Josué, gabaonitawi yajawa

Itsatomaranüpijiwi Canaán nakuajawata wünüliwaisitane j̈ua Jehová itsi Jericó tomarajawabelia. Pematakaponaewi patomarajawanü kaejamatabükuene j̈aina pebarünabenej̈a israelitawijawabelia. Itsiata Gabaón tomarapijiwi itsaliwaisi j̈aina. Naj̈ataba perujuesetojawanü, nej̈ata taeponalia Josué pejumaitsinej̈a: “Tajü nakuajawawerena panajetarubenajü patakataenej̈a. Pajumetanejü Jehová yabara j̈ua ata itsi bajaraponü paj̈amünej̈a Egipto nakuajawata yajawa Moab nakuajawata. Itsa panenajumerajutame patanekueneamoneyabiyaniwamü, nej̈ata panijajiwinü tsane”.

Josué jumej̈aniatane bajarapamonae nej̈ata tonajumerajuta apopebarünabenej̈a. Itsiata, akueyabi pamatakabibejekujinae, Josué yapütane j̈aniajailiwaisi gabaonitawi yabara tajüjawawerena apopenajetarubenaejawa biji rajane, Canaán nakuapijiwi. Bajaraj̈uata, Josué yanijoba: “¿Dej̈uajitsia paneyamaj̈üitojorobame?”. Bajarapamonae jumepita: “Tsipaji pajunawajü bitso. Payapütanejü pakuenia Jehová panijaDiosonü pakasiwanabeyabiaba paj̈amü yabara. Tajamonae, pütsa panebeyaj̈uabame”. Josué najumekapanepa j̈ua najumerajuta itsakuene nej̈ata apoitsi bajarapamonaejawabelia.

Bej̈üakujinae, cinco papematakaponaenübeje Canaán nakuapijiwi barünajetaruka pijawajabitsaüwi pebarünabenej̈a gabaonitawijawabelia. Josué yajawa pijawajabitsaüwi daj̈itamerawi najetarubena pekapanepaenej̈a gabaonitawi. Merawia pitsijawata bajayakunua taj̈uj̈uaba penabejawa. Canaán nakuapijiwi rüküpeka daj̈itajawa, itsiata Jehová tsiitorobika piarewekainejebiibotonü atjübüwetsika. Nej̈ata Josué wajüta Jehovájawabelia matakabipijijuameto kaekowüta perukaenej̈a. Matakabipijijuameto kaekowüta kaeto ata aporukaemi. ¿Dej̈uajitsia bajaraj̈ua wajüta Josué? Tsipaji bajaraponü najamatabürutabiaba Jehovájawabelia. Bajaraj̈uata matakabipijijuameto aponamatayatsi. Bajarapamatakabi apokirijai tsanukae bajarapakuenia nej̈ata israelitawi kueneamoneyaba pematakaponaewi Canaán nakuapijiwi yajawa pijawajabitsaüwi.