LIWAISI 26
¿Dej̈uajitsia jiwi nabejiobiatane, pibisiakuene yawünükanua pairataje?
Itsa pibisiakuenejawanü tokopiapatabiabatsi, itsamonae nayanijobabiaba mapakueniaje: “¿Dej̈uajitsia meta?”. Kajamatabükuenebarüyayaej̈anaena pakuenia Dioso Pejumeliwaisi nakayapütaeyaej̈anaena.
1. ¿Dej̈ua itsi Dowatji pibisiakuene pekopiapatsiaej̈anaenej̈a mapanakuataje?
Dowatji, baitsi Satanás, wekuanatsata Dioso. Bajaraj̈ua itsi bajaraponü itsamonae pejamatabükueneitorobinej̈a. Bajaraj̈uata nej̈ata Adán, Evabeje jumeaebiaej̈ana Dioso pewekuanatsatsiaej̈anaenej̈abeje. Nej̈ata penajumetsünütsiliwaisi jumaitsi Evajawabelia (Génesis 3:1-5). Najamatabüj̈ainaeyaej̈ana Eva, ‘Jehová apopejitsipaejawa pej̈aniakuene bajarapajiwibejenej̈a, baitsi pina jiwi barüya tsipae itsa apojumeyaiyatae Dioso’. Pakujinae Dowatji jumaitsi Evajawabelia “apotüpaemü tsane”, bajaraj̈ua penajumetsünütsiliwaisi. Bajaraj̈uata Bibliabaj̈utota wünürubatsi “penajumetsënëtsinë[kuene]. Jivi ata najumetsënëtsiaexanabiaba” (Juan 8:44).
2. ¿Deitsi nej̈ata Adán, Evabeje?
Jehová pej̈aniakuene rajutabeje Adán, Evabeje. Bajarapajiwibeje j̈aejitsipa natsikejema naekuaijawanü Edén pej̈aniairajawata. Itsiata janiitawetatsibeje pej̈aeyaniwabeje kaenaekuaito (Génesis 2:15-17). Itsiata yapütae atabeje, j̈anebeje. Eva ukuta nej̈ata j̈ane baja, j̈uakujinae Adán ata j̈ane baja (Génesis 3:6). Nej̈ata apojumekowünütsibeje Dioso. Pakujinae Adán, Evabeje anekonijibia ponaponabeje, üpej̈aniakuene itsi tsabiabibeje. Itsiata baitsi jane yapütae atabeje, pibisiakuene ej̈anabeje. Bajarapakuenia pejamatabükueneta nawekuanatsatabeje Dioso pijakuenejawanüwekua. Bajaraj̈uata toayapübejetsibeje daj̈itakuene (Génesis 3:16-19).
3. ¿Depakuenia nakanabejiobiataeyaej̈ana j̈ua itsibeje Adán, Evabeje?
Adán, Evabeje nanekonitabeje Diosojawabelia. Daj̈itatsi pitsapatsi Adán, Evabejejawawerena, bajaraj̈uata pibisiakuene baej̈anatsinua. Bibliabaj̈utojawata jumaitsi: “Copiaya caenë, Adánpijinë, pibisiacuene exana. Nexata mapanacuataje daxitajivi pibisiacuene pexanaejavanexa, taxuxuaba. Taxuxuabanua jivi petëpaejavanexa. Nexata jivi petëpaejava, yacaëjëpa daxitanacuapijivijava” (Romanos 5:12).
Nej̈ata, ¿dej̈uajitsia nabejiobitatsi? Tsipaji itsajawata, pibisiakuenejawanü itapetatsi. Itsajawata pijinia, itsajiwiyo pibisiakuene itapeta. Itsajawata, pibisiakuene jematsia nakatokopiapata, apokopiaewetsinejewatsi (lebare Santiago 4:13, 14).
KANAÜJÜTSIANATSI
Yapütaenatsi pakuenia nakatokopiapatabiaba piabejekuenejawanü Dioso apopejamatabükueneta, yapütaenatsinua pakuenia Dioso jamatabükueneitsi penabejiobiataewi yabara.
4. ¿Deponü meta pejamatabükueneta nabejiobiatanetsi?
Jiwimonae najamatabüj̈ainabiaba Dioso Pematakaitorobikuene mapanakuataje. ¿J̈aniajai meta bajaraj̈ua? Pataema VIDEOJAWA.
Palebare Santiago 1:13; 1 Juan 5:19, panelebikujinae panabarükuaikuaijamü tsane paliwaisi yabaraje:
¿Dioso meta pejamatabükueneta nabejiobiatatsi?
5. Dowatji matakaitoroba panakuaje
Palebare Génesis 3:1-6, panelebikujinae panabarükuaikuaijamü tsane paliwaisianü yabaraje:
¿Depapenajumetsünütsiliwaisi jumaitsi Dowatji? (Pataema tsikiriitanetoyobeje 4, 5).
