¿Depakuenia j̈aniawaetsiakuenia beyapütanetsi Dioso Pejumeliwaisi?

¿Itsajawata meta katsitaayapübeje tsipae pinijikuenia nenakuenebinej̈a? Pekatsitaayapübejej̈ae, j̈amü meta jaitsipame pekatsitayapüj̈anepanaekuenia. Bajarapakuenia ata itsimü tsipae nelebinej̈a Bibliabaj̈uto. J̈amü meta jamatabüjumaitsimü tsipae: “¿Dewelia meta taj̈uj̈uabianajü?” Paliwaisijawataje yapütaename pakuenia barüyaya lebijitsiamü nejumeyapütaenej̈a Dioso Pejumeliwaisi.

1. ¿Dej̈uajitsia nej̈ata j̈anepana Bibliabaj̈uto wajalebijawa kaematakabi kanakujitsia?

Pajiwiyo leba daj̈itamatakabi ‘Dioso Pejumeliwaisi’ barüyaya ponapona (lebare Salmo 1:1-3). Netaj̈uj̈uabinej̈a, belebame paminutobeje jitsipame, kaematakabi kanakujitsia. Itsa bitso jamatabüyapütaneme Dioso yabara, jamatabükuenebarüyaya lebianame.

2. ¿Dej̈ua kajamatabükueneyawenonaena nelebinej̈a Dioso Pejumeliwaisi?

Itsa lebatsi wajajumeyapütaenej̈a, beaj̈ayokuenia belebaponatsi. Nej̈ata “canaëjëtsiaya” belebaponatsi (Josué 1:8). Itsa lebianame, nayanijobianame pakueniaje: “¿Dej̈ua neyapütaeyaej̈ana bajarapaliwaisi Jehová yabara? ¿Deitsinü tsipae tayapütaekujinae? ¿Deitsinü nej̈ata tsipae tayawenonaenej̈a itsamonae?”.

3. ¿Depakuenia matakabi jutsipame nelebinej̈a Bibliabaj̈uto?

¿Katsitaayapübeje nelebinej̈a kaeepatoyo Dioso Pejumeliwaisi? Pütsa jamatabükuenebüjamü, daj̈itatsi rabaja bajara itsitsi. Dioso kayawenonaena neitapetsinej̈a “palivaisi bitso xanepana daxitalivaisivecua” (Filipenses 1:10). Bekanaüjütame paepatota lebijitsiamü Dioso Pejumeliwaisi. Itsamonae leba pepo bajayakunua. Itsamonae pijinia tsitaj̈anepanatsi pelebinej̈a merawi. Itsamonae penakueraewetsijawata, itsamonae merawi leba pemajitsiwajünaeya. ¿Depaepatota katsitaj̈anepanaejitsipa Bibliabaj̈uto nelebinej̈a?

KANAÜJÜTSIANATSI

4. Yapütaename pakuenia barüyaya lebijitsiamü Dioso Pejumeliwaisi

¿Katsitaayapübeje meta tsipae Dioso Pejumeliwaisi nelebinej̈a? Itsiata pakuenia beaj̈ayokuenia nakatsitaj̈anepana pej̈aejawa, bajarapijinia pakuenia beaj̈ayokuenia nakatsitaj̈anepana Dioso Pejumeliwaisi wajalebinej̈a. Palebare 1 Pedro 2:2, panelebikujinae panabarükuaikuaijamü tsane paliwasi yabaraje:

• ¿Bibliabaj̈uto itsa lebijitsipame daj̈itamatakabi, jitsipaejitsipame meta bitso Dioso Pejumeliwaisi nelebinej̈a? ¿Dej̈uajitsia?

Pataema VIDEOJAWATA pakuenia itsamonae tsitayapüj̈anepanatsi barüyaya pelebinej̈a Dioso Pejumeliwaisi. Panetaekujinae panabarükuaikuaijamü tsane paliwaisianü yabaraje:

VIDEOJAWA: Pewüjüawi, pejanawi ata tsitaj̈anepanatsi Dioso Pejumeliwaisibaj̈uto (5:33)

• ¿Dej̈uajitsia itsamonae pewüjüawi, pejanawi ata apotsitayapüj̈anepanaetsi Dioso Pejumeliwaisi pelebinej̈a?

• ¿Dej̈ua jamatabükueneyawenonatsi?

• ¿Deitsi nej̈ata petsiyapüj̈anepanaenej̈atsi Dioso Pejumeliwaisi pelebinej̈a?

Pakuenia taj̈uj̈uabijitsiamü nelebinej̈a:

• Itapere Bibliabaj̈uto j̈aniawaetsiakuenia petraducibibaj̈uto, j̈aniawaetsiakuenia nejumeyapütaenej̈a. Taename nenakujarubinej̈a Traducción del Nuevo Mundo itsa pitsapa nijajumeta.

