Jeremías jekuae avei imiari Jehováre

Ñamoërakua Tumpa Iñee yave, ipuereko ámope kia reta opuka yandegüi ani iyarasɨ yande kotɨ. Jökorai oasa yave ipuereko yaipotaäma ñanemiari Tumpare. ¿Nde reasapa jökorai?... Biblia imiari metei taɨrusu oaɨu Jehová, ërei oeya seri imiari jaere. Jae jee Jeremías. Yayemboe jese.

Jeremías taɨrusu yave, Jehová oyókuai omoërakua vaerä Iñee. Omondo omombeu kia retape agüɨyema oyapo vaerä mbae ikavimbae. Jeremías okɨɨye echa jókuaeko yavai yae. Jáeramo, jae jei Jehovápe: “Che mbaetɨ aikatu chemiari, echa chetaɨrusu yae vɨteriko”. Ërei Jehová jei chupe: “Agüɨye ekɨɨye, che romborɨta”.

Jayave Jeremías omboɨpɨ omombeu tëta guasu pegua retape: “Mbaetɨ peyerova yave ikaviä vaegüi, peiporaratako”. ¿Oyapora jae reta jae jei vae?... Mbaetɨ, amogüe reta opuka ïru iyarasɨ yae ikotɨ. ¡Jare ïru reta oipota oyuka! ¿Këraira Jeremías ipɨa oasa vaere?... Okɨɨye yae jare jei: “Agüɨyemo tachemiari Jehováre”. Ërei ¿añetetera jókuae? ¿Oeyara imiari Jehováre?... Mbaetɨ oeya. Jeremías oaɨu yae Jehová jáeramo mbaetɨ ipuere oeya imiari jaere. Jekuae avei oyapo Jehová jei vae jáeramo Jehová oyangareko jese.

Metei ara kuimbae reta pochɨ yae vae ombogüeyɨ ɨrɨru kɨ̈pe vaepe. Jeremías oike jókuae tuyuapo yasuru vaepe, mbaetɨ tembíu jare ɨ ave. ¡Jókuae kuimbae reta oipota jae omano jókope! Ërei, ¿oasayepera Jeremías? Jehová omborɨ Jeremías, kia reta oekɨ vaerä ɨrɨrugüi.

¿Mbaepa reyemboe Jeremías oasagüere?... Yepetëi ámope okɨɨye, jekuae avei imiari Jehováre. Ipuereko kia reta opuka ani iyarasɨ nde kotɨ nemiari yave Jehováre. Ipuere nemara jare rekɨɨye. Ërei, agüɨye eeya nemiari Jehováre. Jae ndemborɨ aveita, Jeremías omborɨ rami.