LIWAISI 02

Bibliabaj̈utota ruka wajaewetsiliwaisi, pej̈aniajailiwaisi

Pebaj̈ujumapekapitsapaejawa

Daj̈itanakuajawa jiwi akuenebeje nabejiobiatane, jamatabübüjai tsawanapae. ¿J̈amü ata bajarapakuenia itsajawata nabejiobiataneme?, ¿j̈amü ata meta awitanemü?, ¿j̈amü ata meta nijamonae katotüpa? J̈amü meta najamatabüj̈ainaejitsipame: “¿Itsa matakabi meta ponaponaejitsipajü j̈aniawaetsia?” Bibliabaj̈uto kajena nakajamatejemayaej̈ana.

1. ¿Depapej̈anialiwaisianü rubena Bibliabaj̈utota wajaewetawanapaenej̈a?

Bibliabaj̈uto nakajumeyapütaeyaej̈ana j̈ua yabara pibisiakuenejawanü yawünüka panakuataje. Nakayapütaeyaej̈ananua pej̈anialiwaisi, pakuenia daj̈itapibisiakuene kaeepatoyokujinae kopiarukaena. Papej̈anialiwaisianü rubena Bibliabaj̈utota pej̈aniakuene pekarajutsinej̈a newajünaeyabelia (lebare Jeremías 29:11, 12). Bajarapaliwaisi nakajamatabükueneyawenona wajayasipitsapaenej̈a pibisialiwaisianü. Nej̈ata nakajamatejemayaej̈ana, nakayapütaeyaej̈ananua barüyaya wajajinawanapaenej̈a daj̈itamatakabijawabelianej̈a.

2. ¿Dej̈ua Bibliabaj̈uto nakayapütaeyaej̈ana wajawajünaeyabelia?

Bibliajawata jumaitsi pakuenia wajawajünaeyabelia itsijitsia. “Ajibi baja tsane petëpaecuene, penuecuene ata, bitso penajamatabëxainaecuene ata, penavixaetaecuene ata” (lebare Apocalipsis 21:4). Ajibi baja tsane pibisiakuenejawanü, pebejiobikuene, piawitanekuene, petüpaekuene ata. Bibliajawata jumaitsi pakuenia jiwi jamatabükuenebarüyajitsia pairataje daj̈itamatakabijawabelianej̈a.

3. ¿Dej̈ua kayawenonaena nejumej̈aniataenej̈a paliwaisianü rubena Bibliajawata?

Pikani daj̈itajiwi jitsipa pejinawanapaejawa j̈aniawaetsia, itsiata baitsi jane tsitaayapübejetsi. Biji rajane pamonae jumekowünüta papej̈anialiwaisianü rubena Bibliabaj̈utota, apojumeaebi barapaliwaisi. Bejumekowünütatsi paliwaisianü rubena Bibliajawata, itsa j̈aniawaetsia nakujarubatsi wajayapütaenej̈a (Hechos 17:11). Itsa nakujarubianame paliwaisianü rubena Bibliabaj̈utota, nej̈ata jumej̈aniataename j̈ua yabara nakayapütaeyaej̈ana wajawajünaeyabelia.

KANAÜJÜTSIANATSI

Kanaüjütsianatsi paliwaisianüje wajawajünaeyabelianej̈a j̈ua rubena Bibliabaj̈utota. Taenatsi pakuenia bajarapaliwaisianü itsamonae jamatabükueneyawenonatsi.

Pejumapianü tsitajüta pakuenia jiwimonae jinawanapa ajenata, tsitajütanua pakuenia Bibliabaj̈uto yapütaeyaej̈ana pejinawanapaenej̈a pewajünaeyawelia. J̈uakujinae pajumapianü ikatsia naitajütsiana.

4. Bibliabaj̈uto nakaliwaisiyawenona pakuenia aliwaisijibinejewa jinawanapaejitsiatsi daj̈itamatakabijawabelianej̈a

Taema paliwaisianüje wajawajünaeyabelianej̈a j̈ua rubena Bibliabaj̈utota. ¿Depaliwaisi bitso katsitaj̈anepana? ¿Dej̈uajitsia?

Palebianame paliwaisianüje rubena Bibliabaj̈utota, panelebikujinae panabarükuaikuaijamü tsane paliwaisianü yabaraje:

¿Bajarapaliwaisianü meta kajamatabükueneyawenonaejitsipa? ¿Bajarapaliwaisi meta nijamonae, niasiwawi ata jamatabükueneyawenonaejitsipatsi?

Kanaüjüre neponaponaejawa pakueniaje:

ITSAJIWI ATA...	DAJ̈ITAJIWI...
... apobejiobi tsane, apoperujujiwi tsane, apotüpae ata tsane (Isaías 25:8).	... taena itsapakujinae pijamonae petüpaewi namatakobiana panakuataje (Juan 11:25).
... apoawitane tsane (Isaías 33:24; 35:5, 6).	... jumalij̈anepanaeya jinawanapaena, akuenesaü tsawanapae tsane pejanajiwiyokuenia (Job 33:25).
... pibisiakuene apoitsi tsanetsi (2 Pedro 3:13).	... ayaikuenia pej̈aejawa j̈ainaena, pej̈aniabonü j̈ainaenanua, barüyaya nakuenebawanapaena (Salmo 72:16; Isaías 65:21, 22).
... apobejiobiaej̈anae tsanetsi penabekuene yabara (Salmo 46:9).	... j̈aniawaetsia barüyaya jinawanapaena (Salmo 37:11).
... apotsijamatabükuenerukae tsanetsi pibisialiwaisi (Isaías 65:17).	... jinawanapaena pej̈aniakuenia daj̈itamatakabijawabelianej̈a (Salmo 37:29).