• Lebianame paliwasi bitso katsitaj̈anepana. Taema “Pakuenia taj̈uj̈uabijitsiamü nelebinej̈a Dioso Pejumeliwaisi”, pejaibaj̈uto.

• J̈ua baja lebame, katitaponaename. Taema “Tarutaponaenej̈a j̈ua baja lebajü”, pejaibaj̈uto, bajarapabaj̈utojawata taename.

• Kanakuenebare bajarapaaplicación JW Library^®. Kapitsapare nijateléfonojawata, computadora, tabletajawata. Bajarapakuenia katoyapüj̈anepana nelebinej̈a paepatota jitsipame.

• Kanakuenebare apéndicejawanü Traducción del Nuevo Mundojawata. Bajarajota kaj̈itajarabianame mapa, pejumapianü, pejaijamatabükueneliwaisianü, j̈aniawaetsia nejumeyapütaenej̈a pakuenia lebijitsiamü Dioso Pejumeliwaisibaj̈utota.

5. Nakujarubare nijakueneta pekakujarubiwajünaeya

Palebare Salmo 119:34, panelebikujinae panabarükuaikuaijamü tsane paliwaisi yabaraje:

• ¿Dej̈uajitsia j̈anepana nenawajütsijawa Dioso Pejumeliwaisi nelebiwajünaeya, nenakujarubiwajünaeyanua?

¿Deitsimü tsipae j̈aniawaetsiakuenia neyapütaenej̈a mapabaj̈utoje? Itsa nakujarubame nijakueneta pekakujarubiwajünaeya, mapakuenia beitsimüje:

1. A. Lebianame petaj̈uj̈uabijawawelia daj̈itapárrafojawanü, kaeliwaisi kanakujitsia.

2. B. Jaire paliwaisij̈i rubena Bibliajawata. Lebianame, jumeyapütaenamenua j̈uakuene yabara.

3. D. Katitsianame bajarapaliwaisi, jumekanawiatsianamenua paliwaisi bajarajota yanijoba. Bajarapakuenia nej̈ata katoyapüj̈anepanaena neyapütaenej̈a pekakujarubijiwiyo itsa kakujarubiana.

¿Yapütaneme baja?

Jehová patatotsipaebaponaewi pakanakuenebajü itsaBibliabaj̈utonü, itsiata bitso panetsitaj̈anepana Traducción del Nuevo Mundo tsipaji j̈aniawaetsiakuenia pajumeyapütaniji. BajarapaBibliajawata Dioso wünürubena (taema jw.org Internet-jawata: “¿Jehová petotsipaebaponaewi saikaya pija Bibliabaj̈uto j̈aina?”).

PALIWAISI BAJA YAPÜTANETSI

J̈aniawaetsiakuenia nejumeyapütaenej̈a Bibliabaj̈uto kaematakabi kanakujitsia, kaeepatoyo jure nelebinej̈a. Wajüre Diosojawabelia pekajamatabükueneyawenonaenej̈a neyapütaenej̈a j̈ua lebame. Pekakujarubiwajünaeya nijakueneta nakujarubare Dioso Pejumeliwaisi.

Najamatabünapire

• ¿Deitsimü tsipae neyapütaenej̈a Dioso Pejumeliwaisi?

• ¿Depakuenia nej̈ata matakabi jutsipame nelebinej̈a Dioso Pejumeliwaisi?

• ¿Dej̈uajitsia j̈anepana nijakueneta nenakujarubijawa itsajiwi pekakujarubiwajünaeya Dioso Pejumeliwaisi?

YAPÜTAENAME ITSALIWAISI

Lebianame pakuenia j̈aniawaetsia yapütaejitsiamü itsa lebame Dioso Pejumeliwaisi.

“Barüyaya lebianame Dioso Pejumeliwaisi” (Peyajiwitaebo número 1, 2017)

Yapütaema akueyabi pakuenebeje nelebinej̈a Dioso Pejumeliwaisi.

“¿Depakuenia kajamatabükueneyawenonaejitsipa Dioso Pejumeliwaisi? Jaire pej̈anialiwaisianü Bibliajawata” (Ruka Internet-jawata jw.org)

Taema pakuenia barüyaya Bibliabaj̈uto lebijitsiamü.

“¿Depakuenia kajamatabükueneyawenonaejitsipa Dioso Pejumeliwaisi? Yapütaema pakuenia Bibliabaj̈uto lebijitsiamü” (Ruka Internet-jawata jw.org)

Taename pakuenia itsamonae ayaiepato kapona penakujarubijawa Dioso Pejumeliwaisi.

Pakuenia nakujarubijitsiatsi Dioso Pejumeliwaisi j̈aniawaetsia wajayapütaenej̈a (2:06)