Barüyaya beyawenoname nijacongregaciónjawata

Daj̈itanakuajawa ayaibitsaütojiwimonae tonakueba barüyaya Jehová pijacongregaciónjawanüta. Bajarapacristianowi tsitaj̈anepanatsi bitso paliwaisijawanü yapütaeyaej̈anatsi pejumekowünütsinej̈a, barüyayanua tonakuenebawanapa penakaetuatsibojawata. ¿J̈amü jamatabükuenebarüyamü nenakaetuatsibojawata?

1. ¿Deitsimü tsipae neyawenonaenej̈a congregaciónjawata?

Daj̈itatsi nakakuenekaüjüpa wajayawenonaenej̈a wajacongregaciónjawata. ¿Nijacongregaciónjawata meta itsamonae awitane, perujujiwij̈i? ¿Barüponaejitsipame meta penakaetuatsibojawabelia? ¿Deitsimü tsipae bajarapamonaenej̈a? ¿Tokomuatsipame meta pej̈aejawanü? ¿Pijabo meta j̈aniawaetsipame? (lebare Santiago 1:27). Barüyayakuenia beyawenonatsi wajaj̈anebinej̈a wajanakaetuatsibojawata. Itsajiwiyo aponakaitorobi wajaitsinej̈a bajarapakuenia, wajaasiwaj̈ae wajaDioso, wajamonae yajawa asiwaya nakuenebatsi (Salmo 110:3).

Pamonae nabautisaba baja pakuenia Jehová petotsipaebaponaejiwiyo, itsa pebijiwi, itsa jumekowünütawanapanua Dioso Pejumeliwaisi, nej̈ata ancianowi peyawenonaewi tsipae, j̈uakujinae ancianowi ata tsipae. Daj̈ita Jehová pijajiwi kuenekaüjüpatsi petonakuenebinej̈a precursorkuenia. Itsamonae juya yawenona peitsinej̈a penakaetuatsibonü.

2. ¿Depakuenia yawenonaejitsipatsi itsa palata, wajakobekowü atanua rajutatsi?

Bibliabaj̈utota jumaitsi: “Dioso yaiyataeya [...] rajutabiabianame nexainaeyajuwënëjawanë” (Proverbios 3:9). Bitso jamatabükuenebarüyatsi wajarajutsij̈ae wajapalatayajuwünüjawanü wajayawenonaenej̈a congregaciónjawata, Dioso Pejumeliwaisinua petsipaebinej̈a daj̈itanakuajawa (lebare 2 Corintios 9:7). Bajarapakuenia nej̈ata yawenonatsinua wajamonae ayailiwaisianü itsa natsij̈ainabiaba. Itsamonae kajena najamatabükueneweretabiaba saikaya petsataponaenej̈a perajutsinej̈a (lebare 1 Corintios 16:2). Itsa jamatabürutame palata j̈ainame kajonijawata wajanakaetuatsibojawata, itsa jume, berajutatsinua Internet-jawata donate.jw.org. Bajarapakuenianua tonajamatabükueneitajütatsi Jehová wajaasiwajawa.

KANAÜJÜTSIANATSI

3. Rajutsipame nej̈ainaeyajuwünüjawanü neyawenonaenej̈a

Jehová, Jesúsbeje tsitaj̈anepanatsibeje barüyaya itsa rajutatsi. Bajayata Jesús siwajamatabükuenebarüya pamona pewekuatüpaewatsi palata perajutsij̈ae. Palebare Lucas 21:1-4, panelebikujinae panabarükuaikuaijamü tsane paliwaisibeje yabaraje:

• ¿Ayaipalataj̈aneto meta berajutatsi Jehová wajajamatabükuenebarüyayaej̈anaenej̈a?

• ¿Dejamatabüitsi Jehová, Jesúsbeje itsa rajutatsi wajajamatabüütjütojawawetsina?

Yapütaename pakuenia itsi tsabiabi wajarajutsipalatajawanüta. Pataema VIDEOJAWA, panetaekujinae panabarükuaikuaijamü tsane paliwaisi yabaraje:

VIDEOJAWA: Rajutatsi Jehovájawabelia (4:47)

• ¿Depakuenia yawenonatsi daj̈itacongregaciónjawanü j̈ua rajutatsi?

