¿Dejamatabükueneitsi nej̈ata Jehová?

Jehová itsa kuenekanaüjütame, ¿dej̈ua katsijamatabüpata? ¿J̈amünej̈a Jehová Pinijijamatabükuenenü, itsiata meta tajü kawekuaponapona, pakuenia tulupu nakuaitoboj̈otatsia tsipae? Itsamonaenej̈a, Jehová betsitayamaj̈ükueniatsi. Itsiata, ¿Jehová meta nej̈ata pepokuene depitsinü? Bibliajawata kayapütaeyaej̈anaena Jehová pakuenebeje j̈aina, yapütaenamenua bajaraponü pekaasiwakuene.

1. ¿Dej̈uajitsia Dioso apotaetsi?

“Dioso cajena apo vajataenë” (Juan 4:24). Dioso waj̈aitsi apojüpaetsi tsipaji bajaraponü apowajataenü. Dioso ponapona atjübütatsia, waj̈aitsi bajaraj̈uata apotaetsi.

2. ¿Depakuenebeje j̈aina Jehová?

Jehová apotae atatsi, itsiata itsa kueneyapütanetsi, nej̈ata bitso asiwa tsanetsi. Bibliajawata jumaitsi: “Dioso raja asiwa pexaniacuene pexanaewi. Pamonae Dioso jumecowënëta, bajarapamonae Dioso apoxuabi tsane” (Salmo 37:28). “Dioso jivi pitaxutotsoniataenëcuene” pamonae bejiobiaej̈anatsi (Santiago 5:11). “Pamonae bitso najamatabëxaina, Dioso jamatejemaya-exanabiaba bitso penajamatabëxainaejawamiwecua” (Salmo 147:3). Pamonae pibisiakuene itsi, jamatabükuenebejiobitatsi Jehová (Génesis 6:5, 6). Pamonae pej̈aniakuene itsi, jamatabükuenebarüyayaej̈anatsi (Proverbios 27:11).

3. ¿Depakuenia Jehová najamatabükueneitajüta wajanakaasiwakuene?

Jehová wajanakaasiwakuene bitso j̈anepana daj̈itakuenewekua. “Dioso bitso asiva daxita jivi” (1 Juan 4:8). Jehová nakayapütaeyaej̈ana Bibliajawata wajanakaasiwakuene, bajaraj̈uata nakobekowüitajüta daj̈itajiwijawabelia (lebare Hechos 14:17). Kanaüjüre pakuenia bajaraponü nakaej̈ana: nakarajuta wajataenej̈a pej̈aniakuene, barüyaya wajajumetaenej̈a wajianü, wajaüjünenej̈a pej̈aniapej̈aejawa. Bajaraponü bitso jitsipa barüyaya wajajinawanapaejawa.

KANAÜJÜTSIANATSI

4. Espíritu santo raja Dioso pesaü

Jiwitsi wajakobeta nakuenebatsi, Jehová kanakueneba pijaespíritu santo. Itsamonaenej̈a, espíritu santo toDiosotsi, itsiata raja espíritu santo Dioso pesaü. Bajaraponü pijaespíritu santo kanakueneba daj̈itakuene pej̈anaenej̈a. Palebare Éxodo 31:3; Lucas 11:13, panelebikujinae panabarükuaikuaijamü tsane paliwaisi yabaraje:

• Dioso jamatabükuenekaüjüpaeyaej̈ana pamonae wajütatsi pijaespíritu. ¿Espíritu santo meta nej̈ata beDiosokuenia, itsa jume, meta Dioso pesaü? ¿Dej̈uajitsia bajarapakuenia jumaitsimü?

Jehová pijaespíritu kanakueneba peitsinej̈a pinijikuenejawanü. Palebare Salmo 104:30; 2 Pedro 1:20, 21, panelebikujinae panabarükuaikuaijamü tsane paliwaisi yabaraje:

• ¿Deitsi nej̈ata Jehová pijaespíritu santota?

