Yerure, regalo Tumpa omee yandeve vae

1, 2. a) ¿Maerapa rerovia yerure jaeko metei regalo ikaviete vae? b) ¿Maerapa ikavi yae yaikuaa Biblia yandemboe vae yerurere?

JEHOVÁ “ara jare ɨvɨ iyapoa”, omae yave ɨvɨre, opaete kia reta metei gota ɨ mbaerɨrupe ramiko jesa róvai (Salmo 115:15; Isaías 40:15). Yepetëi yande michi yae aragüi, Salmo 145:18, 19 jei: “YandeYa köiño oï oenɨi vae güi, opaete añetete oenɨi vae güi. Oipoɨu chugüi vae jemimbota ombopota, oenduta vi isapúkai, jare güɨroasayepeta”. ¡Kuae ikavieteko! Jehová, yandeApoa imbaepuere yaete vae oipota köi oiko yandegüi jare oipotavi oendu yandeyerure reta. Jökoraiko, yerure jaeko metei regalo ikaviete Jehová omee vae metei ñavope.

² Ërei, Jehová oenduta yandeyerure reta, yayerure yave jae oipota rami. ¿Këraipa yandepuere yayapo jókuae? Yaecha Biblia jei vae yerurere.

¿MAERAPA YAYERURE JEHOVÁPE?

3. ¿Maerapa ikaviete reyerure vaerä Jehovápe?

³ Jehová oipota reyerure jare nemiari chupe. ¿Këraipa yaikuaa jókuae? Emongetami Filipenses 4:6, 7. Eyepɨayemongeta kuae ñee retare Tumpa oipota reyerure chupe. YandeYa imbaepuere yaete vae oyemoambeko yae nderé jare oipota nemiari kërai reyemosiente vae jare ndembaeavai retare.

4. ¿Këraipa oñemomɨ̈rata ñaneamistad Jehová ndive yayerure avei chupe yave?

⁴ Yerure yandemborɨ ñamomɨ̈rata vaerä ñaneamistad Jehová ndive. Amigo reta oñemomiari ñoi yave ipɨayemongeta retare, iyemoambeko retare jare kërai oñemosiente vae jayave iamistad oñemomɨ̈rata. Jökorai, Biblia rupi, Jehová imiari nde ndive ipɨayemongetare jare omosiente vae jare jeivi oyapota kuri vae. Yerure rupi, jaenungavi ndepuere nemiari avei jae ndive remosiente ndepɨa iyɨvɨtepe vae. Jökorai reyapo yave neamistad Jehová ndive oñemomɨ̈ratata (Santiago 4:8).

¿MBAEPA YAYAPOTA TUMPA YANDEREENDU VAERÄ?

5. ¿Këraipa yaikuaa Jehová mbaetɨ oendu amogüe yerure reta?

⁵ ¿Oendupa Jehová opaete yerure reta? Mbaetɨ. Profeta Isaías iara rupi, Jehová jei Israel iñemuña retape: “Yepe tëi jeta peyerure, che ngaraa aendu. Pepo reta tugüɨ yepeai penoi” (Isaías 1:15). Jáeramo, yayangarekoä yave, ipuereko yayapo mbae yandembosɨrɨ Jehovágüi. Jökorai yave jae ngaraa oendu yandeyerure reta.

6. a) ¿Maerapa ikaviete mborogüɨrovia? b) ¿Këraipa yaechauka ñanoi mborogüɨrovia vae?

⁶ Yaipota yave Jehová oendu yandeyerure reta, yaroviatako jese (Marcos 11:24). Pablo omoësaka: “Mbaetɨ ñanoi mborogüɨrovia Tumpa re yave, ngaraai yamboyerovia. Echa yarovia Tumpa yave, yaroviata oime ko jae jare omboekovia ko oeka vae reta pe” (Hebreos 11:6). Ërei mbaetɨ yaeño ñanoi mborogüɨrovia. Ikaviko yaechauka yandeporogüɨrovia ñaneñeereendu avei Jehovápe (emongeta Santiago 2:26).

