Metei gobierno opaete ɨvɨ peguarä

Mbovɨñoma oata ou vaerä metei gobierno opaete ɨvɨre. ¿Reipotapa reikuaa?... Jaeko Tumpa igobierno. Oyapota opaete ɨvɨ metei paraíso, ipöra yae yaiko vaerä jókope. ¿Reipotapa reikuaa Tumpa igobiernore?...

Tëta guasu reta güɨnoi metei mburuvicha guasu. Jare mburuvicha guasu omogobierna opaete jókope oiko vae retare. ¿Reikuaa kiapako Mburuvicha Guasu Tumpa igobierno?... Jaeko Jesucristo. Jae oiko arape. Mbovɨñoma oata oiko Mburuvicha Guasurä opaete ɨvɨre. ¿Mbaepa nde rere, yaikotara yerovia reve Jesús oiko Mburuvicha Guasurä opaete ɨvɨre yave?...

¡Yayerovia yaetako! Ɨvɨ ipörama yave, mbaetɨtama ñeraro reta. ¡Tëtara reta mbaetɨtama oñeraro japicha reta ndive! Mbaetɨtama mbae jasɨ jare mano. Jesambae reta omaeta, iyapɨsambae reta oenduta. Iköcho vae reta osɨita jare oporiseta. Opaete ñanoita jeta mbae jëe ngatu vae yakaru vaerä. Mɨmba reta mbaetɨta pochɨ ïru mɨmba reta ndive, yandepuereta yayuvanga jae reta ndive. Oime vɨteri mbae ikaviete vae: jeta omano vae reta oikoveyeta. Opaete kuña jare kuimbae ñanemiari kuae kuatiarɨrupe Rebeca, Rahab, David, Elías jare ïru reta oikoveyetavi. ¿Reipotapa reecha jae reta oikoveye yave?...

Jehová nde raɨu yae jare oipota reiko yerovia reve. Eyemboe avei jese jare eyapo jae jei vae. Jökorai reyapo yave reikota jekuae avei pegua paraísope. ¿Reipotapa reiko Paraísope?...