Peeka Tumpa peiko vaerä yerovia reve pemendape

Jehováa Tumpa ko omomenda kuimbae jare kuña tenondegua vae. Iñeepe jei Tumpa oyapo kuña tenondegua jare “güeru omee kuimbae pe”. Adán oyerovia yae javoi jei: “¡Kuae ko jae chekägüe ïru jare chesoo ïru!” (Génesis 2:22, 23). Jehová jekuaeño oipota omenda vae reta oiko yerovia reve.

Kia reta omenda yave ipuereko ipɨayemongeta oikotëi vaerä yerovia reve jare yemboavaimbae reve. Ërei mbaetɨko jökorai, yepetëi oime kia reta oyeaɨu yae vae oime güɨnoi yemboavai (1 Corintios 7:28). Jáeramo kuae kuatiarɨrupe reväeta Tumpa Iñee yemboarakuaa reta, reyapo jei rami yave ndemborɨta reiko vaerä yerovia reve nemenda ïru ndive jare nerëtara ndive (Salmo 19:8-11).

1 MOKOI REVEKO PEYAPOTA JEHOVÁ JEI VAE

TUMPA IÑEE JEI VAE: Kuimbae omendama vae omoäkama jo pegua reta (Efesios 5:23).

Jáeramo kuimbae remendama vae, Jehová oipotako reyangareko reaɨu reve nderembirekore (1 Pedro 3:7). Echa Jehová oyapoko neïrurä jare ndemborɨarä jáeramo oipota reaɨu jare reyangareko kavi jese (Génesis 2:18). Tuicha reaɨu yave ngaraa yavai reyapo vaerä mbae oiporu ndeve yave (Efesios 5:25-29).

Jaeramiñovi kuña remendama vae, Jehová oipotavi remboete reaɨu reve neme jare remborɨ oyapo vaerä Jehová oyókuai vae (1 Corintios 11:3; Efesios 5:33). Kɨ̈reɨ ngatu reve emborɨ opaete mbaembae oyapota vae (Colosenses 3:18). Jökorai reyapo yave ikavi yaetako chupe jare Jehová jovai (1 Pedro 3:1-6).

NDEPUERE REYAPO VAERÄ:

• Eparandu nemenda ïrupe mbae ndepuere reyapo peiko kavi vaerä pemendape. Eyapɨsaka kavi jae jei ndeve vae javoi eyapo jei ndeve rami

• Pepɨaguasutako. Mbegüe rupi peyekuaa kavita jare peikuaata kërai peechauka peyoaɨu vae

2 EECHAUKA NEMENDA ÏRUPE REAƗU YAE VAE

TUMPA IÑEE JEI VAE: Ikaviko reyemoambeko nemenda ïrure (Filipenses 2:3, 4). Eyangareko kavi jese, echa Jehová oipotako jembiókuai reta ipɨakavi avei vaerä (2 Timoteo 2:24). Jáeramo epɨayemongeta kërai ndepuere nemiari kavi vaerä, echa Tumpa Iñeepe jei: “Oime amogüe, oporoapicha iñee rupi, ërei yarakuaa vae reta iñee, moa rami ko” (Proverbios 12:18). Jáeramo peyerure Jehovápe iespíritu santo pemborɨ vaerä peñemomiari vaerä mboroaɨu reve (Gálatas 5:22, 23; Colosenses 4:6).

NDEPUERE REYAPO VAE:

• Ndei nemiari mbove nemenda ïru ndive mbaembae peyemoambeko vaere, eiporu Jehovápe ndemborɨ ndepɨakatu vaerä jare agüɨye vaerä reñemotäta

• Eyepɨamongeta kavi mbae rereta jare këraitara rere vae

3 PEMAENDUA PEKO METEI RAMIÑO

TUMPA IÑEE JEI VAE: Omenda vae reta oikoma “metei ramiño” (Mateo 19:5). Ërei pepɨayemongeta yave mbaetɨ oyovake jáeramo ámope oime yemboavai. Jáeramo ikaviko peikuaa peiko vaerä metei ramiño echa peyapo jökorai yave ikavi yaetako mbae peipota peyapo yave (Filipenses 2:2). Metei ramiñoko peiparavota mbae peipota peyapo vaerä. Ërei ¿këraitara peyapo? Tumpa Iñee jei: “Yemongeta reta oyeapo kavi yemboarakuaa kavi rupi” (Proverbios 20:18). Jáeramo Tumpa Iñee jei rami peyapo yave oë kavita opaete mbaembae peyapota vae (Proverbios 8:32, 33).

NDEPUERE REYAPO VAE:

• Agüɨye eyemongeta mbaembaereño nemenda ïru ndive; eyemongetavi ndepɨape renoi vae

• Ndei remoë neñee ramboeve, eparandu nemenda ïrupe