¿Mbaepa reyapota rekɨɨye jare ndeño reï yave?

Emae michia mojaangape. Okɨɨye jare jaeño oï. ¿Reechapa? ¿Ámope rekɨɨyepa?... Opaete ámope yakɨɨye. Biblia imiari Jehová oaɨu vae reta, ámope jaeño oï jare okɨɨyevi. Jökorai oasa Elías ndive. Yayemboeta jaere.

Ndei Jesús oiko ɨvɨpe mbove, Elías oikose Israelpe. Mburuvicha guasu Israel pegua jare jembireko mbaetɨ omboete Jehová Tumpa añetete vae. Jae reta jee Acab jare Jezabel, omboete tumpa raanga Baal. Opaete seri Israel iñemuña reta omboetevi jeko pegua tumpa raanga Baal. Mburuvicha guasu jembireko Jezabel pochɨ yae oipota oyuka opaete kia oyapo Jehová jei vae. Elías iñeereendu Jehovápe, jáeramo Jezabel oipota yae oyukavi. ¿Mbaera oyapota Elías?...

¡Jae ojo matɨ! Ñuu kotɨ jare oñemi metei ɨvɨkuape. ¿Maerapa oñemi?... Jae okɨɨye yae. Ërei mbaetɨita tëiko okɨɨye. ¿Maerapa? Jae oikuaa Jehová omborɨta, jetaye jae oecha kërai Jehová oechauka imbaepuere yae. Metei ara Elías oyerure yave, Tumpa oendu jare ombou tata aragüi. Jehová imbaepuere yaeko, jáeramo ipuereko omborɨ Elías.

Elías oñemi ɨvɨkuape yave Jehová oparandu: “¿Mbaepa reyapo kuaepe?”. Elías jei: “Añave mbaetɨma kia ave iñeereendu ndeve, cheñoma apɨta cheyukatavi jáeramo akɨɨye”. Jae güɨrovia opaete ïru ñeemombeúa reta opa oyuka. Ërei Jehová jei: “Ndeñoäko oime vɨteri 7.000 chemboete vae. Agüɨye ekɨɨye che ameeta ndeve mbaravɨkɨ reyapo vaerä.” Jökorai Tumpa jei chupe yave, ¿këraira Elías ipɨa?... ¡Oyerovia yaeko!

¿Mbaepa yayemboe Elías oasa vaere?... Ámope ipuereko rekɨɨye jare ndeño reiko. Jökorai reï yave, nemaendúa mbaetɨko ndeño reiko, jare renoi vɨa-ïru oaɨu Jehová, jaenungavi nderaɨu. Jáeramo agüɨye neakañɨ Jehová imbaepuere yaeko jare ndemborɨ aveita. ¿Reyeroviapa reikuaa kuaere?...