YEMBOYAO 3
Kërai pepuere pemoikavi mboavai reta
“Pembotenonde peyoaɨu yae avei vae. Echa mboroaɨu güeru jeta ñɨ̈ro mbaeyoa re.” (1 Pedro 4:8)
Omendama vae reta oime ñotaiko güɨnoi yemboavai reta, echa ipɨayemongeta yave mbaetɨ oyovake, echa jae reta ambue ye oyembokuakuaa ramo. Ërei ipuereko yemboavai ou ïkotɨa güi ani oasa mbae aramoiñovi.
Ámope ipuere pemboasaiño mbaeavai reta, ërei Tumpa Iñee yandemboarakuaa yayapo kavi vaerä mbaeavai reta (Mateo 5:23, 24). Jayave ikaviko yayapo Biblia jei rami.
1 PENOI YAVE YEMBOAVAI PEYEMONGETA JESE
TUMPA IÑEE JEI VAE: “Oime [...] ara, ñanemiari vaerä” (Eclesiastés 3:1, 7). Penoitako tiempo peyemongeta vaerä mbaeavaire. Ere nemenda ïrupe kërai nde reï vae jare mbae ndepɨayemongeta mbaeavaire, jare peyemongeta avei añete rupi kavi (Efesios 4:25). Agüɨyema pemaendúa jese peyembopochɨ vaerä. Pepɨakatu reve peyemongeta yave ngaraako peyembopochɨ (Proverbios 15:4; 26:20).
Yepetëi mbaetɨ ndepɨayemongeta yovake nemenda ïru ndive jekuaeñotako ndepɨakavi reve reaɨu jare remboete (Colosenses 4:6). Peñono pepɨape pemoikavi vaerä aramoete pegua pemoambeko vae, agüɨye pepɨta peyemongetambae (Efesios 4:26).
NDEPUERE REYAPO VAE:
Pemaetako kërai yavera ikavita peñemomiari vaerä mbaeavai penoi vaere
Nemenda ïru oyemongeta oï yave eyeapɨsaka chupe, jaɨkue rupi ndepuereta reyemongetavi
2 EYEAPƗSAKA REIKUAA KAVI VAERÄ
TUMPA IÑEE JEI VAE: “Peyoaɨu oñoëtara ete vae reta rami. Pemae kavi oyoe peyomboete reve” (Romanos 12:10). Ikaviko reyeapɨsaka reikuaa vaerä mbae oipota nemenda ïru vae. Jökorai peyapo yave ‘peiko kavita metei ramiño’ jare peechaukata “peñemomichi” peï (1 Pedro 3:8, NTG; Santiago 1:19). Yepe mona reparavɨkɨ reï eeya michi pegua, reyeapɨsaka jese vaerä ani eparandu chupe kërai yave ipuereta oyemongeta nde ndive. Reecha nde ko metei ramiño nemenda ïru ndive yave, mbaetɨta ndearasɨ katuiño ikotɨ (Eclesiastés 7:9).
NDEPUERE REYAPO VAE:
Ikaviko reyeapɨsaka kavi nemenda ïru jei vae, yepetëi mbaetɨ ikavi ndeve
Reyeapɨsaka kavi yave reikuaata mbaera oipota jei oï ndeve vae. Remaetavi kërai jei oï ndeve reikuaa vaerä kërai oñemosiente vae
3 PEÑEMOÄTA NGATU AVEI
TUMPA IÑEE JEI VAE: “Opaete mbaravɨkɨ reta güi, oime ko mbae oyekuaa; ërei ñeegüeño vae, güeru mbaravete” (Proverbios 14:23). Peñemomiarima këraitara peyapo vaerä yave pemboɨpɨ peyapo pepuere rupi jökorai (Proverbios 10:4). Mókoi reve täta peparavɨkɨ yave ‘peyekou kavita’ ko (Eclesiastés 4:9).
NDEPUERE REYAPO VAE:
Pepɨayemongeta këraitara mókoi reve pemoikavi vaerä pemboavai vae
Pemae avei peyapora peï peyemongeta rami