YEMBOE 1
Metei mbae yaipota yaikuaa vae
¿Mbaera jókuae yaikuaambae?...a Jókuaeko mbaetɨ jeta kia reta oikuaa vae. Biblia imiari metei ñee ikavi yae vae oñeñomi oï vae jare jókuaeko “yaikuaambae vae”. Echa ikavi yaeko Tumpagüi ou ramo. Iyɨpɨ etepe mbaetɨ kia ave oikuaa. “Jare araɨgua reta oipota yae oikuaa kuae mbae mbaere”. ¿Reipotapa reikuaa jókuae mbae yaikuaambaere?...
¿Mbaepa nde rere angel reta oipota yae oikuaa?
Jeta yaema oasa, Tumpa oyapo kuimbae jare kuña tenondegua. ¿Këraipa jae reta jee?... Adán jare Eva. Jae reta oikose koraɨ Edén jee vae. Jókuaeko ɨvɨ ipöra yeyé, Tumpa oñono kavi jae reta oiko vaerä. Echa Tumpa oipota jae reta jare imembɨ reta oyapo opaete ɨvɨ ipöra, koraɨ Edén rami. Oipotavi opaete oiko jekuae avei pegua paraísope. Ërei mbaetɨ jökorai oasa. ¿Maerapa?
Adán jare Eva mbaetɨ oyapo Tumpa jei vae, jáeramo añave mbaetɨ yaiko jókuae paraísope. Ërei Tumpa jei oyapota opaete ɨvɨ metei paraíso. Jayave opaete oikota jekuae avei yerovia yae reve. ¿Këraitapa oyapo? Jetama oasa mbaetɨ kia ave oikuaa kërai.
Ërei mbegüe mbegüepe oyekuaa. Jesús ou ɨvɨpe yave, omboe jókuae yaikuaambaere. Jei jókuaeko Tumpa iReino. Ñanemiari Tumpape yave yayerure “Tou ndeporookuaía”. ¿Maerapa yayerure körai? Echa Tumpa iReino rupi opaete ɨvɨ oyeapota metei paraíso ipöra yae vae.
¿Reipotapa reiko jókuae paraísope?... Echa jaeño kia reta oyapo Tumpa jei vae oikota Paraísope. Biblia imiari jeta kuimbae jare kuña oyapo reta Jehová jei vae. ¿Reipotapa reikuaa jae retare?... Kuae kuatiarɨrupe yayemboeta jae retare jare kërai yandepuere yayapo jae reta rami.
YAMONGETA TUMPA IÑEEPE:
Marcos 4:11
1 Pedro 1:12
Génesis 1:26-28; 2:8, 9; 3:6, 23
Mateo 6:9, 10
a Kuae kuatía jare ïru retape oime mbarandu reta, javoi güɨnoi puntos kuae rami (...). Opa remongeta yave mbarandu reta epɨta michi pegua ipuere vaerä nemichia omboyevɨ.