¿Mbaepa jei Biblia oasata Religión retagüi?

1. ¿Ikavipa opaete religión reta?

Opaete religión retape oime ipɨakavi vae. Yandemboyerovia yaikuaa Tumpa oecha jare oyemoambeko jese retare. Ërei, yandembopɨatɨtɨ yaecha yave kërai oyeporu religión oyeapo vaerä jeta mbae ikaviä vae (2 Corintios 4:3, 4; 11:13-15). Jekuaeño yaendu amogüe religión pegua reta omborɨ terrorismo, oyuka japicha política jeko pegua ani jëtaguasuä ramo, ojo ñerarope jare oyuvanga katu michiare. ¡Kuaeko ombopɨatɨtɨ yae ipɨakavi jare güɨrovia Tumpare vae! Emongeta Mateo 24:3-5, 11, 12.

Religión añetete vae omboete Tumpa, ërei religión iyapu vae omboarasɨ. Religión iyapu vae omboe jeta mbae mbaetɨ oime Tumpa Iñeepe, jei apu reta Tumpare jare omano vae regua. Ërei yandeRu oipota yaikuaa añetete vae jesegua. Emongeta Eclesiastés 9:5, 10 jare 1 Timoteo 2:3-5.

2. ¿Mbaepa jei Biblia oasata religión retagüi?

Jókuae jeiño oaɨu Tumpa, ërei oaɨu oï Satanás imundo ngaraa ombotavɨ yandeRu (Santiago 4:4). Tumpa Iñeepe oyeenɨi opaete religión iyapu vae “Babilonia Guasu”, echa ɨma tëta Babilonia jee vaepe iyɨpɨ religión iyapu vae, ɨporu guasu Noé iara ou güire. Michima oata Tumpa opa omokañɨ vaerä religión oporombotavɨ jare omborereko asɨ katu vae reta. Emongeta Apocalipsis 17:1, 2, 5, 16, 17 jare 18:8.

YandeRu Jehová oikuaa oime vɨteri ipɨakavi vae religión iyapupe. Jaeramo, jae omboatɨ reta omboe añetete Iñeepe oï vae rupi, körai ipuereta oë religión iyapugüi. Emongeta Miqueas 4:2, 5.

3. ¿Mbaepa oyapota ipɨakavi vae?

Jehová omborɨ oipota vae oikuaa añetete vaere jare oyapo ikavi vae. Jae omokɨ̈reɨ reta oë vaerä religión iyapugüi. Añetete oaɨu Tumpa yave, oipoepɨtako jeko omboyerovia vaerä. Emongeta Apocalipsis 18:4.

Jesús omano güire, apóstol reta oikuaauka ñee ikavi vae jare jeta ipɨakavi vae oipɨɨ kuae yave oyerovia jare oipota oikuaa katu. Jehová omboe reta kërai oiko vaerä yerovia reve jare omoï jenondepe jeta mbae ikavi vae oupitɨ vaerä. Yande yayapotakovi jae reta oyapo rami, yaikuaa katuta ñee ikavi vaere jare yambotenondeta Jehová. Emongeta 1 Tesalonicenses 1:8, 9 jare 2:13.

Jókuae oeya religión iyapu vae jare oike religión añetete vae omboyerovia yae Jehovápe. Kuae reta oiko Jehová iamigo rami, oyoaɨu päve metei tëtara rami jare oäro ñogüɨnoi oiko avei vaerä. ¿Ndepa reipota kuae yekou? Emongeta Marcos 10:29, 30 jare 2 Corintios 6:17, 18.

4. ¿Mbaepa oyapota Tumpa yaiko päve vaerä yerovia jare pɨagüive reve?

Jehová opama omokañɨ religión iyapu vae reta yave, yaikota pɨagüive reve ɨvɨpe. Echa ngaraama oime oporombotavɨ ani oporomoñoraro vae. Opaete ɨvɨpe ñogüɨnoi vae reta omboete päveta Tumpa añetete vaeño. ¡Ikavi yaeko Tumpa omoërakua yandeve vae! Emongeta Apocalipsis 18:20, 21 jare 21:3, 4.