J̈aniawaetsia itapere nijaamigowinej̈a

Wajaamigowi itsa pej̈aniajamatabükuenewi ayaikuenia nakajamatabükuenebarüyayaej̈anaena. Nej̈ata itsa jamatabükuenebejiobitsi, bajarapamonae nakajamatabükueneyawenonaena. Itsiata baitsi jane, nayajiwitaeya bejinawanapatsi tsipaji Dioso Pejumeliwaisibaj̈uto nakayapütaeyaej̈ana daj̈ita jiwimonae apopejamatabükuenej̈anepanaewi. Nej̈ata, ¿dej̈ua beitsitsi j̈aniawaetsiakuenia wajaitapetsinej̈a pej̈aniaamigowi? Nakujarubianatsi bajarapaliwaisi yabara.

1. ¿Depajamatabükuenejawanü kaj̈ainaeyaej̈anaejitsipa nijaamigowi?

Itsa bajayajebi yajawajinawanapatsi bajarapamonae kuenej̈upaejitsipatsi pej̈aniajamatabükuene, itsa jume, pibisiajamatabükuene. Bajarapajamatabükuene j̈ainaejitsipatsi itsa yajawajinawanapatsi bajarapamonae, itsa jume, itsa Internet-jawata barükuaikuaijaitsi. Dioso Pejumeliwaisibaj̈uto jumaitsi: “Pajiwi yajawaponapona penatsiwajünaekanaüjütsiwita nayajiwitaeyaponaponaena, itsiata pajiwi yajawaponapona apopenatsiwajünaekanaüjütsiwita [pamonae apopejitsipaewi Jehová] tokopiapatsianatsi pibisiakuene” (Proverbios 13:20). Itsa wajaamigowi asiwa, yaiyatanenua Jehová, nej̈ata nakajamatabükueneyawenonaena wajaimoj̈oyobinej̈a bajaraponüjawabelia, pej̈aniakuene wajaej̈anabiabinej̈anua. Itsiata baitsi jane, itsa wajaamigowi apojumekowünütsi Jehová, bajarapamonae nakawekuanatsatsiayaej̈anaena bajaraponüwekua. Bajaraj̈uata Dioso Pejumeliwaisibaj̈uto nakamuj̈ujioba j̈aniawaetsia wajaitapetsinej̈a pamonae nakayajawajinawanapaejitsia. Itsa wajaamigowi asiwa Dioso, daj̈itatsi j̈aniawaetsia jinawanapaenatsi. Bajaraj̈uata bejumekowünütatsi mapapemuj̈ujiobiliwaisije: “Namataenetsia panajamatabëcueneasaëya exanaponame” (1 Tesalonicenses 5:11).

2. ¿Jehová meta tsitaj̈anepanatsi paamigowi itapetame?

Jehová j̈aniawaetsiakuenia itapetabiaba pijaamigowi. Bajarapakuenia “pejamatabükuenej̈anepanaewi pepo asiwaya naükota.” (Proverbios 3:32). ¿Dejamatabükueneitsi tsipae meta Jehová itsa yajawaponaponame pamonae apojumekowünütsi bajaraponü? Najamatabüj̈ainaejitsipa bitso (lebare Santiago 4:4). Biji rajane, itsa nawekuanatsatatsi pibisiajamatabükuenewi, itsa najamatabükueneimoj̈oyobatsi Jehovájawabelia, itsa najamatabükueneimoj̈oyobatsinua Jehová piasiwawijawabelia, nej̈ata Jehová nakasiwajamatabükuenebarüya tsane, jitsipaenanua pijaamigowinej̈atsi (Salmo 15:1-4).

KANAÜJÜTSIANATSI

3. Nayajiwitaeya ponaponare piajamatabükuenebejewiwekua

Pibisiajamatabükuenewi peneta apoasiwa Dioso, apoyaiyataenua Dioso pitorobiliwaisianü. Pataema VIDEOJAWA, panetaekujinae panabarükuaikuaijamü tsane paliwaisi yabaraje:

VIDEOJAWA: Pakuenia nawekuanatsatatsi pibisiajamatabükuenewi (6:17)

• ¿Depakuenia meta yajawajinawanapaejitsipatsi piajamatabükuenebejewi apoyapütaenejewatsi?

Palebare 1 Corintios 15:33, panelebikujinae panabarükuaikuaijamü tsane paliwaisi yabaraje:

• ¿Depamonae meta pibisiajamatabükuenewi tsipae j̈amünej̈a? ¿Dej̈uajitsia meta?

