Josías oiparavo kavi ivɨa-ïru reta

¿Yavaira yayapo Jehová jei vae?... Jeta kia reta jei yavai yaeko. Ërei Biblia yandemboe yavaiäko. Imiari michia Josíasre, jae jeta oñemomɨ̈rata oyapo vaerä Jehová jei vae. Oiparavo kavi ivɨa-ïru reta jókuae omborɨ. Añave yayemboe Josías jare ivɨa-ïru retare.

Josías tu Amón jee vae mburuvicha guasu Judá pegua. Amón pochɨ yae jare omboete tumpa raanga reta. Amón omano yave, Josías oiko mburuvicha guasurä Judápe. ¿Reikuaapa mbovɨ año güɨnoi Josías oñono reta yave mburuvicha guasurä? ¡Jae güɨnoi juri áñomi! ¿Pochɨ yaera tu rami?... Mbaetɨ pochɨ.

Michi güive, Josías oipota oyeokuai Jehovápe. Jáeramo oiparavo kavi ivɨa-ïru reta. Jae reta oaɨu Tumpa jare omborɨ oyapo vaerä Jehová jei vae. ¿Kiapa Josías ivɨa-ïru reta?

Metei ivɨa-ïru jaeko ñeemombeúa Sofonías. Jae omombeu Judá pegua retape: “Jekuae avei omboete yave tumpa raanga reta oiporaratako”. Josías oyeapɨsaka Sofonías jei vae jare jae omboete Jehová, mbaetɨ tumpa raanga reta.

Ïru Josías ivɨa-ïru jaeko Jeremías, jae iyaveigua. Taɨrusu yave jae reta oikose köiño. Jeremías jare Josías oyemborɨ päve omboete vaerä Jehová. Jae retako ivɨa-ïru añetete vae, jáeramo Josías omano yave, Jeremías oikuatía metei tairari mbɨatɨtɨ pegua.

¿Mbaepa yayemboe Josías oyapo vaere?... Michi güive jae oipota oyapo Tumpa jei vae. Jáeramo oiparavo kavi ivɨa-ïru oaɨu Jehová vae reta. Nde jaenungavi eiparavo kavi nde vɨa-ïru oaɨu Jehová vae reta, ndemborɨ vaerä reyapo ikavi vae.