Jacob, Esaúbeje nabarajamatabükuenej̈anepanabeje

Jehová najumekapanepaeya jumaitsi Jacobjawabelia peyajiwiewetsinej̈atsi, pakuenia yajiwieweta baja Abrahán, Isaac pijinübeje. Jacob nej̈ata ponapona Harán tomarawünüjawata. Bajarajota nacasaba, j̈aina pej̈imonaenua, bitso palatamonae j̈aina.

Bajaraj̈uakujinae Jehová jumaitsi Jacobjawabelia: “Nawiatsianame baja aj̈a pijairajawaberena”. Nej̈ata bajarapakuenia Jacob, pijamonae ata taj̈uj̈uaba peponaejawa taj̈u nakuajawabelia. Pakujinae namutojawa najetarubena, Jacob petonakuenebiwitsi jumaitsitsi: “Nematapijinü Esaú rabaja renajitsia pijajiwi yajawa 400 ponübeje”. Jacob bitso junawa Esaú pibisiakuene peitsijawatsi barüpijamonae. Bajaraj̈uata nawajüta Jehovájawabelia: “Nekapanepare tamatapijinü tanebeyaj̈uabiyaniwa”. Merawia pitsijawata, Jacob rajuta pej̈aniakuene Esaújawabelia: ovejamonae, cabramonae, vacamonae, camellomonae, burromonae ayaibitsaütoj̈aneto ata.

Bajarapamerawi, itsa Jacob pijaepato eka, tane ángelnü. Bajarapaángelnü taj̈uj̈uaba pebarünasaüüjübijawatsi. Nasaüüjübabeje peyananianaejawabelia. Itsiata Jacob topadenedenekae ata apokueranae. Ángelnü nej̈ata jumaitsi: “Nekopare baja taponaenej̈a”. Jacob jumekanawiata: “Jume, apokakopatsi tsanetsi itsa aponekueneitajütsimü tsane Dioso pej̈aniakuene tanerajutsinej̈amü”.

J̈uakujinae baja ángelnü pej̈aniakuene rajutatsi Jacob. Nej̈ata baja bajaraponü jumeyapütane Jehová yajiwiewetsipatsi pibisiakuene pej̈anaeyaniwatsi Esaú.

Bajarapabajayakunua, Jacob tane tajüweliakujinae Esaú peyajawanajetarukaejawa 400 ponübeje. Nej̈ata Jacob pewajünaeya pitsapa pijamonaewekua penakaj̈itajarabinej̈a Esaúbeje, itsa palia ekajunua pematabakabüta siete patobeje Esaú pitabarata. Bajaraj̈uakujinae Esaú kujinaepona waetabalia Jacob, najuanuabeje ata nej̈ata baja nabarajamatabükuenej̈anepanabeje. ¿Bajaraj̈ua meta Jehová tsitaj̈anepanatsi j̈ua itsi Jacob?

Bajaraj̈uakujinae baja Esaú nawiata pijaboyabelia, Jacob abaj̈ü tsitekaeya najetaruka itsajawabelia. Jacob j̈aina 12 pej̈ijiwibeje: Rubén, Simeón, Leví, Judá, Dan, Neftalí, Gad, Aser, Isacar, Zabulón, José yajawa Benjamín. J̈uakujinae, Jehová kapanepaena pijajiwi José pejamatabükueneta, Jacob pej̈ünatoyajuwünü. ¿Jitsipame neyapütaejawa pakuenia itsi tsane? Taename nej̈ata bajarapaliwaisi.