¿Depakuenia Dowatji yamaj̈üitojoroba jiwi pibisiakuene pekanaüjütsinej̈a Jehová yabara?
Dowatji yapütaeyaej̈ana pakueniaje: “Jiwi raja aponamatawenonae Jehová pematakaitorobijawatsi”. ¿J̈aniajai meta bajaraj̈ua?
Palebare Eclesiastés 8:9, panelebikujinae panabarükuaikuaijamü tsane paliwaisi yabaraje:
Pakujinae jiwi wekuanatsata Jehováwekua, bajaraponü apomatakaitorobi panakuaje. ¿Depakuenia nej̈ata jiwi jinawanapa?
A. Adán, Evabeje ponaponabeje pej̈anianakuata anekonijibinejewa, itsiata penamuj̈unaewetsij̈ae Dowatji nawekuatsata Jehováwekua.
B. Pewekuanatsatsikujinaebeje Dioso, daj̈itanakuapijiwi pibisiakuene ej̈anabiaba, nabejiobiataebiaba, tüpabiabanua.
D. Jehová ajibiaej̈anaena pibisiakuenejawa, penabejiobiataejawa, petüpaejawanua. Jiwimonae jinawanapaena pej̈anianakuata anekonijibinejewa.
6. Jehová tsiatanetsi wajanabejiobiataejawa
¿Dioso meta jamatabüenatsi wajanabejiobiataej̈ae? Yapütaema j̈ua yakinabeje peyanakuaewetsinü Davidpijinümi, apóstol Pedropijinümi ata. Palebare Salmo 31:7; 1 Pedro 5:7, panelebikujinae panabarükuaikuaijamü tsane paliwaisi yabaraje:
¿Dejamatabüitsimü j̈amü neyapütaej̈ae Jehová petsiatanejawatsi wajanabejiobiataejawa?
7. Dioso ajibiaej̈anaena daj̈itaj̈uajawanü nakanabejiobiataeyaej̈ana
Palebare Isaías 65:17; Apocalipsis 21:3, 4, panelebikujinae panabarükuaikuaijamü tsane paliwaisi yabaraje:
Jehová najumekapanepaeya jumaitsi pakuenia ajibiaej̈anaena daj̈ita j̈uajawanü nakanabejiobiataeyaej̈ana, j̈anebiananua daj̈itakuene. ¿Kajamatabükuenebabata bajarapaliwaisi? ¿Dej̈uajitsia?
¿Yapütaneme baja?
Dowatji jumaitsi penajumetsünütsiliwaisi Jehová yabara. Bajaraponü wünübijiana Jehová, tsipaji jumekowünütsiaej̈ana apopeyapütaejawa Pematakaitorobijawa j̈aniawaetsia. Itsiata Jehová nawünüj̈anetsiaej̈anaena pakujinae baja jiwi aponabejiobiatae tsane. Bajarapakuenia Jehová nakayapütaeyaej̈anaena übajaraponü pekuenekaüjüpaejawatsi pematakaitorobinej̈a. Penawünüj̈anetsiaej̈anaejawa Jehová pepo pej̈aniakuene daj̈itakuenewekua (Mateo 6:9, 10).
ITSAMONAE BAJUMAITSI: “Dioso nakaej̈ana panakuataje wajanabejiobiataenej̈a”, jai.
¿Dejumaitsimü tsipae?
PALIWAISI BAJA YAPÜTANETSI
Dowatji, Adán, Evabeje pejamatabükueneta panakua yawünüka pibisiakuene. Jehová tsiatanetsi wajanabejiobiataejawa, bajaraj̈uata bepijia ajibiaej̈anaena pibisiakuene.
Najamatabünapire
¿Depapenajumetsünütsiliwaisi jumaitsi Dowatji Evajawabelia?
¿Depapibisiakuene nakatokopata Adán, Evabeje pejamatabükueneta?
¿Depakuenia yapütanetsi Jehová petsiatanejawatsi wajanabejiobiataejawa?
YAPÜTAENAME ITSALIWAISI
Yapütaename pakuenia jumaitsi Bibliabaj̈utota jiwi pijanekoni yabara.
“¿Dejumaitsi penekoni yabara?” (Ruka Internet-jawata jw.org)
Yapütaename bebeliayo j̈ua Dowatji itsi Edénjawata.
“¿Dej̈uajitsia meta Dioso nakatokopata wajanabejiobiataenej̈a?” (Peyajiwitaebo, 1 de enero, 2014)
Yapütaename paliwaisi judiowi penabejiobiataekuene yabara.
Taema pakuenia itsanü toayapübeje atatsi, yapütane baja j̈aniawaetsia peponaponaenej̈a.