Israelitawi nikaba Rojowünü manuamenejawata

Pakujinae faraón wünüliwaisitane israelitawi pepitsapaejawa Egiptowekua, bajaraj̈ua baja apotsitaj̈anepanaetsi. Nej̈ata faraón itoroba pijawajabitsaüwi pakueniaje: “Pakanawerere carrozamonü wajapübaraponaenej̈a. Apobekopatsitsi peponaenej̈a”, jai faraón. Nej̈ata bajaraponü, pijawajabitsaüwi yajawa taj̈uj̈uaba pepübarajinaenej̈a israelitawijawabelia ikatsia petaikaenej̈a.

Israelitawi itsa najetarubena matakabita Jehová piapiapajubo benaesiturutokuenia pematakaponaenej̈atsi, merawi pijinia bajarapapajubojawami benaesituruto petajuenajetarukaejawakuenia matakaponabiabatsi. Jehová matakapona imoj̈oyojawata manuamene Rojowünüjawabelia pijataj̈unaebonü kaeepatoyo pejinawanapaenej̈a.

Bajaraj̈uakujinae israelitawi tane faraón yajawa pijawajabitsaüwi pepübarajinaejawatsi. Nej̈ata manuamene apopenikabij̈ae, bajarapamonae jamatabüjumaitsi: “Egipto nakuapijawajabitsaüwi raja nakataikaejitsia”. J̈uakujinae bajarapamonae taj̈uj̈uaba pewawajaijawa, jumaitsi Moisésjawabelia: “¡Tüpaenatsi raja baja! ¿Dej̈uajitsia patajanejutsimü Egiptowekua?”. Itsiata Moisés jumekanawiata: “Pütsa pajunawame. Aekonoj̈ae raja pataename Jehová wajanakakapanepaejawa bajarapamonaewekua”. Moisés kajena najamatabürutabiaba Jehovájawabelia.

J̈uakujinae, Jehová itoroba israelitawi pewekuaponaenej̈a bajarapapijataj̈unaebonü. Bajarapamerawi nej̈ata Jehová bajarapapajubo rukajopaeyaej̈ana tuatuajüta Egipto nakuapijiwiwekua, israelitawiwekua ata. Egipto nakuapijiwi toaitakiritsi bitso, itsiata baitsi jane üisraelitawi penubenaejawata toitayotatsi j̈aniawaetsia petaenej̈a pewajünaeyabelia.

J̈uakujinae, Jehová itoroba Moisésjawabelia penamaj̈üyotsinej̈a manuamenematatsünüalia. Nej̈ata Jehová kopata pinijijowiboj̈aneto daj̈ita merawijebi. Bajaraponü pejamatabükueneta manuamene napalia, bajarapakuenia israelitawi nikaba Rojowünü petsewijawalia manuamenetuatuajülia.

Faraón pijawajabitsaüwi pübarapona pekowüwelia israelitawi bajarapatsewijawalia. Itsiata Jehová najamatabüitaj̈anaeyaej̈ana pepükaj̈inaeyaniwa israelitawi. Nej̈ata pijacarrozamonü totaj̈utoyorojuepajunujunuatsi, bajaraj̈uata Egipto nakuapijawajabitsaüwi najumaitsi: “¡Naj̈atsia! Kaewüabelia rüküpekatsi baja israelitawiwekua tsipaji Jehová yapijiwinawajabitsaüta pewetsinej̈a pijajiwi”.

Bajarapaepatota nej̈ata Jehová jumaitsi Moisésjawabelia: “Nijanaebo kobenanamaj̈üyore ikatsia kaewüalia manuamene itaboj̈ojawabelia”. Nej̈ata jemata mera ikatsia nakaj̈inajunua pekowükuenia. Bajarapakuenia Jehová bubunaeyaej̈ana Egipto nakuapijiwimi. Faraón, pijajiwi yajawa apoasaü kaenü ata.

Manuamene itsapanabelia, daj̈itajiwi tonaj̈üana Jehová pakueniaje: “Tonaj̈üanaenajü Jehová tsipaji Pekuenekaüjüpaenütsi daj̈itakuene, übajaraponü bubunaeyaej̈ana Egipto nakuapijawajabitsaüwimi, pijacaballomonae yajawa”. Dioso abaj̈ü pijajiwi itsa naj̈üana, daj̈ita petiriawi nota pijapanderetanü, kanaj̈üanaeya, yawajibiaya ata Jehovánej̈a. Daj̈ita israelitawi bitso jamatabükuenebarüya Jehová pekapanepaej̈aetsi.