¿Këraipa ndepuere reyemboya Tumpare?

1. ¿Oendupa Tumpa opaete yerure?

Tumpa oipota yayemboya jese yerure rupi (Salmo 65:2). Ërei, jókuae oipotaä jei jae oendu opaete yerure. Tumpa Iñee jei kuimbae ipɨakaviä jembirekope yave, yavaita Tumpa oyeapɨsaka iyerurere (1 Pedro 3:7). Jare Israel pegua reta oyapose ikaviä vae, Tumpa mbaetɨ oyeapɨsaka iyerurere. Ërei, yandeRu oendu kia ipɨatɨtɨ reve oeya jekokaviä jare oyerovaye ikotɨ. ¡Añetete ikavi yaeko yandeRu oyeapɨsaka yanderé yave! Emongeta Isaías 1:15 jare 55:7.

Emae video ¿Oendupa Tumpa opaete yayerure vae?

2. ¿Këraitapa yayerure Tumpape oendu vaerä?

Yerure rupi yaechaukavi yandeadoración, jaeramo Jehová yandeApoapeño yayerureta (Mateo 4:10; 6:9). Jare opaete yandeyoa ramo yayeruretako Jesús jeere, echa jae omano yandeyoare. Jehová oipotaäko yamboaɨkuere yae metei vaeño ani yamongeta yerure oyekuatiagüe. Jaeko oipota ñanemiari chupe yandepɨa iyɨvɨtegüi. Emongeta Mateo 6:7 jare Filipenses 4:6, 7.

YandeApoa oendu yandeyerure yepetëi kirirïpe yayapo (1 Samuel 1:12, 13). Jae oipota yayerure avei opaete ara rupi, ndei yake mbove, yapüaye yave, ndei yakaru mbove jare mbaeavai rupi yaasa yave. Emongeta Salmo 55:22 jare Mateo 15:36.

3. ¿Maerapa cristiano reta oyemboatɨ?

Ara ñavo yaikoma güɨroviambae vae ipɨtepe jare iporoyóyai Tumpa Iñeere vae. Kuae reta mbaetɨ ñanemoatä ngatu yayemboya vaerä Tumpare (2 Timoteo 3:1, 4; 2 Pedro 3:3, 13). Jaeramo, ikaviko yayemboatɨ cristiano añetete vae reta ndive ñañomoäta ngatu vaerä. Emongeta Hebreos 10:24, 25.

Yande yaipota yayemboya Tumpare yave, yayemboatɨtako oaɨu Tumpa vae ndive. Testigo de Jehová yemboatɨ reta ikavi yae ñañomomɨ̈rata vaerä. Jokope ñaväeta cristiano oñemomɨ̈rata oyapo vaerä Tumpa oipota vae, kuae ñanemokɨ̈reɨta yayapo vaerä ikavi vae. Emongeta Romanos 1:11, 12.

4. ¿Këraipa ndepuere reyemboya Tumpare?

Reyemboyata Tumpare reyemongeta opaete reyemboe Iñeere yave. Eyemongeta oyapo vaere, iarakuaare jare ikavigüe jei omeeta yandeve vaere. Reyerure jare reyemongeta ndepɨape yave, reechata kërai yaeko Tumpa mboroaɨu jare iarakuaa. Emongeta Josué 1:8 jare Salmo 1:1-3.

Ndepuereta reyemboya Tumpare jaeño rerovia jese yave. Mborogüɨrovia temitɨ ramiko, okuakuaa vaerä yamboɨutako. Jaeramiñovi yandeporogüɨrovia okuakuaa vaerä yamboɨu aveita Tumpa Iñeere. Ndeporogüɨrovia ipɨ̈rata vaerä, reyemongetata ñotaiko maera rerovia Biblia omboe vaere. Emongeta Mateo 4:4 jare Hebreos 11:1, 6.

5. ¿Mbae ikavi vaepa reupitɨta reyemboya Tumpare yave?

Jehová oyemoambeko oaɨu chupe vae retare. Jare jae oikatu oyangareko jese reta oime yave ipuereta vae ombopia tape ikavi vaegüi jare omokañɨ iporogüɨrovia (Salmo 91:1, 2, 7-10). Jae oechauka yandeve kërai yaiko vaerä jare jei mbae yayapota yaikovekatu jare yayerovia vaerä. Emongeta Salmo 73:27, 28 jare Santiago 4:4, 8.