Timoteo oipota omborɨ gente reta

Timoteo metei taɨrusu oyerovia yae oipota omborɨ ïru reta ramo. Ojo ketɨ ketɨ rupi omborɨ vaerä gente reta. Jáeramo jae oiko yerovia reve. ¿Reipotapa reikuaa jaere?...

Timoteo okuakuaa jëta Listrape. Ichɨ jee Eunice, iyarɨ Loida. Michi güive jae reta omboe Timoteo Jehová Iñeere. Jáeramo michi güive jae oipota omborɨ gente reta oikuaa vaerä Jehová.

Metei ara Timoteo taɨrusuma yave, Pablo jei chupe: “Ajata amoërakua Tumpare matɨ. ¿Reipotapa reo che ndive?”. Jokuae ramo Timoteo oyerovia yae jare jei: “Jäa, aipota aja”. Jae oipota omborɨ gente reta.

Ojo Pablo ndive Tesalónica kotɨ, metei tëta Greciape oï vae. Jeta oguata reta jare oyoupi barcope. Oväe reta yave, omborɨ jeta gente reta oikuaa vaerä Jehová. Ërei amogüe reta iyarasɨ yae jare oipota oyapo ikavimbae chupe reta. Jáeramo Pablo jare Timoteo ojo reta omoërakua vaerä ïkotɨa reta rupi.

Mbovɨ yasɨ oasama yave Pablo jei Timoteo pe ojo vaerä Tesalónicape. Jae oipota oikuaa kërai oï jókope ihermano reta. Ojo vaerä, jókuae tëta jeta pochɨ vae retape, jae jeta oñemoäta ngatu. Timoteo ojo, oyemoambeko oiko hermano retare ramo. Ouye yave güeru ñee ikavi vae Pablope. Hermano reta Tesalónica iporogüɨrovia Jehováre oñemomɨ̈rata avei.

Jeta año rupi Timoteo oyapo Jehová jei vae Pablo ndive. Jáeramo Pablo oikuatía Timoteore jare jei: “Amondota Timoteo omborɨ vaerä hermano reta. Mbaetɨye ïru jae rami. Jae oaɨu Jehová jarevi gente reta”.

¿Nde reaɨupa gente reta jare reipota remborɨ oyemboe vaerä Jehováre?... Reyapo yave körai, ndepuere reiko yerovia katu reve Timoteo rami.