¿Ikavira amee cherekove Tumpape jare ayembobautisa?

1. ¿Mbaepa ndepuere ndepɨayemongeta reyemboe kavima kuae kuatiarɨrure yave?

REYEMBOE ramboeve kue kuatiarɨru, reikuaama jeta mbae añetete vae Bibliare, reikuaama Tumpa jei vae tekove opambae vaere, mbae oasa yande ndive ñamano yave jare esperanza omanogüe oikoveyeta vaere (Eclesiastés 9:5; Juan 5:28; Apocalipsis 21:3, 4). Ipuereko remboɨpɨma reo testigos de Jehová iyemboatɨpe jare rerovia jae retako religión añetete vae (Juan 13:35). Ipuereko neamistad Jehová ndive omboɨpɨma okuakuaa jare reipota reyeokuai chupe. Jáeramo ipuere ndepɨayemongeta: “¿Mbaeyepa ayapota ayeokuai vaerä Tumpape?”.

2. ¿Maerapa oipota oyembobautisa metei kuimbae Etiopíaɨgua?

² Jókuae ipɨayemongeta metei kuimbae Etiopíaɨgua, Jesús iara rupi oikose vae. Ɨmama oasa Jesús oikoveye yave, jemimboe Felipe, omoërakua jókuae kuimbaepe jare oechauka Jesús jaeko Mesías. Kuimbae Etiopíaɨgua oyerovia yae oikuaa vaere jáeramo jei: “Ko oï ɨ; ¿mbae yé pa chemboavai ayembobautisa vaerä?” (Hechos 8:26-36).

3. a) ¿Mbaepa Jesús oyókuai jemimboe reta? b) ¿Këraipa oyembobautisa kavi metei kia?

³ Biblia omoësaka kavi reipota reyeokuai Jehovápe yave, reyembobautisatako. Jesús jei jemimboe retape: “Pemboe opaete tëtaguasu pegua reta cheremimboerä, jare pembobautisa” (Mateo 28:19). Jesús etei oyembobautisa yayapo vaerä jae oyapo rami. Omoinge kavi opaete jete ɨpe, mbaetɨko omoakɨño iñäka (Mateo 3:16). Añave rupi, cristiano oyembobautisa yave, jaeramiñovi opaeteitako jete omoinge kavi ɨpe.

4. ¿Reyembobautisama yave, mbaepa reechauka ïru retape?

⁴ Reyembobautisa yave reechauka ïru retape añetete reipota reiko Tumpa iamigorä jare reipota reyeokuai chupe (Salmo 40:7, 8). Jáeramo ipuereko reparandu ndeyeupe: “¿Mbaepa ayapota ayembobautisa vaerä?”.

ARAKUAA JARE MBOROGÜƗROVIA

5. a) ¿Ndei reyembobautisa mbove mbaepa reyapota? b) ¿Maerapa ikaviete yemboatɨ reta cristianas?

⁵ Ndei reyembobautisa mbove reikuaa kavitako Jehová jare Jesús. Reyemboe Bibliare yave remboɨpɨma reikuaa (emongeta Juan 17:3). Ërei, jokuaeñoäko. Biblia jei renoitako arakuaa añetete vae Tumpa oipota vaere (Colosenses 1:9). Testigos de Jehová iyemboatɨpe ndemborɨta remomɨ̈rata vaerä neamistad Jehová ndive. Kuae ikavieteko agüɨye reata vaerä yemboatɨape (Hebreos 10:24, 25).

6. ¿Mbaepa ikavi reikuaa Biblia regua ndei reyembobautisa mbove?

⁶ Ërei, Jehová mbaetɨ oäro nde reikuaa kavi vaerä opaete Biblia jei vae reyembobautisa vaerä. Jae mbaetɨko oäro kuimbae Etiopíaɨgua oikuaa kavi vaerä opaete Biblia jei vae ndei oyembobautisa mbove (Hechos 8:30, 31). Jekuaeñota yayemboe Tumpa regua jekuae avei pegua (Eclesiastés 3:11). Ërei ndei reyembobautisa mbove, ikaviko reikuaa jare reyapo mbae ikaviete Biblia jei vae (Hebreos 5:12).

7. ¿Këraipa ndemborɨ reyemboe vae Bibliare?

