Pepɨa jupi pävetako

Jehová jeiko yaiko ‘yandepɨa jupi reve’ ñanemenda ïru ndive (Salmo 64:10). Jókuaeko ikavi yae omenda vae reta peguarä, mbaetɨ peiko pepɨa jupi reve yave ngaraa pepuere peyererovia katu. Echa jokuaeñoko ikavita pekuakuaa vaerä peporoaɨupe.

Añave rupi, omenda vae iyavai oiko ipɨa jupi reve. Jáeramo peyangareko kavitako pemendare, jare oime mókoi mbae peyapo vaerä.

1 PEMBOTENONDE PEMENDA

TUMPA IÑEE JEI VAE: “Peikuaa vaerä peiparavo ikavi vae” (Filipenses 1:10). Mbaetɨko oime mbae ikavi yae vae nemendagüi nderekovepe. Jáeramo remotenondetako nemenda.

Jehová oipota reiko nemenda ïru peguaräiño reiko vaerä yerovia reve jae ndive (Eclesiastés 9:9). Jehová jei iñeepe eyemoambeko nemenda ïru re jare eeka kërai remboyerovia vaerä (1 Corintios 10:24). Jare nemenda ïru oikuaatakovi kërai nde reipota jare reaɨu jae vae.

NDEPUERE REYAPO VAE:

• Renoitako tiempo reï katu vaerä nemenda ïru ndive, peñemomiari vaerä jare peyeapɨsaka peré vaerä

• Eyepɨayemongeta nemendaïrure, agüɨye ndereiño

2 EYANGAREKO NDEPƗARE

TUMPA IÑEE JEI VAE: “Kia nunga vae ipɨa pe iporopota reve omae yave kuña re, oyuvanga ma ko menda re ipɨa pe” (Mateo 5:28). Kia ipɨayemongeta avei kiare omae jare jekuaeño imaendúa jese yave, ipɨape iyoama imenda ïru kotɨ.

Jáeramo Jehová jei yayangarekotako yandepɨare (Proverbios 4:23; Jeremías 17:9). Ndepuere reyapo vaerä, eyangareko kavi mbaere remae vae (Mateo 5:29, 30). Ikaviko reyapo Job rami, jae jei iyeupe mbaetɨ omae vaerä ïru kuñare (Job 31:1). Agüɨyetako remae pornografíare. Agüɨye eteitako oime ndepɨape kiare ndeporopota, jáeñoko nemendaïrure.

NDEPUERE REYAPO VAE:

• Eechauka opaetepe reaɨu yae jare remboete nemendaïru vae

• Agüɨye emboavaika nemenda reñemoïruse yave oipotague kia nunga ikaviä nemenda ïrupe vae. Jökorai reyapo yave remorrespeta reï nemenda ïru omosiente vae