Jeta vae reta mbaetɨma ojo iglesiape, echa mbaetɨ ombopɨakatu ani omborɨ reta oikuaa katu vaerä Tumpare. Jaeramo, ¿maerapa reota testigo de Jehová reta iyemboatɨpe? ¿Këraitara reñeväeta jókope?

Reïtako tëtara ipɨakavi jare oporoaɨu vae ndive. Arakae, Cristo jemimboe reta oyemboatɨ congregación retape omboete vaerä Tumpa, oyemboe vaerä Iñeere jare kɨ̈reɨ reve oiko päve vaerä (Hebreos 10:24, 25). Jae reta oyemboatɨ hermano reta ndive yave oñemosiente iamigo ete ipɨtepeko ñogüɨnoi vae, echa opaete oechauka añetete oyoaɨu vae (2 Tesalonicenses 1:3; 3 Juan 14). Ore royapo jae reta oyapo rami, jaeramo royerovia yae oreyemboatɨpe.

Reechata Tumpa Iñee oporomboe vae ndemborɨtako. Ɨma oyeapo rami, añave jeta kuimbae, kuña jare michia reta royemboatɨ roendu vaerä oporomboe vae oikuaa ete vae reta. Jae reta oiporu Tumpa Iñee yandemborɨ yaecha vaerä këraita yayapo Tumpa Iñee jei rami (Deuteronomio 31:12; Nehemías 8:8). Opaete ipuere omee iyemongeta marandu oyeapo yave jare ipuere otairari. Körai opaete ñavo ipuereta oechauka iporogüɨrovia (Hebreos 10:23).

Ndepuereta remomɨ̈rata ndeporogüɨrovia. Temimondo Pablo oikuatía metei congregaciónpe: “Aipota poecha [...] ñañomomɨ̈rata vaerä mborogüɨrovia pe. Echa pe reta peporogüɨrovia che aporogüɨrovia rami” (Romanos 1:11, 12). Ñañemoïru yande hermano reta ndive yayemboatɨ rupi, yandeporogüɨrovia oñemomɨ̈rata jare yandemborɨ jekuaeño yaiko vaerä yandeRu oipota rami.

Eyu yemboatɨape ndetei reecha vaerä jökorai eteko roe ndeve rami. Opaeteko pɨakavi reve nemoväeta. Yemboatɨ jepɨmbaeko jare mbaetɨko oyeporu korepotire.

• ¿Kia reta oyapose ramipa royapo oreyemboatɨ?

• ¿Këraipa yandemborɨ yemboatɨ reta?

Yepetëi mombɨrɨ roguata ñana rupi ani ara pochɨ yave, ore testigos de Jehová mbaetɨ roata ore yemboatɨpe. ¿Maerapa roipota yae royemboatɨ ore hermano reta ndive yepetëi ore kangɨ royu oreparavɨkɨgüi ani oime rogüɨnoi mbaeavai reta?

Yandemborɨ ñañemosiente kavi vaerä. Apóstol Pablo imiari yemboatɨre yave jei: “Yaeka kërai yayomborɨ päve vaerä” (Hebreos 10:24). Jökorai Pablo ñanemokɨ̈reɨ yayokuaa kavi jare yayemoambeko vaerä oyoupe. Yande yaikuaa kavi yandehermano reta yave, yaikatuta yaecha jae reta oasako jeta mbaeavai yande yaasa ñaï vae rami jare ipuereta yandemborɨ yaiko yandekueraimbae reve.

Ñanemokɨ̈reɨ yaaɨu añete vaerä yandeamigo reta. Yemboatɨpeko ñaï ñaneamigo añetete vae reta ipɨtepe. Orepuere yave royapo vi ïru mbaembae royerovia päve vaerä. ¿Mbaepepa oremborɨ kuae? Oremborɨ royoaɨu katu vaerä. Oime oï ombopɨatɨtɨ orechëi vae yave rojo rombopɨakatu vaerä roaɨu añete vae ramo (Proverbios 17:17). Ñañemoïru opaete vae reta ndive rupi yaechauka yayangareko kavi ñaï oyoe (1 Corintios 12:25, 26).

