Adán, Evabeje apojumekowünütsibeje Dioso

Itsamatakabi Eva nakopata kaewa Edén nakuajawata, nej̈ata jomo barükuaikuaijaitsi. Jomo yanijoba bajarapowa: “¿J̈aniajai raja Dioso apopakatokopatsibeje panekuaij̈aenej̈abeje ponaenü nubena pabita?”. Nej̈ata Eva jumekanawiata: “Panekuenekaüjüpabeje pataj̈aejawanej̈abeje daj̈itawirianaekuaitonü. Itsiata baitsi jane, kaenae apopanetokopatsibeje patanaekuaij̈aenej̈abeje, tsipaji itsa paj̈aejitsipaj̈übeje, nej̈ata baja patüpaejitsipajübeje”. J̈uakujinae jomo jumaitsi Evajawabelia: “¡Jemajai raja! Apopatüpaemübeje tsane, biji rajane pakuenejüpaenamebeje Dioso”. ¿Bajaraj̈ua j̈aniajai? Jume, penajumetsünütsiliwaisi, itsiata Eva jumej̈aniatane jomo. Bitso tsitapej̈anianaekuaitotsi, bajaraj̈uata jitsipa pej̈aenej̈a. Nej̈ata üjüne bajarapanaekuaito, j̈uakujinae rajuta Adán pej̈aenej̈a. Bajaraponü pikani yapütane itsa aponatsijumekowünütsibeje Dioso tüpaejitsipabeje, itsiata bajaraponü j̈ane.

Bajarapamatakabikujinae, Jehová barükuaikuaijai Adán, Evabeje. Nej̈ata yanijoba bajarapajiwibejejawabelia: “¿Dej̈uajitsia apopanejumekowünütsimübeje?”. Adán jumepita: “Eva raja pejamatabükueneta”. J̈uakujinae Eva jumaitsi: “Jomo raja pejamatabükueneta”. Adán, Evabeje apopejumekowünütsij̈aebeje Dioso, bajaraj̈uata jutatsibeje Edén nakuawekua. Bajarapijinia Dioso nuba ángelewi, rutanua espada pitatsajawijawa peyakaranatsikuenia Edén nakuajawata, bajarapajiwibeje pejoneyaniwabeje.

Jehová yapütaeyaej̈ana, penanekonitsiaej̈anaenej̈a peyamaj̈üitojorobinütsi Eva pebarükuaikuaijawatatsi. Jemajai jomo apobarükuaikuaijai Eva, tsipaji Jehová apoej̈anae jomo pekuaikuaijainej̈a. Biji rajane, ángelnü piakuenebejenü kuaikuaijaiej̈ana jomo, tsipaji jitsipa peyamaj̈üitojorobinej̈a Eva. Bajarapaángelnü pewünü Dowatji, itsapewünü Satanás. Pewajünaeyabelia Jehová werebiabiana Dowatji. Bajarapakuenia nej̈ata bajaraponü apoyamaj̈üitojorobaponae tsane jiwi pibisiakuene pej̈anaenej̈a.