Dioso ej̈ana kopiaya pebi, petiriwa yajawa

Jehová nakuenebabuata ayaipabij̈aneto Edén nakuajawata. Bajarapapabi j̈aina pematonojawanü, naejawanü, dajubimonae ata. J̈uakujinae, Dioso ej̈ana kopiaya pebi, pewünü Adán. Dioso atsatonü j̈aniawaetsia nakuenebabuata, bajaraj̈uakujinae pepumu uj̈une penajumalipitsinej̈a. ¿Deitsi nej̈ata j̈uakujinae? ¡Jiwitonü asaü tsaponaponae! Jehová itoroba Adánjawabelia pewetaponaponaenej̈a bajarapapabij̈aneto, pewünürubinej̈anua kaewiriadajubi kanakujitsia.

Nej̈ata Jehová Dioso yajawa najumeliwaisikopatanuta Adánjawabelia: “Daj̈itawirianaekuai peyajawanubenaejawanü bajarapapabijawata bej̈aneme. ¡Itsiata baitsi jane, pütsa j̈aneme ponaekuaito! Tsipaji itsa bajaraponaekuaij̈aejitsipame, nej̈ata pepakuene tüpaejitsipame”.

Nej̈ata j̈uakujinae, Jehová jumaitsi pakueniaje: “Apoj̈anepanae kaenü pebi peponaponaejawa. Nej̈ata toej̈anaenajü petiriwa peyanabiwanej̈atsi”. Bajaraj̈uata Dioso tokopata Adán ayaikuenia pemajitsinej̈a, nej̈ata yajuwünüyenesijutatsi pej̈anaenej̈a petiriwa. Bajarapowa pewünü Eva. Bajarapakuenia nej̈ata, naej̈ana kopiayanakaemonae Adánpijinü, Evapijiwabeje penabarüponaponaejawata. ¿Dejamatabüitsi Adán petaej̈ae pijawa? Bajaraponü bitso jamatabükuenebarüya, bajaraj̈uata jumaitsi pakueniaje: “¡Pepakuene Jehová ej̈ana mapowa tayajuwünüyenesitowa! ¡Pepakuene jane baja jiwitowa pakuenia j̈anü!”.

Jehová itoroba Adán, Evabejejawabelia pej̈i pej̈ainaenej̈abeje, peyakaüjüpaenej̈a daj̈itanakuanüjawa. Dioso jitsipa barüyaya penakuenebaponaponaenej̈abeje daj̈ita pej̈aniakuene peyawünükaeyaej̈anaenej̈a mapanakuaje. Nej̈ata daj̈ita pej̈aniaira pakuenia Edén nakuajawata. Itsiata daj̈ita bajarapakuenia apoitsi. ¿Dej̈uajitsia? Itsaliwaisi yapütaenatsi.