetonüyo”. Bajarapowa jumejejai, nej̈ata Míriam pena barürena. Faraón pej̈ünatowayo jumaitsi Jokébedjawabelia: “Kaponare, ewerenua bajarapapenakuetonüyo, j̈anü kamatamotsianatsi”.

Pakujinae penakuetonüyo witsaba, Jokébed tokapona faraón pej̈ünatowayojawabelia. Bajarapowa wünürüba penakuetonüyo Moisés, witsatanuta pej̈ünatonüyokuenia. Moisés nej̈ata witsaba faraón pepo pej̈ünatokuenia, Egipto nakuapijinükuenia ata, bajaraj̈uata daj̈itaj̈ua jitsipa, kuenekaüjüpatsi pej̈ainaejawa. Itsiata kaeto ata aponakofünütsi Jehová. Moisés nayapütane pepo israelitanükuene, bajaraj̈uata itapeta üJehová petoponaponaenej̈a.

Pakujinae Moisés 40 pawaibeje j̈aina, jitsipa peyawenonaejawa pijajiwi israelitawi. Itsamatakabi, tane Egipto nakuapijinü pebenukaejawa israelitanü. Nej̈ata bajaraj̈ua itsa tane, Moisés daj̈ita pesaüta beyaj̈uaba Egipto nakuapijinü, bajaraj̈uakujinae matayataj̈uababuata tajetamaj̈übüj̈üpanajawata. Pakujinae faraón yapütane bajaraj̈ua, jamatabübeyaj̈uaba Moisés, itsiata bajaraponü wekuanajetabijirawa Madián nakuajawabelia. Nej̈ata Jehová eweta Moisés.