7. a) ¿Maerapa ñañemomichi reve jare yemboete reve yayerure Jehovápe? b) ¿Këraipa yaechaukata añete reve yayerure vae?

⁷ Yayerure Jehovápe yave, yayapotako ñemomichi reve jare yemboete reve. ¿Maerapa? Yaja yave yayemongeta vaerä mburuvicha guasu ani presidente ndive, yayemongetata yemboete reve. Jehová Tumpa imbaepuere yaete vae, jáeramo, ñemomichi yae reve jare yemboete yae reve ñanemiarita jae ndive (Génesis 17:1; Salmo 138:6). Jaenungavi ikaviko añete reve yayerure Jehovápe yandepɨa güive, agüɨye yamboaɨkuere yeyé ñee reta (Mateo 6:7, 8).

8. ¿Mbaeyepa yayapota yayerure yave metei mbaere?

⁸ Jaɨkue rupi, yayerure yave metei mbaere, ñañemomɨ̈rata yayapo vaerä jókuae yayerure rami. Echa, yayerure Jehovápe ñanoi vaerä ara ñavo ñamonecesita vae, agüɨyetako yandeakɨ jare agüɨyetako ñaäro Jehová omeeta opaete mbae yandeve, yepetëi yandepuere yaparavɨkɨ. Tätako yaparavɨkɨta jare yayapota oipotagüe mbaravɨkɨ yandepuere yayapo vae (Mateo 6:11; 2 Tesalonicenses 3:10). Yayerure yave Jehovápe yandemborɨ agüɨyema yayapo vaerä ikaviä vae, agüɨye yayapo oipotagüe mbae ipuere oyavɨuka yandeve vae (Colosenses 3:5). Añave yaecha amogüe marandu reta yerurere.

MARANDU RETA YERURERE

9. a) ¿Kiapepa yayerureta? b) ¿Mbaepa yandemboe Juan 14:6 yerurere?

⁹ ¿Kiapepa yayerureta? Jesús omboe jemimboe reta oyerure vaerä körai: “OreRu ara pe reï vae” (Mateo 6:9). Jáeramo Jehovápeñoko yayerureta. Jaenungavi Jesús jei: “Che ko jae tape, añetete vae jare tekove. Mbaetɨ kia ipuere ojo cheRu oïa pe, jaeño cherupi” (Juan 14:6). Jókuae yandemboe yayeruretako Jesús jeere. ¿Mbaepa oipota jei yayerure Jesús jeere? Yaipota Jehová oendu yave yandeyerure reta, ikavieteko yamboete jókuae mbaravɨkɨ ikaviete Jehová omee Jesúspe vae. Yayemboe rami, Jesús ou ɨvɨpe yandereroasayepe vaerä mbaeyoa jare manogüi (Juan 3:16; Romanos 5:12). Jehová oñonovi Jesús juez jare sacerdote tenondegua eterä (Juan 5:22; Hebreos 6:20).

10. ¿Yayetavatɨkatara yayerure yave Jehovápe? Emoësaka.

¹⁰ ¿Yayetavatɨkara yayerure yave? Jehová mbaetɨ jei jökorai yayapo vaerä. Biblia yandemboe yandepuere yayerure Jehovápe yemboete reve, yaguapɨ reve, ñaneäkatindi reve, yayetavatɨka reve jare yayemboɨ reve (1 Crónicas 17:16; Nehemías 8:6; Daniel 6:10; Marcos 11:25). Yayerure yave Jehovápe mbaetɨ omae kërai ñañeñono, ikaviete Jehová peguarä yayerure yemboete reve jare yandepɨa güive. Yandepuere täta katu yayerure jaenungavi kïrii reve, oipotagüe ñaï vae rupi jare ndeimbove yave ani pɨ̈tu yave oipotagüe hora rupi. Yayerure Jehovápe yave yaroviatako jae oendu yandeyerure, yepetëi mbaetɨ kia ave oendu (Nehemías 2:1-6).

11. ¿Mbaerepa yandepuere yayerure Jehová?

