YEMBOE 30
¡Omanogüe reta reaɨu vae, oikove yeta ko!
Kia omano yandegüi yave, täta yandembopɨatɨtɨ. Jáeramo, Biblia omombeu yandeve mano ko yanderovaicho (1 Corintios 15:26). Reyemboe ma yemboe 27 pe Jehová omboaita jókuae tovaicho. Ërei, ¿mbae pa oasata omano ma vae reta ndive? Kuae yemboe pe yayemboeta mbae ikavi ete vae oyapota Jehová: omoingove yeta jeta yeyé omanogüe reta oiko vaerä yerovia reve jekuae avei pegua. ¡Omanogüe reta oikove yeta! ¿Añetete ra oikove yeta? ¿Oikove yeta ra ara pe, ani ɨvɨ pe?
1. ¿Mbae pa oipota oyapo Jehová kia omano yandegüi vae re?
Jehová oipota yae omoingove ye omanogüe reta. Job, kuimbae iporogüɨrovia täta vae, güɨrovia katu Tumpa ngaraa iñakañɨ chugüi omano yave jare “omanogüe reta ñogüɨnoia pe” oï yave. Jae jei Tumpa pe: “Chereenɨita, jare che aenduta” (emongeta Job 14:13-15).
2. ¿Kërai pa yaikuaa omanogüe reta oikove yeta?
Jesús oiko yave ɨvɨ pe Tumpa omee mbaepuere omoingove ye vaerä omanogüe reta. Jesús omoingove ye kuñatai 12 años güɨnoi vae jare kuña imemano vae imembɨraɨe (Marcos 5:41, 42; Lucas 7:12-15). Jesús iamigo Lázaro omano, yepe tëi irundɨ ara ma tɨvɨa pe oï, Jesús omoingove ye. Oyerure Tumpa pe jare iñeeäta reve jei: “¡Lázaro, eë joko güi!”. “Jare jókuae tëogüe oë”, ¡jare oikove ye! (Juan 11:43, 44). ¡Lázaro jëtara jare iamigo reta oyerovia yae!
3. ¿Oikove yeta nde reaɨu vae reta?
Biblia jei “Tumpa omoingove yeta omanogüe reta” (Hechos 24:15). Omanogüe reta Jesús omoingove ye vae, mbaetɨ ojo ara pe (Juan 3:13). Opaete oyerovia yae oikove ye ɨvɨ pe. Jókuae ara rupi oyapo rami, michiño ma oata Jesús omoingove ye vaerä jeta yeyé kia reta oiko vaerä yerovia reve jekuae avei pegua paraíso ɨvɨ pe. Jae jei “opaete tɨvɨa pe ñogüɨnoi vae reta” jare Tumpa imaendúa jese vae reta oikove yeta, yepe tëi iñakañɨ ma chugüi reta (Juan 5:28, 29, nota).
YAIKUAA KATU VAERÄ
Yayemboe Biblia pe omanogüe reta oikove yeta vae re jare jókuae promesa oyeapota ko. Yaecha kërai jókuae esperanza yandembopɨakatu.
4. Jesús oyapo vae oechauka ipuere omoingove ye omanogüe reta
Eyemboe kavi Jesús oyapo vae iamigo Lázaro re. Pemongeta Juan 11:14 jare 38-44, jare peyemongeta jese:
¿Kërai pa yaikuaa Lázaro añetete omano? (Pemae versículo 39).
¿Lázaro omano yave ojo pa ara pe? ¿Ikavi ra chupe Jesús omoingove ye oiko vaerä ɨvɨ pe?
5. ¡Jeta omanogüe reta oikove yeta!
Pemongeta Salmo 37:29 jare peyemongeta jese:
Jeta yeyé omanogüe reta oikove ye yave, ¿kia pe pa yogüɨrekota?
Jesús mbaetɨta omoingove ye Jehová omboete vae retaño, omoingove yeta vi jeta yeyé ïru kia reta. Pemongeta Hechos 24:15 jare peyemongeta jese:
Omanogüe reta oikove ye yave, ¿kia pa reipota yae reecha?
Eyemongeta kuae re: Jesús pe yavaiä etei omoingove ye vaerä omanogüe reta, metei tu omomba taɨ oke oï vae rami ko.
6. Omanogüe reta oikove yeta vae omee ndeve esperanza jare ndembopɨakatu
Biblia pe oyekuatía vae Jairo tayɨ re ombopɨakatu jare omokɨ̈reɨ jeta kia reta omano chugüi vae. Pemongeta kuae oasa vae Lucas 8:40-42 jare 49-56 pe.
Ndei omoingove ye yave Jairo tayɨ, Jesús jei chupe: “Agüɨye ndepɨatɨtɨ. Eporogüɨroviaño” (pemae versículo 50). ¿Kërai pa ipuere ndemborɨ reikuaa yave omanogüe reta oikove yeta vae...
... omano ndegüi yave reaɨu vae?
... mbaesusere ipuere nderekove pe oasa yave?
Pemae VIDEO re jare peyemongeta jese:
¿Kërai pa ombopɨakatu jare omokɨ̈reɨ Felicity tu reta, esperanza omanogüe reta oikove yeta vae?
AMOGÜE RETA JEI VAE: “Omanogüe reta oikove yeta oiko vaerä ara pe, mbaetɨ ɨvɨ pe”.
¿Mbae pa reyemongeta?
¿Mbae nunga texto Biblia pegua reechaukata omanogüe reta oikove yeta oiko vaerä ɨvɨ pe?
YAYEMBOE MA VAE
Biblia pe yandemboe jeta yeyé omanogüe reta oikove yeta. Jehová oipota yae omanogüe reta oikove yeta jare omee mbaepuere Jesús pe omoingove ye vaerä.
Emoësaka
¿Kërai pa yaikuaa Jehová jare Jesús oipota yae omoingove ye omanogüe reta?
¿Kia pe pa yogüɨrekota jeta yeyé omanogüe reta oikove ye yave: ara pe ani ɨvɨ pe? ¿Maera pa reyemongeta körai?
¿Maera pa rerovia katu omano ndegüi vae reta oikove yeta?
EEKA KUAE
Lea algunas sugerencias prácticas para sobrellevar el dolor.
“Ayuda para quienes están de duelo” (¡Despertad!, núm. 3 2018)
¿Puede ayudarle la Biblia a alguien que esté de duelo?
Vea cómo puede ayudar a un niño que ha perdido a un ser querido.
¿Resucitará alguien en el cielo? ¿Habrá alguien que no resucite?