Pablo jiɨ okɨɨyembae

Yayemboe metei taɨrusu oepɨ itutɨ manogüi. Taɨrusu itutɨ temimondo Pablo. Mbaetɨ yaikuaa këraira taɨrusu jee, ërei yaikuaa jae okɨɨyembaeko. ¿Reipotapa reikuaa mbaera oyapo?...

Pablo oï tembipɨrɨru Jerusalénpe. Oñono reta tembipɨrɨrupe imiari ramo Jesús regua. Jare oime jeta kuimbae reta omotareɨ Pablo jare oyemboemboe oyuka vaerä. Oipota ojo reta sundaro juvichape jei vaerä: “Emondo nde sundaro reta togüɨraja Pablo mburuvicha judío reta kotɨ”. Jare jae reta oipota oñemi tape rupi, Pablo oasa oï yave, ¡jae reta oyukata!

Pablo jiɨ oikuaa jae reta oyapota vaere. ¿Mbaera oyapota? Jae ojo tembipɨrɨrupe omombeu vaerä itutɨ Pablope. Jayave Pablo jei chupe: “Ekua aramoete pegua sundaro juvichape jare emombeu chupe”. Jókuae omombeu vaerä yavai yaeko, echa sundaro juvicha yavai kia imiari vaerä chupe. ¿Ojora Pablo jiɨ imiari chupe?... Jae ojo imiari sundaro juvichape okɨɨyembae reve.

Sundaro juvicha oyeapɨsaka kavi. Omondo Pablo tëta Cesareape jare omoïru 500 seri sundaro reta oyangareko jese vaerä. Sundaro juvicha jei: “Peraja kuae pɨ̈tu yave”. ¿Oasa yepera Pablo?... Jökoraiko, ¡oasayepe! Jókuae kuimbae reta pochɨ vae reta mbaetɨ oyuka. Oyemboemboe jese vae mbaetɨ oë kavi chupe reta.

¿Mbaepa reyemboe oasagüe vae?... ¡Nde ndepuerevi Pablo jiɨ jeia vae rami! Nemiari yave Jehováre agüɨye ekɨɨye. ¿Nemiaritara Jehováre rekɨɨyembae reve?... Jökorai reyapo yave, ipuereko kia oasayepe manogüi.