¿Këraipa Tumpa omboatɨ jembiókuai reta oyapo vaerä opaete sɨmbi rupi kavi?

1. ¿Mbaepa oyapo Tumpa oyókuai vaerä Israel arakae pegua?

Tumpa oyókuai jare omee iley Israel arakae peguape, Abrahán iñemuña reta, oyapo reta vaerä opaete sɨmbi rupi kavi. Jehová ombojee “Israel” jare oikuaauka Iñee jare këraita omboete (Salmo 147:19, 20). Jayave opaete ɨvɨ pegua ipuereta oupitɨ ikavigüe vae. Emongeta Génesis 22:18.

Tumpa oiparavo Israel pegua reta omombeu vaerä jesegua. Israel arakae pegua oasagüe vae oechauka oyeapo yave Tumpa Iñee jei rami yaupitɨ ikavigüe vae (Deuteronomio 4:6). Jae reta rupi jeta ipueretavi oikuaa Jehová. Emongeta Isaías 43:10, 12.

2. ¿Mbaepa oyeókuai Cristo jemimboe reta oyapo vaerä?

Israel arakae pegua jekokaviä ramo Jehová oipoepɨka Cristo jemimboe reta ndive jembiokuairä (Mateo 21:43; 23:37, 38). Jaeramo, Cristo jemimboe reta oyeókuai omoërakua vaerä Jehová Iñee. Emongeta Hechos 15:14, 17.

Jesús oechauka jemimboe retape kërai omoërakua jare omboe vaerä Tumpa Iñee opaete ɨvɨ rupi (Mateo 10:7, 11; 24:14; 28:19, 20). Michi peguañoma opa vaerä ara pochɨ vae reta jare Tumpa Iñee oñemoërakua oï opaete ɨvɨ rupi, kuae ngaraa oyemboyovake. Jehová omboatɨma jeta yae vae opaete tëtaguasu pegua religión añetete vaepe (Apocalipsis 7:9, 10). Cristo jemimboe reta oyapo opaete sɨmbi rupi kavi oyeókuai rami, jaeramo ipuere oyomborɨ jare oñomoäta ngatu. Jare opaete ɨvɨ rupi, metei ramiñoko yemboe oñemee vae iyemboatɨ retape. Emongeta Hebreos 10:24, 25.

3. ¿Këraipa omboɨpɨ jembiapo yande arape testigo de Jehová reta?

Año 1870 rupi, oimema oyemboatɨ vae oyemboe vaerä Tumpa Iñeere, jae reta oyevɨtɨapɨ rupi oväe yemboe añetete vae, jeta arasa rupi okañɨ vae. Oikuaa Jesús omboe jemimboe reta oikatu vaerä omoërakua Tumpa Iñeere ramo, jökorai omoërakuavi opaete ketɨ rupi Tumpa Irreino oyapota vaere. Jare año 1931pe oyeenɨi testigos de Jehová. Emongeta Hechos 1:8; 2:1, 4, 11, jare 5:42.

4. ¿Këraipa oparavɨkɨ testigo de Jehová reta?

Cristo jemimboe tenondegua iara retape, oime metei kuimbae yemboatɨ ombotenonde vae congregación reta oï vae rupi. Ërei, jae reta oikuaa kaviko añete ombotenonde vae congregación, jaeko Jesús (Hechos 16:4, 5). Ɨma oyeapo rami, testigo de Jehová reta güɨnoi ombotenonde vae, añave Cuerpo Gobernante jee vae. Kuae kuimbae reta iyarakuaama vae oyangareko sucursal retare opaete ɨvɨre oï vae. Kuae retape oyepoepɨ ore kuatiarɨru jeta ñeepe, oyeapo jare oñemoaimoai ñeerɨru reta oyeekɨ Bibliagüi vae, oyapɨraama 600 ñee reta. Cuerpo Gobernante oiporu Tumpa Iñee omee vaerä yemboarakuaa jare omokɨ̈reɨ vaerä congregación reta opaete ɨvɨ pegua. Añave oasama cien mil congregación reta, jokope oimevi ïru kuimbae ombotenonde vae jare oyangareko mboroaɨu reve Tumpa imbae retare. Emongeta 1 Pedro 5:2, 3.

Testigo de Jehová reta oyapo opaete sɨmbi rupi kavi omoërakua vaerä ñee ikavi vae jare omborɨ vaerä japicha oikuaa Tumpa. Apóstol reta oyapo rami, jae reta omoërakua tëta tëta rupi (Hechos 20:20). Omboevi Tumpa Iñeere oipota oikuaa vae añetete vaere. Ërei jokuaeñoäko, oyoaɨu päve metei tëtara rami jare Tu Jehová oyangareko jese retare (2 Tesalonicenses 1:3). Oñemomɨ̈rata omboyerovia vaerä Tumpa jare omborɨ vaerä japicha ramo, oikoma yerovia katu reve metei tëtara rami. Emongeta Salmo 33:12 jare Hechos 20:35.