5. Jehová pekuene nakatsitaj̈anepana

Moisés petonakuenebinü ata Jehová, jamatabüyapütane j̈aniawaetsiakuenia bajaraponükuene. Bajaraj̈uata jumaitsi Jehovájawabelia: “Xaniawaetsia netsitajëre tacato-exanaenexa nejitsipaecuenia, aponejitsipaecuenia ta-exanaeyaniwa” (Éxodo 33:13). Nej̈ata Jehová nakuenetsipaeba Moisésjawabelia. Palebare Éxodo 34:4-6, panelebikujinae panabarükuaikuaijamü tsane paliwaisibeje yabaraje:

• ¿Jehová depakuene yabara tsipaeba Moisésjawabelia?

• ¿Dej̈ua Jehová yabara bitso katsitaj̈anepana?

6. Jehová jiwi siwabüjai

Bajayata Dioso pijajiwimi, hebreowünüwi, amoneya petonakuenebiwi Egipto nakuapijiwi. ¿Jehová nej̈ata dejamatabükueneitsi pijajiwi penabejiobitaej̈ae? Pajumetaema AUDIOJAWA, bajarapaliwaisi palebaponaenamenua Éxodo 3:1-10 Bibliajawata. Panelebikujinae panabarükuaikuaijamü tsane paliwaisibeje yabaraje:

AUDIOJAWA: Jehová pijajiwi itsa nabejiobiatane, tsiatanetsi (2:45)

• ¿Dej̈ua kayapütaeyaej̈ana bajarapaliwaisi Jehová yabara pakujinae tsiatanetsi jiwi penabejiobiataej̈ae? (Pataema tsikiriitanetoyo 7, 8 yajawa).

• ¿Jehová meta pepakuene jiwi jamatabüyawenona? ¿Bajara itsi meta nej̈ata tsipae?, ¿dejumaitsimü?

7. Jehová kueneyapütanetsi pekobekowü wajataej̈ae

Jehová nakayapütaeyaej̈ana bajaraponükuene daj̈ita pekobekowü wajataej̈ae. Pataema VIDEOJAWA. J̈uakujinae palebare Romanos 1:20, panelebikujinae panabarükuaikuaijamü tsane paliwaisi yabaraje:

VIDEOJAWA: Jehová pekobekowü nakayapütaeyaej̈ana wajanakaasiwakuene: Jiwi peperabüto (1:57)

• ¿Dej̈ua kayapütaeyaej̈ana itsa taneme Jehová pekobekowü?

PALIWAISI BAJA YAPÜTANETSI

Jehová kaeto ata apotaetsi, kajena pepo Pej̈aniakuenenü. Bajaraponü bitso nakaasiwa.

Najamatabünapire

• ¿Dej̈uajitsia Jehová apotaetsi?

• ¿Dej̈ua nej̈ata espíritu santo?

• ¿Jehová depakuenebeje j̈aina?

YAPÜTAENAME ITSALIWAISI

Yapütaename cuatro pakuenebeje Jehová yabara.

“¿Dioso nej̈ata dejamatabükueneitsi?” (Peyajiwitaebo, número 1, 2019)

Yapütaename pakuenia Jehová daj̈itajawa apoponaponae.

“¿Jehová meta nej̈ata daj̈itajawa ponapona?” (Ruka Internet-jawata jw.org)

Yapütaename j̈ua yabara Bibliajawata jumaitsi comparaciónkuenia espíritu santo raja Dioso “bepekobekuenia”.

“¿Dej̈ua nej̈ata espíritu santo?” (Ruka Internet-jawata jw.org)

Pitaj̈utotsükünaenü apojumekowünütsi Jehová pewetsijawatsi. Lebianame j̈ua yabara bajaraponü jumej̈aniatane.

“Aekonoj̈ae baja jamatabükueneyawenonajü itsamonae” (Peyajiwitaebo, 1 de octubre, 2015)