Palebare Salmo 119:63, panelebikujinae panabarükuaikuaijamü tsane paliwaisi yabaraje:

• ¿Wajaamigowi meta depajamatabükuene bej̈aina?

4. Wajaamigowi daj̈itawiriawi tsipae

Bibliabaj̈uto nakayapütaeyaej̈ana pakuenia David, Jonatánbeje apokaewaijiwibeje, peponaponaekuene aponajüpaebeje ata. Itsiata asiwayakuenia najuaponaponabeje. Palebare 1 Samuel 18:1, panelebikujinae panabarükuaikuaijamü tsane paliwaisi yabaraje:

• ¿Wajaamigowinej̈a kaewai meta benajuaj̈ainatsi, benajüpanua wajajinawanapaekuene?

Palebare Romanos 1:11, 12, panelebikujinae panabarükuaikuaijamü tsane paliwaisi yabaraje:

• ¿Depakuenia pepo amigowi piasiwawi Jehová najamatabükuenebarüyayaej̈ana namataenetsia?

¿Dej̈ua itsi pewüjüatonü peyajawaponaponaenej̈a pepo amigowi? Pataema VIDEOJAWA, panetaekujinae panabarükuaikuaijamü tsane paliwaisianü yabaraje:

VIDEOJAWA: Daj̈itajawa bekaj̈itajarabatsi pej̈aniajamatabükuenewi wajaamigowinej̈a (5:06)

• ¿Dej̈uajitsia Akil paj̈a, penabeje jamatabükueneenatsibeje pej̈anaej̈ae amigowi escuelajawata?

• ¿Dej̈uajitsia Akil tsitaj̈anepanatsi peyajawaponaponaenej̈a bajarapamonae?

• ¿Deitsi nej̈ata Akil pejamatabükueneimasiayaniwa?

5. ¿Dej̈ua beitsimü nej̈ainaenej̈a pepo amigowi?

VIDEOJAWA: ¿Deitsi meta pepo amigojiwiyo? (4:14)

Palebare Proverbios 18:24; 27:17, panelebikujinae panabarükuaikuaijamü tsane paliwaisibeje yabaraje:

• ¿Depakuenia pepo amigowi namataenetsia nayawenona?

• Pakuenia jumaitsi Proverbiosbaj̈utota amigowi yabara, ¿bajarapakuenia itsi nijaamigowi? Itsa jume, ¿dej̈ua nej̈ata beitsimü?

Palebare 1 Corintios 10:24, panelebikujinae panabarükuaikuaijamü tsane paliwaisi yabaraje:

• Nej̈ainaenej̈a pepo amigowi, j̈amü kopiaya bepepo amigonümü. ¿Depakuenia itsimü tsipae bajaraj̈ua?

PALIWAISI BAJA YAPÜTANETSI

Itsa j̈aniawaetsiakuenia itapetatsi wajaamigowi jamatabükuenebarüyayaej̈anaenatsi Jehová, jamatabükuenebarüya tsanetsi waj̈aitsi ata.

Najamatabünapire

• ¿Dej̈uajitsia Jehová barüya tsipae itsa j̈aniawaetsia itapetatsi pepo amigowi?

• ¿Depaamigowi apobeyajawajinawanapaetsi?

• ¿Dej̈ua beitsimü neyajawaponaponaenej̈a pamonae Jehová piasiwawi?

YAPÜTAENAME ITSALIWAISI

Yapütaema pakuenia pepo amigowi kajamatabükueneyawenonaenaejitsipa itsa katokopiapata piayapübejeliwaisi.

“Pepo amigowi yajawajinawanapatsi Dioso pijamatakabi pepatsiwajünaeya” (Peyajiwitaebo, noviembre de 2019)

Yapütaema pakuenia beyajawaponaponame pej̈aniajamatabükuenewi.

“¿Dejamatabükueneitsi pepoamigowi?” (J̈ua pewüjüawi, pejanawi jamatabüyapütane, volumen 1, capítulo 8)

¿Dej̈ua beyapütaneme pamonae barükuaikuaijamü tsabiabi Internet-jawata?

Red socialjawanüta nayajiwitaema (4:12)

¿Dej̈uajitsia meta kaepebi nawekuanatsata pijaamigowi? Lebare paliwaisije: “Taj̈a bajamatabüj̈ainajü”.

“Dioso Pejumeliwaisi jamatabükuenej̈anetatsi” (Peyajiwitaebo, 1 de abril, 2012)