Rebeca oipota omboyerovia Jehová

Rebeca metei kuña oaɨu Jehová. Isaac Rebeca ime. Jae jaenungavi oaɨu Jehová. ¿Këraipa oikuaa Rebeca Isaac? ¿Këraipa jae oechauka oipota omboyerovia Jehová? Añave yayemboe Rebecare.

Isaac tu jee Abraham, ichɨ Sara. Abraham oipota taɨ omenda metei kuña ndive oaɨu Jehová vae. Ërei jae reta oikose Canaánpe, jókope mbaetɨ kia ave omboete Jehová jáeramo omondo jembiokuai (ipuereko Eliezer) Harán kotɨ. ¿Maerapa omondo jokotɨ? Echa Haránpe oikose Abraham jëtara reta, jare Eliezer ipuereko oväe Isaac jembirekorä jokogüɨ.

Eliezer oyupavo ojo vaerä matɨ jare omoïru Abraham jembiokuai reta. Güɨraja 10 camello ombovoɨta tembíu jare mbota reta ndive. Ërei ¿këraitapa Eliezer oväe Isaac jembirekorä? Jae oikuaa kavi kërai yave kuña reta ou oekɨ ɨ ɨkuagüi. Jáeramo, oväe yave Haránpe, ojo jókope. Jayave oyapo metei yerure Jehovápe jare jei: “Jókuae kuñatai che jaeta emee ɨ aɨu vaerä. Jare jae omee ɨ cheve yave jare omeevi checamello retape, jae toiko kuña reiparavo vae”.

Oyerure oï ramboeveko ou Rebeca ɨkuape. Biblia jei jókuae kuñatai ipöra yae. Eliezer jei emee tau ɨ, jare kuñatai jei: “Tamee ndeve jare ndecamello reta peguarä”. Rebeca osɨiye ɨkua kotɨ oekɨ jeta ɨ, echa camello reta jou jeta ramo. Emae mbojaanga. ¿Mbaepa oyapo Rebeca?... Eliezer ipɨakañɨ omae jese oparavɨkɨ täta ramo. ¡Echa Jehová oendu iyerure!

Eliezer omee mbota reta ipöra vae Rebecape, javoi Rebeca oparea chupe jare ïru tembiokuai retape ojo vaerä tu jëtape. Eliezer omoësaka maera Abraham ombou Haránpe. Jeivi kërai Jehová omboyevɨ iyerure. Opa oendu yave, Rebeca jëtara reta oyerovia yae. Jae reta jei Eliezerpe: “Ikaviko Isaac jembirekorä”.

Mbaepa nde rere, ¿oipotara Rebeca omenda Isaac ndive?... Rebeca oikuaa Jehová ombou Eliezer. Jáeramo jëtara reta oparandu yave, ikɨ̈reɨpa ojo Canaánpe omenda vaerä Isaac ndive, jae jei: “Chekɨ̈rei aja”. Jarembae pegua ojo Eliezer ndive. Oväe yave Canaánpe, omenda Isaac ndive.

Rebeca oyapo Jehová jei vae, jáeramo Jehová oyangareko kavi jese. Jeta año oasa yave, Jesús ou Rebeca iñemuña retagüi. Nde reyapo yave Rebeca rami remboyeroviata Jehová jare oyangareko kavita nderé.