Rahab oyeko Jehováre

Emoiä yande yaiko tëta arakae Jericó jee vae, Canaán ɨvɨpe. Gente reta jókope oiko vae mbaetɨ güɨrovia Jehováre. Metei kuña Rahab jee vae oiko jókope.

Michi güive, Rahab oendu jeta mbae Jehová oyapo vaere. Oikuaa kërai Jehová omborɨ tëta Israel omoamɨri jovaicho reta. Jare kërai Jehová oyókuai Moisés oekɨ vaerä tëta Israel Egiptogüi. ¡Omondɨpa ɨguasu Pɨ̈ta tëta Israel oasa vaerä! Añave Rahab oendu jërakua chupe vae omopɨakañɨ: ¡Israel tëta köiño oï Jericógüi, jare jae oiko jókope!

Pɨ̈tu yave, mókoi kuimbae Israel iñemuña reta ojo tëta guasu Jericópe omae vɨari vaerä. Oväe yave Rahab jëtape, jae oparea opɨta reta vaerä. Jókuae pɨ̈tu rupi, mburuvicha guasu Jericó pegua oikuaa oporopïaro vae reta oï tëta guasu jare opɨta reta Rahab jëtape. Jáeramo mburuvicha guasu omondo jembiokuai oeka reta vaerä. Jare Rahab omoñemi oporopïaro vae reta o iárambo jare jei mburuvicha guasu jembiokuaipe: “Yogüeruko añete chépɨri kuimbae reta ërei opama oë yogüɨraja. Peaɨkuemoña voi jarembae, peupitɨta ko”. ¿Reipotapa reikuaa maera Rahab omborɨ oporopïaro vae reta?... Jae güɨrovia Jehová, jare oikuaa omeeta Jericó jare ɨvɨ Canaán Israel iñemuña reta peguarä.

Ndei ojo reta Rahab jëtagüi, oporopïaro vae reta jei: Tumpa omboai Jericó yave, jae jare jëtara reta omboasayepeta. ¿Reikuaapa mbae jei jae reta Rahabpe omboasayepe vaerä?... Jei: “Eñapɨti kuae tɨmasa pɨ̈ta vae nde ventanare jare emboatɨ nerëtara reta ndero japɨpe”. Rahab oyapo kavi opaete oporopïaro vae reta jei vae. ¿Mbaepa oasa jaɨkue rupi?...

Mbovɨ ara oasama yave, tëta Israel pegua reta oyere Jericóre. Oyere tëta guasure metei vece ara ñavo, ova ara oyapo körai kïrii ngatu. Ërei chiúa arape oyere reta chiuye tëta guasu re, jaɨkue rupi opaete osapúkai täta jayave, ¡Jehová ombosururu Jericó ikësea! Echa jókuae tëta tɨmasa pɨ̈ta ventanape oï vae mbaetɨ osururu. ¿Ndepuerepa reecha tɨmasa mojaangape?... ¡Jökorai Rahab jare jëtara reta oasayepe!

¿Reechapa Rahab oasayepe oyapo ramo Jehová jei vae?... Rahab oyemboe jeta mbae ikaviete vae Jehováre jáeramo oyeko jese. Nde jaeramiñovi reyemboe reï jeta mbae ikaviete vae Jehováre. ¿Reroviapa Tumpa Rahab rami?... ¡Jökoraiko!