⁷ Biblia jei: “Mbaetɨ ñanoi mborogüɨrovia” yave, “ngaraai yamboyerovia” Tumpa (Hebreos 11:6). Jayave ndei reyembobautisa mbove renoitako mborogüɨrovia. Biblia jei arakaete tëta Corinto pegua reta oendu Jesús jemimboe reta oporomboe vae jare “güɨrovia jare oyembobautisauka” (Hechos 18:8). Jökoraiñovi reyemboe Bibliare ramo ndemborɨma rerovia vaerä Tumpa jei vae jare rerovia vaerä Jesús imano rupi yandeyora mbaeyoa jare manogüi (Josué 23:14; Hechos 4:12; 2 Timoteo 3:16, 17).

NEMIARI ÏRU RETAPE AÑETETE VAE BIBLIA REGUA

8. ¿Mbaepa nemokɨ̈reɨta nemiari vaerä reyemboe vaere?

⁸ Reyemboe ramboeve Bibliare jare reecha kërai ndemborɨ nderekovepe, ndeporogüɨrovia oñemomɨ̈ratatako. Nekɨ̈reɨ ngatuta nemiari ïru retape reyemboe vaere (Jeremías 20:9; 2 Corintios 4:13). Ërei, ¿kia retapepa nemiarita?

9, 10. a) ¿Kia retapepa ndepuereta remboɨpɨ nemiari reyemboe vaere? b) ¿Mbaepa reyapota reipota remoërakua yave congregación ndive?

⁹ Ipuereko reipotata nemiari reyemboe reï vaere nerëtara retape, neamigo retape, nerëta ɨpɨ pegua retape jare ndeparavɨkɨ ïrupe. Jókuae ikavieteko, ërei reyapo yave eyapo ndepɨakavi reve jare remboete reve. Mbegüepe ndepueretama remboɨpɨ remoërakua congregación ndive. Ndepɨayemongeta reikuaa jaekavima reï remoërakua vaerä, ndepuere reyemongeta testigos de Jehová ndemboe Bibliare vaepe jare ere chupe reipota remoërakua Tumpa Iñee regua congregación ndive. Testigo ipɨayemongeta reï kavi jare reiko Biblia jei vae rami yave, pe peyemboatɨta mókoi anciano reta ndive congregación pegua.

¹⁰ ¿Mbaepa oasata jókuae yemboatɨpe? Anciano reta oyemongetata nde ndive oikuaa vaerä reikuaama jare rerovia mbae ikaviete vae Bibliare, jare neñeereendu yave Biblia jei vae jare añetetema reipota reiko testigo de Jehová. Nemaendúa anciano reta oyangareko congregación pegua retare jaenungavi nderé, jáeramo agüɨye ekɨɨye reyemongeta vaerä jae reta ndive (Hechos 20:28; 1 Pedro 5:2, 3). Oasama jókuae yemboatɨ yave, anciano reta omombeuta ndeve ndepueretara remboɨpɨ remoërakua congregación ndive.

11. ¿Maerapa ikaviete yaipoepɨ yanderekove ndei yamboɨpɨ ñamoërakua mbove congregación ndive?

¹¹ Ipuereko anciano reta jei ndeve oime vɨteri amogüe mbae oata reipoepɨ ndei remoërakua mbove congregación ndive. ¿Maerapa ikaviete reipoepɨ vaerä? Echa ñanemiari yave Tumpare ïru reta ndive, yamborepresentako Jehová jare ikaviko ñanoi yandereko kavi yamboete vaerä (1 Corintios 6:9, 10; Gálatas 5:19-21).

EEYA NDEREKO KAVIMBAE VAE JARE EYEROVAYE TUMPA KOTƗ

12. ¿Maerapa yaeyata yandereko kavimbae vae?

¹² ¿Mbaeyepa ndepuere reyapo ndei reyembobautisa mbove? Apóstol Pedro jei: “Peeya peyemongeta ikavimbae vae pepɨa pe penoi vae jare peyerova Tumpa kotɨ, peyoa reta oyemboai vaerä” (Hechos 3:19). ¿Mbaepa oipota jei yaeya ikavimbae vae? Oipota jei yandepɨa kaviä vae yayapose vaere. Ipuereko nde reyapose aguasa, jayave reeyatako jókuae ikavimbae vae. Jaenungavi reyapo avei yave ikavi vae, eeya ikavimbae vae, echa opaete yandeyoa jáeramo ñamonecesita Tumpa iñɨ̈ro vaerä yandeve (Romanos 3:23; 5:12).