Romokɨ̈reɨ reiparavo vaerä ndechëirä jókuae oyapo Tumpa oipota vae, testigo de Jehová reta ipɨtepeko reväeta. Agüɨye reeya oime ndeyopia vae reyemboatɨ vaerä ore ndive.

• ¿Maerapa ikavi yayemboatɨ yandehermano reta congregación pegua vae ndive?

• ¿Kërai yavepa reota oreyemboatɨpe?

Arakae yave, cristiano tenondegua vae reta oyemboatɨ yave otairari, oyerure Tumpape, omongeta jare oyemboe tembikuatía Tumpa Iñee regua vaere (1 Corintios 14:26). Reyu oreyemboatɨpe yave reechata royapo jae reta oyapo rami.

Royemboe oremborɨta vaere oñenoe Tumpa Iñeegüi vae. Domingo ara ani sábado arape, congregación ñavo oyemboatɨ oendu vaerä ñemoñee Tumpa Iñee regua 30 minutos. Kuae ñemoñee rupi yaecha kërai Tumpa Iñee yandemborɨ yanderekovepe jare yaecha kërai oasa oï añave Tumpa Iñee jei vae. Oñemokɨ̈reɨ opaetepe oeka vaerä Tumpa Iñeepe versículo reta oyemongeta vae. Jaɨkue rupi oyeapo metei hora rupi Yemboe La Atalaya, jókope royemboe kuatiarɨru La Atalaya oyeapo marandu reta jare opaete oipota yave ipuere oyemongeta jesegua. Kuae kuatiarɨru oechauka kërai yandepuere yayapo Tumpa Iñee yemboarakuaa reta jei rami. Opaete 110.000 congregación ñavo ñogüɨnoi vae opaete ɨvɨ rupi, oyemboe kuae kuatiarɨru.

Oremborɨ roikatu roporomboe vaerä. Metei ara semana mbɨte rupi rogüɨnoi yemboatɨ oyemboyao mboapɨpe oyembojee Vida y Ministerio Cristianos, oyeyapo ñeerɨrugüi Guía de actividades para la reunión Vida y Ministerio Cristianos oñemee yasɨ ñavo vae. Tenonde yayemboe vae oyembojee “Tesoros de la Biblia”, ñanemborɨ yaikuaa kavi vaerä Biblia jei vae yamongeta ndei yaja mbove yemboatɨape. Jaɨkue rupi yayemboe “Seamos mejores maestros”, jókope yaechauka kërai yandepuere ñanemiari Biblia regua ïru reta ndive. Javoi oyekuatiagüe kuae escuelape vae reta, oyapo reta jembiapo jare oporomboarakuaa vae jei reta mbae oyapota omongeta kavi jare oikatu oporomboe vaerä (1 Timoteo 4:13). Taɨkuete, “Nuestra vida cristiana”, yandemboe kërai yandepuere yayapo Biblia jei vae. Kuaepe mbarandu reta rupi jare mbaemboyevɨ reta yaikuaa katuta Biblia regua.

Reo oreyemboatɨpe yave, reechata kërai ikavi yae oyeporomboe jókope Tumpa Iñeere (Isaías 54:13).

• ¿Mbaepa reenduta reo testigo de Jehová yemboatɨpe yave?

• ¿Kia nunga yemboatɨpa reipota reo remboɨpɨ vaerä?

¿Reechapa ñemojaanga kuaepe ñogüɨnoi vae retape kërai ore testigo de Jehová roñemonde kavi rojo vaerä oreyemboatɨpe? ¿Maerapa royapo opaete orepuere vae orekɨambae jare roñemonde pöra vaerä?