¹¹ ¿Mbae mbaerepa yandepuere yayerure? Yandepuere yayerure oipotagüe mbaere ikavi Jehová peguarä vae. Biblia jei: “Tumpa oendu ko yandeve yayerure yave chupe jae jemimbota rupi mbae re” (1 Juan 5:14). ¿Yandepuerepa yayerure yandeyemoambekore? Jökorai. Yayerure Jehovápe yave ñanemiari ñaneamigo añetete vae ndive ramiko. Yandepuere yae Jehovápe oipotagüe mbae ñamosiente vae jare yandepɨayemongeta vae (Salmo 62:8). Yandepuere yayerure omee vaerä yandeve iespíritu santo yayapo vaerä ikavi vae (Lucas 11:13). Jaenungavi yandepuere yaiporu Jehovápe arakuaa yaiparavo kavi vaerä jare yandepuere yayerure ñamomara vaerä yemboavai reta (Santiago 1:5). Yerure rupi ñamoñera Jehová iñɨ̈ro vaerä yandeyoa retare (Efesios 1:3, 7). Jaenungavi yayeruretako ïru retare, ñanerëtara retare jare hermano retare congregación pegua (Hechos 12:5; Colosenses 4:12).

12. ¿Mbaepa yambotenondeta yandeyerure retape?

¹² ¿Mbaepa yambotenondeta yandeyerure retape? Jehová jare jemimbota. Yandepɨa ndiveko ñameeta yasoropai opaete mbae oyapo yandeve vaere (1 Crónicas 29:10-13). Jesús omboe oyerure vaerä jemimboe reta yave, omoësaka mbae ikaviete yayerure yave (emongeta Mateo 6:9-13). Jae jei yayerure yave yambotenondetako Tumpa jee oyemboeteuka vaerä, jókuae oipota jei toyeapo sagrado jare santo. Javoi Jesús jei yayeruretako ou vaerä Tumpa iReino jare oyeapo vaerä Jehová oipota vae opaete ɨvɨ rupi. Yayerurema kuaere yave, yandepuere yayerure ñamonecesita vaere. Yambotenonde yave Jehová jare jemimbota yandeyerurepe, yaechauka mbaeko ikaviete vae yandeveguarä.

13. ¿Mbovɨ tiempopa yandepuere yayerure?

¹³ ¿Mbovɨ tiempopa yandepuere yayerure? Biblia mbaetɨ jei kuae regua. Yandeyerure reta ipuereko puku ani pukuä, amogüe mbaere oasa yave. Ipuereko pukuä yayerure ndei yakaru mbove, ërei ipuereko yayerureta puku ñamee vaerä yasoropai Jehovápe jare ñanemiari yave yandemoambekore (1 Samuel 1:12, 15). Mbaetɨ yaipota puku yae yayerure ïru reta oendu vaeräño, amogüe reta oyapose rami Jesús iara rupi (Lucas 20:46, 47). Jehová peguarä mbaetɨ ikavi jókuae yerure reta. Ikaviete Jehová peguarä yayerure yandepɨagüi.

14. ¿Mbovɨ vesepa yayerureta jare jókuae mbaepa yandemboe Jehová regua?

¹⁴ ¿Mbovɨ vesepa yayerureta? Jehová jei yandeve ñanemiari aveitako jae ndive. Biblia jei: “Peyerure avei Tumpa pe”, “peyerure avei pekueraimbae reve”, peyerure“avei ara rupi jare pɨ̈tu rupi” (Romanos 12:12; 1 Tesalonicenses 5:17; 1 Timoteo 5:5). Jehová oäro oï oendu vaerä yandeyerure. Ara ñavo yandepuere ñamee yasoropai iporoaɨure jare opaete omee yandeve vaere. Jaenungavi yandepuere yaiporu chupe yandemborɨ vaerä, ñanemomɨ̈rata vaerä jare yandembopɨakatu vaerä. Ñanemiari avei Jehovápe yave, jókuae oechauka yerure ikavi eteko yandeveguarä.

15. ¿Opama yerure yave, maerapa yaeta “amén”?

