YEMBOE 09
Yerure ndemboya Tumpa re
¿Ámope reipota pa kia ndemborɨ? ¿Renoi pa marandu reta ikavi ete vae mbaetɨ vɨteri oyemboresponde ndeve vae? ¿Remonecesita pa kɨ̈reɨ ngatu ani mbɨakatu? ¿Reipota pa renoi amistad Jehová ndive? Yerure ipuere ko ndemborɨ. Ërei ¿kërai pa reyerureta? ¿Oendu pa Tumpa opaete yerure reta? ¿Mbae pa reyapota Tumpa oendu vaerä opaete ndeyerure reta? Yaecha.
1. ¿Kia peño pa yayerureta? Jare ¿mbae re pa yayerureta?
Jesús yandemboe jaeño yandeRu ara pegua pe yayerureta. Jáeramo jae oyerure ñoi Jehová pe. Jae jei: “Jáeramo peyerure Tumpa pe körai: ‘OreRu ara pe reï vae...’” (Mateo 6:9). Yayerure yave Jehová pe, yandeamistad jae ndive oñemomɨ̈rata.
Yandepuere yayerure oipotagüe mbae re, ërei, Tumpa omborespondeta yandeyerure reta yayapo yave jae jemimbota. Biblia jei “echa yaikuaa Tumpa oendu ko yandeve yayerure yave chupe jae jemimbota rupi mbae re” (1 Juan 5:14). Jesús oechauka amogüe ejemplo reta mbae re pa yandepuere yayerure (emongeta Mateo 6:9-13). Yepe tëi ikavi yayerure ñamonecesita vae re, ngaraa ñaneakañɨ ñamee yasoropai Tumpa pe omee yandeve vae re jare yayerure omborɨ vaerä ïru vae reta pe.
2. ¿Kërai pa yayerureta?
Biblia jei yandeve: “Pemee pepɨa chupe [Tumpa]” (Salmo 62:8). Jayave yayerureta ko añetete rupi jare yandepɨa reve. Yandepuere täta yayerure ani yandepɨa peño, jare Jehová mbaetɨ omae kërai ñañeñono vae re ërei ikavi ete ko yayerure yemboete reve. Jayave yandepuere yayerure avei.
3. ¿Kërai pa omboresponde Tumpa yandeyerure reta?
Tumpa omboresponde ñanemarandu reta Biblia rupi jare “omee arakuaa” (Salmo 19:7; emongeta Santiago 1:5). Jare, ñanoi yave yemoambeko reta Jehová omee yandeve mbɨakatu. Jaenunga vi oiporu jembiokuai reta yandemborɨ vaerä.
YAIKUAA KATU VAERÄ
Yaecha kërai yayerureta yandepɨa iyɨvɨte güi Tumpa oendu vaerä jare kërai ipuere yandemborɨ.
4. Yayerureta ko Tumpa oipota rami
¿Mbae pa yayapota Tumpa oendu vaerä yandeyerure reta? Pemae VIDEO re.
Jehová oipota yayerure chupeño. Pemongeta Salmo 65:2 jare peyemongeta jese:
¿Rerovia pa Tumpa oendu “yerure” vae, oipota nde reyerure chupe? ¿Maera pa reyemongeta jökorai?
Yaipota yave Tumpa oendu yandeyerure reta, yayapota ko jae jei vae. Pemongeta Miqueas 3:4 jare 1 Pedro 3:12, jare peyemongeta jese:
Tumpa oendu vaerä yandeyerure reta, ¿mbae pa yayapota?
Ipuere ko sundaro reta oñoraro vae oyerure Tumpa pe omborɨ vaerä omongana jovaicho reta. ¿Ërei oenduta ra Tumpa jókuae yerure?
5. Yayerureta ko yandepɨa iyɨvɨte güi
Jeta kia reta oyemboe omboaɨkuere yeyé iyerure reta. ¿Ërei ikavi pa Tumpa pe jókuae yerure reta? Pemongeta Mateo 6:7 jare peyemongeta jese:
¿Mbae pa yayapota agüɨye vaerä “yamboaɨkuere yeyé” yayerure yave?
Ara ñavo ndepuere reyemongeta mbae ikavi vae reasa vae re jare remee yasoropai Jehová pe jókuae re. Jökorai reyapo yave metei semana rupi, nemiarita ko siete mbaembae reta re remboaɨkuere mbae reve.
Tu ipɨakavi vae oipota taɨ oyemongeta jae ndive ipɨa güive. Jehová oipota vi yayerure chupe yandepɨa güive.
6. Yerure jae ko regalo Tumpa omee yandeve vae
¿Kërai pa ñanemomɨ̈rata yerure yaasa yave mbaeavai reta rupi? Pemae VIDEO re.
Biblia jei yandeve yerure rupi ñanoi mbɨakatu añetete vae. Pemongeta Filipenses 4:6, 7 jare peyemongeta jese:
Yepe tëi yerure reta mbaetɨ oñono kavi opaete yandembaeavai reta, ¿kërai pa yandemborɨ?
¿Mbaembae re pa reipota reyerure?
¿Reikuaa pa?
Ñee amén oipota jei “toyeapo jökorai” ani “jökorai ko”. Arakae güive oyeporu kuae ñee “amén” yerure reta iyapɨ pe (1 Crónicas 16:36).
7. Embosɨrɨ tiempo reyerure vaerä
Ámope yayapo jeta mbaembae reta jare ñaneakañɨ yayerure vaerä. ¿Kërai yave pa Jesús oyerure? Pemongeta Mateo 14:23 jare Marcos 1:35, jare peyemongeta jese:
¿Kërai pa Jesús ombosɨrɨ tiempo oyerure vaerä?
Jare nde, ¿kia güi pa reekɨta tiempo reyerure vaerä?
AMOGÜE RETA JEI VAE: “Ayerure tëi, ërei Tumpa mbaetɨ omboresponde cheyerure reta”.
¿Mbae pa rere?
YAYEMBOE MA VAE
Yerure añetete vae yandemboya katu Tumpa re. Jaenunga vi omee yandeve mbɨakatu jare mɨ̈rata yayapo vaerä Jehová oipota vae.
Emoësaka
¿Kia peño pa yayerureta?
¿Kërai pa yayerureta?
¿Kërai pa yandemborɨ yerure?
EEKA KUAE
Descubra la respuesta a preguntas que mucha gente se hace sobre la oración.
“Siete preguntas sobre la oración” (La Atalaya, 1 de octubre de 2010)
Lea por qué es importante que usted ore y cómo puede mejorar sus oraciones.
Vea lo que la Biblia enseña sobre a quién dirigir nuestras oraciones.
Vea en este video musical si hay que orar en un lugar o momento específico.