Pekotokaewi piayaikuenejawa

Moisés najumekapanepaeya jumaitsi faraónjawabelia: “Aponawiatsinü baja tsane matawüjüa j̈amüjawaberena”. Itsiata peponaewajünaeya, jumaitsinua: “Merawituatuajüta, daj̈ita pej̈i matapijiwi Egipto nakuapijiwi tüpaena, pakuenia faraón pej̈ünato matapijinü yajawa esclavowi pej̈i matapijiwi totüpaenatsinua”.

Jehová jumaitsi israelitawijawabelia: “Pasere pej̈aniapej̈aejawa. Pabeyaj̈uabare corderonüyo itsa jume, cabranüyo kaewai pej̈ainaenüyo, baupamatatsünüjawata pakuenia baupamuj̈unenenaejawata tsautarubiana pejanajawanü. Pewi pasebare, paj̈aema yajawa panbü matajürüabinejewa levadurata. Panajamatabükuenewerere baja paneponaewajünaeya panijaesetonü panaj̈atabare yajawa panijasandaliajawanü panataj̈uj̈atabare. Pamerawije pakakapanepaenatsi”. ¿Dejamatabükueneitsi meta israelitawi j̈ua jumaitsitsi Jehová?

Merawituatuajüta, Jehová pijaángelnü najetaruka daj̈itabojawa Egipto nakuajawata. Itsajota ajibi pejana baupajawata, bajarajota pej̈ünato matapijinü tüpapona. Itsiata pabojawanüta tsautaruba pejanajawanü, Jehová pijaángelnü itsakuene apoitsi. Daj̈ita nakaemonae Egipto nakuajawata, palata pej̈ainaewi, bepejiobiwi ata totüpaponatsi matapijiwi. Itsiata baitsi jane, israelitawi apokoj̈itüpae.

Bajarapijinia Faraón pej̈ünato matapijinü totüpatsi. Bajaraj̈uakujinae faraón jumaitsi Moisés, Aarónbejejawabelia: “¡Paponare baja patomarawekua! ¡Papitsapare yaiyataeyakuenia panetonakuenebawanapaenej̈a panijaDioso! ¡Pakaponarenua panijadajubi!”.

Bajarapamerawi juameto yenejai tsanukae. Nej̈ata kaemonae kanakujitsia israelitawi j̈aniawaetsiakuenia pona Egipto nakuawekua. Pitsapalia 600.000 papebibeje, petiriawibitsaüto, pejewaj̈i ata. Bajarapabitsaütojawata itsamonae apoisraelitawi ata pona Jehová peyaiyataenej̈a. ¡Jehová pepakuene kapanepa baja israelitawi!

Israelitawi penajamatabünapitsinej̈a Jehová pekapanepaejawatsi, kaewai kanakujitsia pej̈aniapej̈aejawa itsi tsabiabi. Bajaraj̈üa wünüruta Pascua fiestajawa.