¿Depakuenia meta pikani ponaponabeje Edén nakuata?

Jehová rajuta Adán, Evabeje daj̈ita pej̈aniakuenejawanü (Génesis 1:28).

Jehová ej̈ana petiriwa Eva. J̈uakujinae rajutatsi Adán pijawanej̈a (Génesis 2:21, 22).

Jehová ej̈ana Adán, Evabeje anekonijibia. Penajamatabüj̈ainaeliwaisi, peperabüto, pej̈aniakuene bitso.

Bajarapakujinae ponaponabeje Edén nakuata, bitso pej̈anianakuajawa. Itsajota j̈aina kaemene, naejawanü, dajubikuene ata. Pepo pej̈aniajawata.

Jehová barükuaikuaijai tsabiabi bajarapajiwibeje. Kujarubabiabanua pej̈aniakuenejawanü. Itsa jitsipabeje peponaponaenej̈abeje bajarapapej̈anianakuajawata, benamuj̈unaewetabeje Dioso pejumekowünütsinej̈a.

Dioso itaweta pej̈aeyaniwabeje kaenaekuaito (Génesis 2:16, 17).

Jehová itaweta Adán, Evabeje pekuaij̈aeyaniwabeje ponae tuatuajüta nuka Edén nakuata. Itsa j̈aejitsipabeje bajarapanaekuaito, tüpaejitsipabeje.

Itsaángelenü wekuanatsata Dioso. Bajarapaángelenü piajamatabükuenebejenü pewünü Satanás, baitsi Dowatji.

Dowatji apojitsipae Adán, Evabeje pejumekowünütsijawa Jehová. Dowatji kuaikuaijaiej̈ana jomo, jumaitsi Evajawabelia: ‘Paj̈ae atamübeje tsipae bajarapanaekuaito, apopatüpaemübeje tsipae. Saya pakuenejüpaejitsipamebeje Dioso’, jai jomo. ¡Bitso kajena ayainajumetsünütsi! (Génesis 3:1-5).