¹⁵ ¿Opama yerure yave, maerapa yaeta “amén”? Ñee amén oipota jei “jökoraiko” jare “jökorai toyeapo”. Jókuae oechauka añetete yayerure vae (Salmo 41:13). Biblia yandemboevi ikaviko yae vaerä “amén”, ñanekïrii reve ani ñaneñee täta reve opama kia oyapo yave yerure, yaechauka vaerä jökorai yaipota oyeapo oyerure vaere (1 Crónicas 16:36).

¿KËRAIPA TUMPA OMBOYEVƗ YANDEYERURE RETA?

16. ¿Añetetera Tumpa omboyevɨ yandeyerure reta? Emoësaka.

¹⁶ ¿Añetetera Tumpa omboyevɨ yandeyerure reta? Jökoraiko. Biblia jei Jehová “oendu” yerure (Salmo 66:19). Jehová oendu yerure reta añetete vae jeta yae kia retagüi jare metei ñavo omboyevɨ.

17. ¿Këraipa Jehová oiporu ángel reta jare jembiokuai reta ɨvɨpe omboyevɨ vaerä yandeyerure reta?

¹⁷ Jehová oiporu iángel reta jare jembiokuai reta ɨvɨpe omboyevɨ vaerä yandeyerure reta (Hebreos 1:13, 14). Jeta kia reta oyerure Tumpape omborɨ vaerä oikuaa Bibliare, javoi metei testigo de Jehová opou ípɨri. Kuae oechauka ángel reta ombotenonde omoërakua vaerä “ñee ikavi vae” opaete ɨvɨ rupi (emongeta Apocalipsis 14:6). Jaeramiñovi, yayerure Jehovápe yandembaeavai retare jare ñamonecesita vaere, javoi yamboresive yemborɨ metei hermano congregación pegua (Proverbios 12:25; Santiago 2:16).

18. ¿Këraipa Jehová oiporu iespíritu santo jare Biblia omboyevɨ vaerä yandeyerure reta?

¹⁸ Jehová oiporuvi iespíritu santo omboyevɨ vaerä yandeyerure reta. Yayerure yave ñamomara vaerä yandembaeavai reta, jae ipuere oiporu iespíritu santo yandemborɨ vaerä jare ñanemomɨ̈rata vaerä (2 Corintios 4:7). Jehová jaenungavi oiporu Biblia omboyevɨ vaerä yandeyerure reta jare yandemborɨvi yaiparavo kavi vaerä. Yamongeta Biblia yave, ipuereko ñaväe metei texto yandemborɨ vae. Jaenungavi Jehová ipuere omokɨ̈reɨ kia omee vaerä metei comentario yemboatɨpe yandemborɨ vaerä. Jare ipuere oiporu amogüe anciano congregaciónpe omongeta vaerä yandeve Biblia jei vae (Gálatas 6:1).

19. ¿Maerapa ipuereko ñamopiensa Jehová mbaetɨ omboyevɨ yandeyerure reta?

¹⁹ Ërei, ámope ipuereko yaparandu yandeyeupe: “¿Maerapa Jehová ndei vɨteri omboyevɨ cheyerure reta?”. Nemaendúa, Jehová oikuaa kërai yave jare kërai omboyevɨta yandeyerure reta. Jae oikuaa kavi ñamonecesita vae. Ipuereko ámope jekuaeñota yayerure, jökorai yaechauka añetete yaipota yayerure vae jare yaechaukata añetete yarovia Jehováre (Lucas 11:5-10). Ámope Jehová omboyevɨ yandeyerure reta jae oipota rami, mbaetɨ yande ñaäro rami. Ipuereko yayerure metei mbaeavaire, yepetëi Jehová mbaetɨ omboai jókuae mbaeavai, ipuereko omee yandeve mɨ̈rata ñamomara vaerä (emongeta Isaías 40:29).

20. ¿Maerapa yayerure aveita Jehovápe?

²⁰ Añetete yerure jaeko metei regalo ikaviete Jehová omee yandeve vae. Yandepuere yarovia jae yandereendu (Salmo 145:18). Jare yayerure avei chupe yave, ñaneamistad oñemomɨ̈ratata jae ndive.