Jesús iñeereendu avei

¿Yavaira neñeereendu nderu jare ndesɨpe?... Ámope yavai. Ërei ¿kiapa ipuere ndemborɨ neñeereendu vaerä? Eyemboe Jesús oyapo vaere. ¿Reikuaapa nde, Jesús iñeereendu avei Jehová jare tu retape?... Yayemboe Jesúsre.

Jesús ndei ou ɨvɨpe mbove oikose arape Tu Jehová ndive, jaeko Tu echa jaeko iyapoa. Ërei, ɨvɨpe güɨnoivi ichɨ jare tu. Jae reta jee José jare María. ¿Reikuaa mbaepa oyapo Jehová Jesús oa vaerä ɨvɨpe?...

Jesús oikose arape, ërei oiko vaerä ɨvɨpe Jehová imbaepuere rupi güeru Jesús jekove María jɨepe. Chau yasɨ rupi tuicha ichɨ jɨepe ïru michia reta rami, jaɨkue rupi oa. Jökoraiko José Jesús tu jare ichɨ María. Jae reta oyangareko jese okuakuaa regua.

Jesús 12 año güɨnoima yave oechauka oaɨu yae Jehová Tu ara pegua. Metei ara Jesús jare jëtara ojo Jerusalénpe, jókope ojo reta omboete vaerä Jehová. Ouye reta yave jëta kotɨ, José jare María oeka Jesús ërei mbaetɨ oväe. Jae mbaetɨ ou jae reta ndive. ¿Mbaera oyapo José jare María?...

José jare María oyerovaye aramoete pegua Jerusalén kotɨ ojo oeka vaerä ketɨ ketɨ rupi. ¡Ipɨatɨtɨ oeka mboapɨ ara rupi! Jaɨkue rupi oväe tupaope. ¿Mbaepa oyapo Jesús tupaope?... Jókope oyemboe jeta mbae Tu Jehováre echa jae oaɨu yae Jehová jáeramo oipota oyemboe mbae ikavi vae omboyerovia vaerä. Okuakuaa yave, jekuae avei oyapo Jehová jei vae. Yepetëi ámope yavai, oime jeta kia reta omotareɨ vae, ërei iñeereendu avei Jehovápe. Ërei, ¿Jesús oyapora José jare María jei vae?... Bibliape jei iñeereenduko.

¿Mbaepa reyemboe Jesús oyapo vaere?... Yepetëi ámope yavai, reyapo avei nderu jare ndesɨ jei vae. ¿Nde reyapotara?...