Jacob pita daj̈ita paj̈a pekobekowü

Isaac pej̈ainaejawata 40 pawaibeje barünacasaba Rebeca. Bajaraponü bitso asiwa pijawa. Bej̈üakujinae Rebeca wekuanaej̈anatsi anijapenakuetonüyobeje.

Matapijinü pewünü Esaú, juyapijinü pewünü Jacob. Esaú j̈aniawaetsia penarujuaitsinü, bajaraj̈uata tsitaj̈anepanabiabatsi wayafojawata peponaponaejawa. Jacob pijinia tsitaj̈anepanabiabatsi bota peponaponaejawa.

Bajarapamatakabianüta, matapijinü rajutabiabatsi iramonae, palata ata pejuyapijiwiwekua itsa paj̈a tüpa. Bajaraj̈ua yabara jumaitsi herenciajawa. Isaac pijamonaejawata bajarapaherenciajawa ata, yabara jumaitsi j̈ua Jehová rajutsiapaeba Abrahánpijinümijawabelia. Itsiata Esaú bajaraj̈ua apotsitanamatamotsitsi. Jacob itsiata yapütane bajaraj̈ua penamatamotsikuene.

Itsamatakabita, Esaú patanajetaruka pijabojawaberena kuerana bitso, tsipaji narujuaitaponapona daj̈itamatakabi. Nej̈ata tuj̈une pej̈aniapej̈aejawa Jacob pesetaponaponaejawa, nej̈ata Esaú jumaitsi Jacobjawabelia: “¡Bitso kajena tajani! ¡Nerajure j̈ua setaponaponame!”. Jacob jumekanawiata: “Je, itsiata kopiaya nerajutsianame j̈ua kanakopatsijitsiamü waj̈abeje pekobekowü”. Nej̈ata Esaú jumepita: “¡Itsa jitsipame kanakopare, aponetsitanamatamotsi bajaraj̈ua takanakopatsinej̈a!. Saya baja jitsipajü taj̈aejawa”. ¿J̈aniawaetsiakuenia meta Esaú itapeta? Jume kajena. Bajaraponü apojitsipae penamatamotsijawakuene saya baja jitsipa pej̈aejawa.

Pakujinae baja Isaac perujunü, jane baja pata bajarapamatakabi pematapijinü pej̈aniakuene penakoj̈irajutsinej̈a. Itsiata Rebeca yawenona pej̈ünato juyapijinü Jacob, paj̈a pej̈aniakuene perajutsinej̈atsi. Pakujinae Esaú yapütane bajaraj̈üa bitso anaepana, jamatabübeyaj̈uaba pejuyapijinü. Isaac yajawa Rebeca pitsakueneyaniwabeje Jacob, bajaraj̈uata jumaitsi bajaraponüjawabelia: “Kaekuenia ponare tamatapijinü Labánjawabelia, bajarajotalia bajayajebi ponaponaename nematapijinü pejamatabükuenekaewijawabelia pianaepanaejawa”. Bajaraj̈uata Jacob pematapijinü wekuanajetabajirawa pebeyaj̈uabiyaniwatsi.