Romboete Tumpa ramo. Jehováko omae yandepɨare mbaetɨ yanderemimondereño (1 Samuel 16:7). Ërei, rojo oreyemboatɨpe yave, roipota roechauka romboete jae jare ore hermano reta. Echa, yajata mburuvicha guasu oïape yave ñañemonde kavi yamboete ramo. Jökoraivi, roñemonde kavi rojo vaerä oreyemboatɨpe roechauka vaerä romboete Jehová Tumpa, jaeko “tëtaguasu reta Juvicha guasu”, jare romboete oreyemboatɨa renda vi (Jeremías 10:7).

Roechauka vaerä roiko Tumpa Iñee jei rami. YandeRu Iñee jei Cristo jemimboe reta oimetako oñemonde “temimonde ikavi vaepe, ërei agüɨye ïru vae reta oecha vaeräño” (1 Timoteo 2:9, 10). Ñañemonde “temimonde ikavi vaepe” oipota jei mbaetɨko ñañemonde temimonde ichutu, jesäka ani yandeyopɨ vae. Yepetëi mbaetɨ ñañemonde “ïru vae reta oecha vaeräño”, ñañemondetako temimonde ipöra jare ikɨambae vae. Oimeko jeta temimonde ikavi vae yandepuere yaiparavo ñañemonde vaerä. Jökorai yayapo yave yaikuaauka ikavi yae ko Tumpa iporomboe jare yamboetema ñaï (Tito 2:10; 1 Pedro 2:12). Roñemonde kavi rojo oreyemboatɨpe yave opaete orerecha vae imaendúa kavita Jehová jëtare.

Yandekɨambae jare ñañemonde kavi vaerä mbaetɨko oata ñanoi temimonde jepɨ yae vae ani ipöra yae ete vae. Jaeramo, agüɨye remboaya yemboatɨpe temimonde jeko pegua vaere.

• ¿Maerapa ñañemonde kavita yaja yave yamboete vaerä Tumpa?

• ¿Mbae yemboarakuaa Tumpa Iñee regua oremborɨ roikuaa vaerä kërai roñemonde vaerä?

Testigo de Jehová reta ndive reyemboe reï Tumpa Iñeere yave, güɨramoi remongeta kavi kuatiarɨru ndei reyemboe jese mbove. Jökoraivi reyeapo katu yave ndei reo yemboatɨpe mbove, ndemborɨ yaetako reikuaa katu vaerä. Körai reyepokuaa reyapo yave, reyemboe katutako yemboatɨpe.

Eiparavo kërai yave jare kiape reyemboeta. ¿Mbae horapa ikavi ndeve reyemboe vaerä? ¿Jaeramo iköe yave ndeimbove, ani pɨ̈tu yave michia reta opama oke yave? Oime tëi jeta mbaembae renoi reyapo vaerä, ikaviko remboɨke nderembiapo reta reyemboe vaerä jare agüɨye eeya oime oï ndeyopia vae. Eiparavo kïriri ngatuape reyemboe vaerä jare embogüe televisor, radio jare ndecelular. Eyerure Tumpape ndei reyemboe mbove, kuae ndemborɨta agüɨye vaerä reyemoambeko reï jare emae kavi vaerä Tumpa Iñee jei vaere (Filipenses 4:6, 7).

Eikuatía neñeemboyevɨ vaerä. Tenonde, emongeta reyemboeta vaere jësaka kavi vaerä. Emae mbaere imiari reyemboe vae, kërai omoësaka oyekuatía jüupe oï vae reyemboe vaere, emae kavi ñemojaanga retare, jare ndepuere nemaendúa ye reyemboe vae marandu retare. Javoi, emongeta párrafo ñavo jare reeka imarandu ñeemboyevɨ. Eeka Tumpa Iñeepe texto oyekuatiambae vae jare eyepɨamongeta kërai omoësaka reyemboe vaere (Hechos 17:11). Marandu jësakama ndeve yave, emopɨta ani eikuatía nemomaenduata vae. Jökorai, reo yave oreyemboatɨpe ndepuereta remoë reyemboe vaere.

