Ocho pajiwibeje kapanepatsi pebubutsijawawekua

Noé, pijamonae, dajubi ata kajunua ayaijeramoj̈anetojawabelia. Jehová pebaupaj̈atatatsikujinae, taj̈uj̈uaba pinijiemaj̈aneto. Beaj̈ayokuenia baja ira bubuta, nej̈ata bajarapaayaijeramoj̈aneto kotona. Itsiata pamonae apojitsipae pejonejawa ayaijeramoj̈anetota, nej̈ata tüpa. Biji rajane Noé, pijamonae yajawa pejonej̈ae ayaijeramoj̈anetota, Jehová kapanepatsi. Bajarapamonae meta nej̈ata, ¿dejamatabükueneliwaisi itsi Jehová pejumekowünütsij̈ae?

40 Pamatakabibeje, 40 pamerawibeje emaj̈aneto tsanukae, bajaraj̈uakujinae baja apoema. Taj̈uj̈uaba petsewanajetarukaejawa. Nej̈ata ayaijeramoj̈aneto bokajopa Ararat tsutojumatatsia. Itsiata tsitekaeya abaj̈ü ira bubuta, bajaraj̈uata Noé, pijamonae yajawa apopitsapae bajarapajeramoj̈anetowekua.

Beaj̈ayokuenia mera tsewa najetaruka. Noé, pijamonae yajawa bejamatabü anijawaibejekuenia jinawanapa ayaijeramoj̈anetojawata. Bajaraj̈uakujinae, Jehová jumaitsi: “Papitsapare baja ayaijeramoj̈anetowekua”. Bajarapamonae bitso siwajamatabükuenebarüya tsipaji Jehová kapanepatsi, aekonoj̈ae ¡Ikatsia baja pej̈aniairakuenia!. Bajaraj̈uata rajuta ofrendakuenia Diosojawabelia.

Jehová bitso tsitaj̈anepanatsi bajarapaofrenda, nej̈ata najumekapanepaeya jumaitsi: “Kaeto ata apobubutsiaej̈anaenü tsane pairaje, tawerebiabinej̈a daj̈ita pibisiakuenejawanü. Tanajumekapanepaeliwaisi peneta patakatsitaj̈utsinej̈a daj̈itamatakabijawabelianej̈a arawalibo itaboj̈ojawatarukaena”. ¿J̈amü meta itsajawata taneme arawalibo?

Bajarapijinia, Jehová itoroba Noé, pijamonae yajawa pej̈i pej̈ainaenej̈a daj̈itanakua peyawünükaenej̈a.