Kërai peiporu kavi pekorepoti

Opaete ko yaiporu korepoti yagua vaerä mbaembae yanderëta peguarä (Proverbios 30:8). Tumpa Iñee jei korepoti yandemborɨ ko (Eclesiastés 7:12). Ámope iyavaiko yayemongeta korepotire mbae oata yave, ërei agüɨye pemaeño jókuae pemboavai nemenda ïru ndive (Efesios 4:32). Pemiari kavitako peyeupe añete rupi kavi këraitapa peiporu pekorepoti vae.

1 PEYEMONGETA KAVI MBAE PEYAPO VAERÄ

TUMPA IÑEE JEI VAE: “Oime yave pegüi reta kia ikɨ̈reɨ oyapo o ɨvate vae, ¿oguapɨtaa pa oipapa mbovɨ ra jepɨta vae, oikuaa vaerä ikorepoti oupitɨta ra opa oyapo vaerä?” (Lucas 14:28). Ikavi yae ko peñemomiari mókoi reve këraitapa pemogasta pekorepoti (Amós 3:3). Ërei peikuaatako mbae oata peve pegua vaerä jare mbovɨ pepuere pemogasta (Proverbios 31:16). Ërei jembɨre korepoti peve yave agüɨye pegua mbaembaeño. Agüɨye peyembopiaka peiko, pemogasta korepoti penoi vaeño (Proverbios 21:5; 22:7).

NDEPUERE REYAPO VAE:

• Jembɨre peve yave korepoti, eyemongeta nemenda ïru ndive këraitapa peiporu kavi

• Mbaetɨ oupitɨ peve korepoti yave, peñemomiaritako kërai pepuere pemogasta mbovɨño. Echa pepuere peyapo tembíu perëtape aguɨye vaerä pegua oyɨgüema vae

2 AGUƗYE PEPOROMBOTAVƗSE

TUMPA IÑEE JEI VAE: Peiko jupi rupi kavi “yandeYa jóvai, mbaetɨ ïru vae reta jovaiño” (2 Corintios 8:21). Peretako añetete pemenda ïrupe mbovɨ pemogana vae jare mbovɨ pemogasta vae.

Nemiaritako nemenda ïru ndive ndei regua mbove mbae jepɨ yae vae (Proverbios 15:22). Pemiari aveitako jókuaere peiko vaerä pɨagüive reve nemenda ïru ndive. Korepoti remogana vae ndeve guarañoäko, jaeko reiporu vaerä nemenda ïru jare nemichia reta ndive (1 Timoteo 5:8).

NDEPUERE REYAPO VAE:

• Peñemomiari kavitako mbovɨ pepuere pemogasta peparandumbae reve

• Agüɨye peäro peyemongeta korepotire oata yaveño