Remongeta kavi yemboe reta oñemoësaka vae semana ñavo oreyemboatɨpe, reikuaata ipɨau vae Tumpa Iñeegüi (Mateo 13:51, 52).

• ¿Këraipa ndepuere reyemboe yemboatɨpe oyemboeta vaere?

• ¿Këraita ndepuere remoë reyemboe vaere yemboatɨpe?

Ɨma güivema Jehová oipota tëtara reta ñavo oyemboatɨ omomɨ̈rata vaerä iporogüɨrovia jare oyoaɨu katu vaerä (Deuteronomio 6:6, 7). Jaeramo, ore testigo de Jehová roiparavo metei ara pɨ̈tu yave semana ñavo romboete vaerä Tumpa orero pegua reta ndive jare royemboe oreiño oremborɨta ipɨ̈rata vaerä oreporogüɨrovia. Jaeño oiko vae ipuere vi oiporu kavi kuae pɨ̈tu oiparavo vae oyemboe vaerä Tumpa Iñeere jae oipota vaere jare oikuaa katu vaerä Tumpare.

Yayemboya katu vaerä Jehováre. “Peyemboya Tumpa re jare jae oyata peré” (Santiago 4:8). Yayemboe Iñeere yave yaikuaa katuta Jehová, echa jókope yaechata këraiko jae jare opaete oyapo vae. Remboɨpɨ vaerä ndeyemboatɨ ndero pegua reta ndive, pepuere pemongeta Tumpa Iñee, peiporu yemboatɨ Vida y Ministerio Cristianos oyemboeta vae. Metei ñavo pepuere pemongeta metei michi; javoi opaete pemiari oyoupe peyemboe vaere.

Yayoaɨu katu vaerä yandero pegua reta ndive. Kuimbae jare jembireko, tu reta jare taɨ reta, oyoaɨu katu oyemboe päve yave Tumpa Iñeere. Kuae yemboatɨ oyeapotako mbɨakatu jare yerovia reve, jökorai yave opaeteko oipotatëitama oyemboatɨ. Güɨramoi tu reta oipotata oyemboe taɨ reta ndive tembikuatía omborɨta oë vae La Atalaya jare ¡Despertad! ani jw.org Internetpe. Pepuere peecha mbae iyavai vae oasa oï yemboerendape jare kërai oñono kavi vaerä. Ani pemaevi televisiónpe JW Broadcasting (tv.jw.org) javoi peyemongeta jesegua. Pepuere vi petairari Jehovápe oreyemboatɨpe oyeapo rami, jare pepuere vi penoi mbae peu vaerä.

Kuae pɨ̈tu yaiparavo vae yamboete päve vaerä Tumpa, omborɨta yandero pegua reta vae omomora vaerä omongeta Tumpa Iñee. Jare Jehová omboekoviata yandeve körai yayapo vaere (Salmo 1:1-3).

• ¿Maerapa yaiparavo metei ara pɨ̈tu yamboete vaerä Tumpa yandero pegua reta ndive?

• ¿Mbaepa oyapota tu reta opaete omomora vaerä kuae yemboatɨ?

¿Reechapa kërai oyerovia oï tëtara reta ñemojaangape? Jae retako oime ñogüɨnoi oreyemboatɨ guasupe. Arakae, Tumpa jembiókuai retape oñemondo oyemboatɨ vaerä mboapɨ ye arasa ñavope, jökorai vi ore royerovia yaeko royemboatɨ yave opaete reve yemboatɨ guasupe (Deuteronomio 16:16). Año ñavo mboapɨ ye royapo yemboatɨ guasu, royapo mokoi ye Yemboatɨ guasu metei ara pegua jare metei ye Yemboatɨ guasu mboapɨ ara pegua. ¿Këraipa oremborɨ yemboatɨ guasu reta?

