Yemboe 6
¿Yaechayetara omano vae reta?
1. ¿Oikoveyetara omano vae reta?
Jesús oiko ɨvɨpe yave iamigo Lázaro omano. Kuae oikose Betaniape metei tëta köi opɨta Jerusaléngüi. Jesús oväe yave Lázaro irundɨ arama omano vae. Jae ojo tɨvɨa kotɨ Marta jare María ndive, Lázaro jeindɨ reta. Javoi jeta oyemboatɨ. ¡Kërai yaera oyerovia Marta jare María oecha Jesús omopüaye ikɨvɨ! Emongeta Juan 11:21-24, 38-44.
Ñee ikavi vae Bibliape oyekuatía jae oikoveyeta omano vae reta. Marta iyemboe rupi oikuaa Jehová omoingoveyeta omano vae reta oikoye vaerä ɨvɨpe. Emongeta Job 14:14, 15.
2. ¿Mbaepa oasa omano vae reta ndive?
Tumpa jei Adánpe: “Ɨvɨkúi ko nde, jare ɨvɨkuirä ko reo yeta” (GÉNESIS 3:19)
Tumpa yandeapo ɨvɨkúigüi (Génesis 2:7; 3:19). Mbaetɨko ñaneä yanderete pɨpe oikove oiko vae ñamano yave. Yandeko ɨvɨ pegua mbaetɨ ɨvate pegua. Ñamano yave ñaneäputuu omanovi jare opama yandeyemongeta reta. Mbaetɨma yayandu ani yaiporara. Jaeramo, Lázaro opüaye yave, mbaetɨ imiari mbae oasa jae ndive omano yave, echa omano vae reta mbaetɨ etei mbae oikuaa. Emongeta Salmo 146:4 jare Eclesiastés 9:5, 6, 10.
Amogüe reta güɨrovia Tumpa oiporarauka omano vae reta tata guasu pe, ërei jókuae mbaetɨko añetete. Yaechama omano vae reta mbaetɨko oikuaa mbae oasa vaere. Jókuae oporomboe vae yaiporara tata guasupe iyapueteko jare omongɨa Tumpa jee. Echa jae ngaraa etei oyemongeta jökorai, Jehová oyuguaruko kuae. Emongeta Jeremías 7:31.
Emae video ¿Mbaepa oasa ñamano yave?
3. ¿Ipuerepa omano vae reta imiari yande ndive?
Omano vae reta mbaetɨ ipuere imiari ani oendu (Salmo 115:17). Ërei, oime amogüe ángel pochɨ vae oñemojaanga omano vae reta rami jare imiari tëtara reta ndive (Judas 6). Jaeramo, Jehová jei agüɨye ñanemiari omano vae reta ndive. Emongeta Deuteronomio 18:10, 11.
4. ¿Kia retapa oikoveyeta?
Jeta yae omano vae reta oikoveyeta ɨvɨpe. Amogüe yepetëi mbaetɨ oikuaa Jehová jare oyapo ikavimbae vae oikoveyeta. Emongeta Salmo 37:29 jare Hechos 24:15.
Oikoveye vae reta ipuereta oyemboe añetete vaere Tumpa regua, jare oyeapɨsaka Iñeere rupi oechaukata güɨrovia Jesúsre (Apocalipsis 20:11-13). Jökorai oyapo vae reta oiko aveita ɨvɨpe. Emongeta Juan 5:28, 29.
5. ¿Mbaepa yandemboe Jehováre?
Yaikuaa Jehová omoingoveyeta omano vae reta yave, yaecha kërai yae yanderaɨu jare ipɨakavi yande ndive. Tumpa ombou Taɨ omano vaerä yanderé ramo yandepuere ñaäro kuae ikavi yae vae. Jare nde, ¿kiapa reipota reecha oikoveye yave? Emongeta Juan 3:16 jare Romanos 6:23.