Rahab matayata peyaenebinübeje

Israelitanübeje peyaenebinübeje ponabeje Jericó tomarajawabelia, nakopatabejenua Rahabwünüwa pijabojawata. Pakujinae pematakaponaenü Jericótomara yapütane bajarapaliwaisi yabara, itoroba pijawajabitsaüwi Rahab pijaboyabelia. Bajarapowa matayata peyaenebinübeje bojumajawabetsia, jumaitsi wajabitsaüwijawabelia pejaitsinej̈a bajarapapeyaenebinübeje itsajawabelia. Nej̈ata Rahab jumaitsi peyaenebinübejejawabelia: “Pakayawenonaenatsibeje tsipaji yapütanejü Jehová pakayajawa tsabiabi, pakarajutsiananua mapairaje. Itsiata baitsi jane, panenajumeliwaisirajurebeje panetokapanepaename tajamonae”.

Peyaenebinübeje jumaitsi Rahabjawabelia: “Itsa kütarutame petsobiamaka ventanawojotojawata, nej̈ata pakanajumeliwaisirajutatsibeje pibisiakuene apotokopiapatsi tsanetsi pamonae nijaboünüjawata jinawanapa. Bajarapakuenia nijamonae panepaena”.

Rahab yawenona peyaenebinübeje pewekuapitsapaenej̈a Jericótomara, runaeyaej̈anarekabeje pijaventanajawawetsika pemakata. Peyaenebinübeje nej̈ata namatayababeje akueyabi pamatakabibeje ibotsutojumajawanüta penawiatsiwajünaeyabeliabeje Josuéjawabelia. J̈uakujinae, israelitawi nikaba Jordánmene, najamatabükueneweretanua pekueneamoneyabinej̈a bajarapatomara. Kopiaya kajena kueneamoneyaba pepitsinej̈a Jericótomara. Jehová itoroba israelitawi kaeto kaematakabi kanakujitsia pematatoyorotsinej̈a bajarapatomara. Bajaraj̈ua itsi seis pamatakabibeje. Itsiata siete matakabita, bematatoyorota siete j̈uabeje bajarapatomara. J̈uakujinae, sacerdotewi oba pijatrompetajawanü, wajabitsaüwi israelitawi wawajai ayaijumeta. Nej̈ata matatoyorotsia peyakaranatsijawaj̈aneto bajarapatomara jopaika. Rahab pijaboekae ata bajarapapeyakaranatsijawaj̈anetota, pijabo apojopaetsika. Rahab, pijamonae ata panepa tsipaji najamatabüruta Jehovájawabelia.