13. ¿Mbaepa oipota jei yayerova vae?

¹³ ¿Mbaeyepa yayapota yandembopɨa kaviä yayapose vaere? Apóstol Pedro jaenungavi jei: “Peyerova”. Kuae oipota jei reroɨ̈rotako opaete mbae ikaviä vae reyapose vae jare emboɨpɨ eyapo ikavi vae. Eyepɨayemongeta kuaere: nde reo kiape reikuaaä vaepe. Javoi, reecha reo tape ïkotɨa rupi vae. ¿Mbaepa reyapota? Jayave ndepoki reo, javoi reyemboɨ jare reyerovaye reo vaerä tape ikavi vae rupi. Jökoraiñovi, reyemboe yave Biblia, ndepuereta reikuaa oime amogüe teko ikaviä vae reipoepɨ vaerä. Eñemokɨ̈reɨ reyerova vaerä, kuae oipota jei eipoepɨ jare emboɨpɨ eyapo jupi vae.

EMEE NDEREKOVE TUMPAPE REYAPO VAERÄ JAE JEI VAE

14. ¿Mbaepa reyapota remee vaerä nderekove Tumpape?

¹⁴ Ndei reyembobautisa mbove, eyapo metei mbae ikaviete vae, emee nderekove Jehovápe reyapo vaerä jae jei vae. Remee yave nderekove Jehová peguarä, reyapo metei yerure jare rere chupeño remboeteta jare rembotenondetako jae jei vae (Deuteronomio 6:15).

15, 16. ¿Mbaepa omokɨ̈reɨ kia omee vaerä jekove Tumpape?

¹⁵ Rere yave Jehovápe reyeokuaita chupe vae, jaeko yae rami kia yaipota vaepe yaiko aveita jae ndive. Eyepɨayemongeta kuimbae iporopota ramo opou kuña ípɨri. Kuimbae oikuaa ramboeve kuña, oaɨu yae jare oipota omenda jae ndive. Yepetëi kuae ikaviete oyapo vaerä, kuimbae oipota omenda jae ndive, oaɨu ramo.

¹⁶ Reyemboe ramboeve Jehováre, reaɨu yaeta jare reipotata reyapo jae jei vae opaete ndepɨa ndive. Jókuae nemokɨ̈reita reyerure reyeokuai vaerä. Jesús jei jemimboe retape: “Kia nunga vae ikɨ̈reɨ ojo cherupíe vae, tiñakañɨ iyeugüi” (Marcos 8:34). Ñaneakañɨ yandeyeugüi oipota jei ñaneñeereendu Jehovápe jare jaeñoko yambotenondeta ïru mbae retagüi. Jehová oipota vae ikavieteko nde reipota vaegüi (emongeta 1 Pedro 4:2).

AGÜƗYE EKƗƗYE REYAVƗ YAVE

17. ¿Maerapa amogüe kia reta oipotaä omee jekove Jehovápe?

¹⁷ Amogüe kia reta oipotaä omee jekove Jehovápe okɨɨye ipueretaä oyeokuai kavi chupe ramo. Oipotaä ombopɨatɨtɨ Jehová, ani ipuereko ipɨayemongeta omeeä jekove Jehovápe yave, jae ngaraako ojäa chupe reta oyapo vaere.

18. ¿Mbaepa ndemborɨta agüɨye vaerä rekɨɨye ndepueretaä reyapo Jehová oipota vae?

¹⁸ Ipuereko rekɨɨye ndepueretaä reyapo Tumpa oipota vae, ërei ndeporoaɨu Jehová kotɨ ndemborɨta ngaraama rekɨɨye vaerä. Echa reaɨu ramo, reyapota opaete mbae rere chupe vae (Eclesiastés 5:4; Colosenses 1:10). Ngaraama ndepɨayemongeta yavai reyapo vaerä Jehová jei vae. Apóstol Juan oikuatía: “Yaaɨu yave Tumpa, yayapo iporookuai reta; jare mbaetɨ ko yavai yayapo vaerä iporookuai reta” (1 Juan 5:3).