Tsikirinüyo pikani awitane, itsiata j̈uakujinae jamatejema baja, pena waitabanuka.

Itsajiwitonü pikani perujunüyo, itsiata j̈uakujinae pewüjüatonü ikatsia, carretillamota kaponanajetaruka ayaipej̈aejawa.

5. Papej̈anialiwaisianü rubena Bibliajawata nakajamatabükueneyawenona j̈aniawaetsia wajajinawanapaenej̈a

Itsamonae jamatabükuenekuerana, itsamonae pijinia anaepana pibisiakuene petaej̈ae panakuataje. Itsamonae daj̈itakuene pikani itsi pej̈anetsinej̈a bajarapapibisialiwaisianü. Taema pakuenia pej̈anialiwaisianü rubena Bibliajawata, ayaibitsaüto jiwi jamatabükueneyawenonanajetarubenatsi. Pataema VIDEOJAWA, panetaekujinae panabarükuaikuaijamü tsane paliwaisibeje yabaraje:

VIDEOJAWA: Jamatabüjitsipajü tayawenonaejawa pamonae bejiobiaej̈anatsi (4:07)

Videojawa “Jamatabüjitsipajü tayawenonaejawa pamonae bejiobiaej̈anatsi”. Tsikiriwayo Rafika barünota pijajiwi algodón.

Pakuenia taneme videojawata, ¿depapibisiakuene yabara Rafika büjai?
Daj̈ita abaj̈ü pikani apokopiarukae bajarapapibisiakuene, itsiata, ¿depakuenia Bibliabaj̈uto jamatabükueneyawenonatsi?

Itsa ewetatsi pekopiapatsijawa paliwaisianü rubena Bibliabaj̈utota, barüyaya beyasipitsapatsi pibisiakuene. Palebare Proverbios 12:25; Romanos 12:12, panelebikujinae panabarükuaikuaijamü tsane paliwaisi yabaraje:

¿Dejumaitsimü tsipae? Itsa ewetsipame pekopiapatsijawa paliwaisianü rubena Bibliabaj̈utota, ¿kajamatabükueneyawenonaejitsipa ajena pamatakabianüjawa? ¿Dej̈uajitsia bajarapakuenia najamatabüj̈ainame?

ITSAMONAE BAJUMAITSI: “Paliwaisianü rubena Bibliabaj̈utota pewajünaeyabelianej̈a pikani netsitaj̈anepana, itsiata baitsi jane j̈anü bajarapaliwaisi apojumej̈aniataenü”, jai.

¿Dej̈uajitsia meta bekanaüjütatsi paliwaisianü rubena Bibliajawata wajajumej̈aniataenej̈a?

PALIWAISI BAJA YAPÜTANETSI

Paliwaisianü rubena Bibliabaj̈utota wajawajünaeyabelianej̈a nakajamatabükueneyawenona wajayasipitsapanajetarubenaenej̈a nakatokopiapatatsi ata pibisialiwaisianü.

Najamatabünapire

¿Dej̈uajitsia jiwi namatawenona peyapütaejawa paliwaisianü rubena Bibliabaj̈utota pewajünaeyabelia yabara?
¿Dej̈ua nakayapütaeyaej̈ana Bibliabaj̈uto wajawajünaeyabelianej̈a?
¿Depakuenia kajamatabükueneyawenonaejitsipa itsa ewetame pej̈aniakuene newajünaeyabelia?

Pamatakabi weretatsi paliwaisije:

Pakuenia neitsinej̈aje

Nenakofünütsiyaniwa paliwaisianü rubena Bibliabaj̈utota newajünaeyabelianej̈a, lebianame nej̈ata ikatsia pajumeliwaisij̈i rubena Bibliabaj̈utota.

Itsakuenejawanü:

Your other goal

YAPÜTAENAME ITSALIWAISI

Videojawanü “Jamatabüjitsipajü tayawenonaejawa pamonae bejiobiaej̈anatsi”. Rafika matapania napata Jehová petotsipaebaponaewi penakaetuatsijawa. Jamatabükuenebarüya petaej̈ae daj̈itawiriawi jamatabükuenejüpaeya natane.

Yapütaename paliwaisije:

“¿Depatsa meta benakayawenona wajaewetsinej̈a pej̈aniakuenejawanü wajawajünaeyabelia?” (¡Naükore!, 22 de abril, 2004)

Yapütaename pakuenia itsamonae barüyaya jinawanapa pewetsij̈ae pej̈anikuene pewajünaeyabelia.

“¿Ayaikuenia awitane atatsi, nakayawenonaejitsipa meta Bibliabaj̈uto?” (Ruka Internet-jawata jw.org)

Itsa taneme penaj̈üanaevideojawa, kanaüjüre nijamonae yajawa, barüyaya nebarüponaponaenej̈a pej̈anianakuata, pakuenia Bibliabaj̈uto jumaitsi newajünaeyabelianej̈a.

Ewetajü bajarapitsimatakabi (3:37)

Lebianame pakuenia itsanü najamatabükuenej̈aneta pakujinae yapütane paliwaisianü Bibliabaj̈utota rubena.

“Aekonoj̈ae aponejamatabükueneenae taj̈anetsinej̈a panakuaje” (Peyajiwitaebo, 1 de julio, 2013)