¿Këraipa yandemborɨ Biblia yemboarakuaa reta?

1. ¿Maerapa oyeechaukata yandeve kërai yaiko vaerä?

Jehová yandeApoa yandeapɨraako arakuaape. Jae yanderaɨu jare oyemoambeko yanderé, mbaetɨ yandeapo yaiko vaerä jesembae (Isaías 29:16). Michia reta rami oeka tu oipoko oguata kavi vaerä, yande yaekatako Tumpa oechauka yandeve kërai yaiko vaerä (Isaías 48:17, 18). Tumpa ipɨakavi reve omee yandeve Biblia yemboarakuaa reta yandemborɨ vaerä. Emongeta 2 Timoteo 3:16.

Jehová omee yandeve iley jare iyemboarakuaa yandemboe kërai yaiko kavi vaerä jare mbae yayapota yandemboyekou avei vaerä. Jae yandeApoa ramo pɨajorɨ reve yaeyatako jaeño oechauka yandeve yanderaperä. Emongeta Salmo 19:7, 11 jare Apocalipsis 4:11.

2. ¿Këraipa yandemborɨ Biblia yemboarakuaa reta ikavi yaiko vaerä?

Yemboarakuaa reta yandemborɨ opaete peguarä, ërei ley reta amogüe peguaräño (Deuteronomio 22:8). Yaecha vaerä kërai yandemborɨ yemboarakuaa reta yayemongetatako jese jökorai yayapo vaerä (Proverbios 2:10-12). Yayemongeta kuaere: Biblia omboe yanderekove jaeko mbae tuicha vae Tumpa omee yandeve vae. ¿Këraipa kuae yaikuaa yave yandemborɨ? Kuae yandemboe yayangarekotako yanderekovere jare ïru retare yandeparavɨkɨpe, yanderëtape ani ïru mbae yayapo yave, agüɨye vaerä oime mbaesusere. Emongeta Hechos 17:28.

3. ¿Mbae nunga yemboarakuaapa jae tuichagüe yae vae?

Jesús jei oime mokoi yemboarakuaa tuichagüe yae vae. Tenondegua vae oechauka yande yaiko yaikuaa vaerä Tumpa, yaaɨu jare yayapo vaerä jae oipota vae. Ñanemaendúa aveitako kuaere ndei yaiparavo mbove mbae yayapota vae (Proverbios 3:6). Körai oyapo vae reta oyemboya katuta Tumpare, oyeroviata jare oiko aveita. Emongeta Mateo 22:36-38.

Yemboarakuaa mokoia yandemborɨ yayereraja kavi vaerä yanderapicha ndive (1 Corintios 13:4-7). Yaiko kuae yemboarakuaa jei rami yave ñamomoe ñaï yandeRu. Emongeta Mateo 7:12 jare 22:39, 40.

4. ¿Këraipa yandemborɨ Biblia yemboarakuaa reta?

Yemboarakuaa reta oechauka tëtara retape mbae oyapota yogüɨreko kavi vaerä jare oyoaɨu avei vaerä (Efesios 4:32; Colosenses 3:12,14). Jare oime metei yemboarakuaa omborɨ yae vae tëtara reta, echa omboe omenda vae yogüɨreko aveitako metei rami. Emongeta Génesis 2:24.

YandeRu Iñee yemboarakuaa ñanemborɨ yayangareko vaerä yandembaembae retare jare yayangareko vaerä yanderé oime yave ñanemoambeko vae. Ñamojaanga: jeta mbaravɨkɨ rendape, mbaravɨkɨ iya reta oipota kia reta oyapo Tumpa omboarakuaa vae rami, mbaetɨ imaeñomi vae jare iparavɨkɨse vae (Proverbios 10:4, 26; Hebreos 13:18). Tumpa Iñee yandemboevi yayeroviatako ñanoima vaereño, yepetëi mbaetɨ jeta mbae ñanoi jare yambotenondetako Jehová opaete mbae retagüi. Emongeta Mateo 6:24, 25, 33 jare 1 Timoteo 6:8-10.

Yaiko Tumpa Iñee jei rami yave ñanemborɨ yaikovekatu vaerä. Echa, jei agüɨye vaerä yandesavaɨpo, ërei yaenduä kuae yave ipuereko yandembaerasɨ ani yasusere (Proverbios 14:30; 22:24, 25; 23:20). Iñeepe jei yandepuere yau bebida alcohólica, ërei ngaraako yaasa ete yau (Salmo 104:15; 1 Corintios 6:10).Tumpa Iñee yemboarakuaa ikavi yae yandeve guarä, echa yandemboe yayangareko vaerä yayemongeta vaere mbaetɨ yayapo vaereño (Salmo 119:97-100). Ërei cristiano añetete vae reta mbaetɨko oyapo kuae ikavi oiko vaeräño, oyapoko yandeRu Jehová oaɨu ramo. Emongeta Mateo 5:14-16.