4. Nijakueneta beyawenoname

Bajayata Jehová pejumekowünütsiwi, yawenonanua barüyaya pej̈anebinej̈a penakaetuatsibojawata. Palebare 2 Crónicas 34:9-11, panelebikujinae panabarükuaikuaijamü tsane paliwaisi yabaraje:

• ¿Dej̈ua baitsi tsabiabi israelitawi pewetabiabinej̈a “Jehová pijabo”, baitsi penakaetuatabiabibojawa?

Ajena pamatakabi bajarapakuenia itsi Jehová petotsipaebaponaewi. Paneyapütaenej̈a pataema VIDEOJAWA. Panetaekujinae panabarükuaikuaijamü tsane paliwaisibeje yabaraje:

VIDEOJAWA: Ewetawanapatsi wajanakaetuatabiabibojawa (3:31)

• ¿Dej̈uajitsia wajanakaetuatabiabibojawa biaj̈uirajibiaej̈anatsi, bewetatsinua?

• ¿Depakuenia meta j̈amü yawenonaejitsipame?

5. Wajamonae pebijiwi benajamatabükuenesaüta peyawenonaenej̈a bebeliayo

Bibliabaj̈utota jumaitsi Dioso pejumekowünütsiwi pebijiwinej̈a pejamatabükuenewitsabinej̈a Jehovájawabelia, peyawenonaenej̈a pijacongregaciónjawata. Yapütaema j̈ua itsi wajamonaenü. Pataema VIDEOJAWA, panetaekujinae panabarükuaikuaijamü tsane paliwaisi yabaraje:

VIDEOJAWA: Pajamatabükuenewitsabare Jehovájawabelia (5:19)

• ¿Dej̈uajawanü itsi Ryan pejamatabükuenewitsabinej̈a Jehovájawabelia, peyawenonaenej̈anua bebeliayo pijacongregaciónjawata?

Bibliabaj̈uto yapütaeyaej̈ana j̈ua beitsi pebijiwi petonakuenebinej̈a ancianowikuenia, ancianowi peyawenonaewikuenianua. Palebare 1 Timoteo 3:1-13, panelebikujinae panabarükuaikuaijamü tsane paliwaisianü yabaraje:

• ¿Debeitsi Jehová pejumekowünütsiwi itsa jitsipa ancianowi peyawenonaenünej̈a, itsa jitsipanua ancianonünej̈a?

• ¿Pijamonae nej̈ata debeitsi? (Palebare tsikiriitanetoyobeje 4, 11).

• Wajamonae pebijiwi itsa najamatabükuenesaüta, ¿depakuenia jamatabükueneyawenonaejitsipa congregaciónpijiwi?

PALIWAISI BAJA YAPÜTANETSI

Jehová bitso tsitaj̈anepanatsi j̈aniawaetsiakuenia congregaciónjawata barüyaya itsa yawenonatsi. Itsa jamatabürajutatsinua wajakobekowüyajuwünüjawanü.

Najamatabünapire

• ¿Debeitsitsi wajayawenonaenej̈a wajacongregaciónjawata?

• ¿Debeitsitsi wajayawenonaenej̈a wajacongregación wajakobekowüyajuwünüjawanü?

• ¿Depakuenia j̈amü jitsipame neyawenonaenej̈a nijacongregaciónjawata?

YAPÜTAENAME ITSALIWAISI

Ajena pamatakabi Dioso apoitorobi pijajiwi perajutsinej̈a diezmojawanü, ¿dej̈uajitsia? Yapütaema bajarapaliwaisi yabara.

“¿Dej̈ua yapütaeyaej̈ana Bibliabaj̈uto diezmo yabara?” (Ruka Internet-jawata jw.org).

Dioso Pejumeliwaisibaj̈uto jumaitsi j̈ua beitsi pebijiwi, itsiata ¿petiriwa meta itsi tsipae bajarapitsiyajuwünüjawanü?

Paliwaisijawanü jumaitsi Bibliabaj̈uto pematakaponaejawanej̈a yabara congregaciónjawata (Peyajiwitaebo, febrero de 2021)

Yapütaema j̈ua itsi Dioso pijajiwiyajuwünüwi petokaponaenej̈a pebaj̈utonü pijamonae congregaciónpijiwi.

Congo tomarajawata tsana Dioso pejumeliwaisibaj̈utoj̈i (4:25)

Yapütaema pakuenia paitsinü Jehová patatotsipaebaponaewi perajutsiyajuwünüpalatajawanüta.

“¿Deitsi Jehová petotsipaebaponaewi pematamotsinej̈a j̈ua itsi tsabiabi?” (Ruka Internet-jawata jw.org)