19. ¿Maerapa rekɨɨyetaä reñemee vaerä Jehovápe?

¹⁹ Mbaetɨtako reiko iyoambae reñemee vaerä Jehovápe. Jae mbaetɨko oäro yayapo vaerä mbae yandepuereä yayapo vae (Salmo 103:14). Jae ndemborɨta reyapo vaerä jupi vae (Isaías 41:10). Eyeko Jehováre opaete ndepɨa ndive jare “jae ndereroatata sɨmbi rupi” (Proverbios 3:5, 6).

EECHAUKA REMEEMA NDEREKOVE JEHOVÁPE REYAPO VAERÄ JAE JEI VAE

20. ¿Mbaepa reyapota reñemeema yave Jehovápe?

²⁰ ¿Reroviapa ndepuerema remee nderekove Jehovápe reyapo vaerä jae jei vae? Reñemeema Jehovápe yave, ndepueretama reyapo ïru mbae ikaviete vae, reyembobautisatako.

21, 22. ¿Këraipa ndepuere reechauka reñemeema Jehovápe?

²¹ Ere metei anciano coordinadorpe congregación pegua reñeemeema Jehovápe jare reipota reyembobautisa. Jae imiarita ïru anciano reta ndive omongetaye vaerä nde ndive amogüe mbae ikaviete vae Bibliare. Jae reta güɨrovia ndepueretama reyembobautisa yave, omombeuta ndeve reyembobautisa vaerä testigos de Jehová iyemboatɨ guasupe. Jókuae yemboatɨ guasupe oimeta metei ñemoñee omoësaka vaerä mbae oipota jei bautismo, jare jókuae hermano oyapota ñemoñee vae, oyapota mókoi marandu yavaimbae opaete oyembobautisata vaepe. Remboyevɨ jókuae marandu reta yave reechaukata ïru vae reta jóvai reñemeema Jehovápe (Mateo 10:32).

²² Jaɨkue rupi reyembobautisata. Omoinge kavi opaete nderete ɨpe. Ndebautismo oechaukata opaetepe reñemeema Jehovápe reyapo vaerä jae jei vae jare joko güive reikoma testigo de Jehová.

¿MBAEPA OMBOJAANGA BAUTISMO?

23. ¿Mbaepa oipota jei: “Pembobautisa cheRu jee re, cheree re jare Espíritu Santo jee re”?

²³ Jesús jei jemimboe retape: “Pembobautisa cheRu jee re, cheree re jare Espíritu Santo jee re” (emongeta Mateo 28:19). ¿Mbaepa oipota jei kuae ñee reta? Oipota jei reikuaa Jehováñoko güɨnoi mbaepuere jare Jesús rupi oyeapota Tumpa oipota vae, jökoraiñovi Jehová oiporu iespíritu oyeapo vaerä jae oipota vae (Salmo 83:18; Mateo 28:18; Gálatas 5:22, 23; 2 Pedro 1:21).

24, 25. a) ¿Mbaepa ombojaanga bautismo? b) ¿Mbaepa yaechata yemboe iyapɨpe?

²⁴ Bautismo ombojaanga metei mbae ikaviete vae. Remoinge nderete ɨpe yave, oipota jei omano jare reeya ndereko indechigüe. Jare reë yave ɨgüi, omboɨpɨ nderekove pɨau reyapo vaerä Tumpa oipota vae. Jökorai reechauka joko güive reyeokuaita Jehovápe. Nemaendúa remeeä nderekove kia reta ipope ani metei organizaciónpe ani metei mbaravɨkɨpe. Remeeko nderekove Jehovápe.

²⁵ Remee nderekove Jehovápe yave ndemborɨta remomɨ̈rata vaerä neamistad Jehová ndive (Salmo 25:14). Kuae mbaetɨko oipota jei kia oyemboautisa yave oyereroasayepema. Apóstol Pablo oikuatía: “Peñemoäta ngatu yae yemboasa penoi vae rupi peipoɨu pemboete reve” (Filipenses 2:12). Bautismo jaeko iyɨpɨ. Ërei, ¿këraipa ndepuere reiko avei Jehová iamigorä? Yemboe iyapɨpe omboyevɨta kuae marandu.