Royemboya katu vaerä orehermano opaete rupiɨgua reta ndive. Israel pegua reta rami oyerovia yae omboete Jehová “oyemboatɨa pe”, ore royerovia katu royemboatɨ yave romboete vaerä Jehová orehermano reta ndive (Salmo 26:12; 111:1). Kuae yemboatɨ guasu rupi orepuere royea orehermano reta ïru congregación pegua retare jare ïru tëtaguasu peguare. Ara mbɨte rupi opaete rokaru päve yemboatɨape, jökorai ikavi ete roasa orechëi reta ndive romboete reve Jehová (Hechos 2:42). Jókope roecha kërai yaeko mboroaɨu oremborɨ roiko vaerä metei rami hermano reta opaeteɨgua ndive (1 Pedro 2:17).

Oreporogüɨrovia okuakuaa jare oñemomɨ̈rata vaerä. Israel pegua reta omborɨ “oikuaa kavi ñee reta” Tumpa Iñeere oyemboe vae (Nehemías 8:8, 12). Jökoraivi, ikavi yaeko oreve yemboatɨ guasupe oyemboe oreve vae. Yemboatɨ guasu ñavope oñemoësaka metei mbaere oë Tumpa Iñeegüi vae. Ñemoñee reta jare oasa oï vae rami reta rupive oyeechauka oreve kërai royapo Tumpa oipota vae. Oremokɨ̈reɨ vi roendu orehermano jare hermana reta oasagüe vaere, echa jae reta omoamɨri jeta mbaeavai oyeókuai vaerä Jehovápe. Yemboatɨ guasu mboapɨ ara pegua vaepe oyeapo arakae oasa vae rami, jókuaerä oñemonde reta arakae oñemonde rami jare oechauka Tumpa Iñee omombeu oasagüe vae. Kuae rupi oremboe yemboe ikavi vae oremborɨ vae. Jare kuae mboapɨ yemboatɨ guasu oyeapo vae oime oï oyembobautiza vae oechauka vaerä oñemeemako Jehovápe.

• ¿Maerapa oime yerovia yae yemboatɨ guasuape?

• ¿Këraipa ndemborɨta reo yave oreyemboatɨ guasuape?

Ndei omano mbove, Jesús jei: “Kuae ñee ikavi vae Tumpa iporookuaía pegua oñemoërakuata opaete ɨvɨ rupi, opaete ɨvɨ pegua reta oendu vaerä. Jayave outa kañɨtei” (Mateo 24:14). ¿Këraitapa oyeapo kuae ñemoërakua opaete ɨvɨ rupi? Oyeapotako Jesús oyapo rami kuae ɨvɨpe oiko yave (Lucas 8:1).

Ropouko tëtara retape jëtape. Jesús omboe jemimboe reta omoërakua vaerä ñee ikavi vae o reta rupi (Mateo 10:11-13; Hechos 5:42; 20:20). Kuae retape oñemee kiape etei ojo omoërakua vaerä (Mateo 10:5, 6; 2 Corintios 10:13). Jökorai vi, añave congregaciónpe oyeapo katu oï jare oime güɨnoi kiape güive omboɨpɨta omoërakua vaerä jare kiape ipuereta oyapo vae. Körai orepuere royapo Jesús oreókuai rami “romoërakua vaerä ïru vae reta pe” ñee ikavi vaere (Hechos 10:42).

Romoërakua tëtara retape ñogüɨnoia rupi. Körai oyapo Jesús, jae omoërakua kia retape ñogüɨnoia rupi, ɨguasu jembeɨpe rami ani ɨkua iyɨpɨpe (Marcos 4:1; Juan 4:5-15). Oremiari vi Tumpa Iñeere oipotagüe rupi: tape rupi, mbae oñemee rupi, oime kia oïa rupi ani teléfono rupi. Oremiari vi oreporogüɨroviare orerëtaɨpɨ peguape, oreparavɨkɨ ïrupe ani yemboerenda ïrupe jare orerëtara retape oime oipota orerendu yave. Körai royapo yave opaete ɨvɨ rupigua oendu ñee ikavi Tumpa iporogüɨroasayepe regua yanderekove iyapɨmbae vaerä (Salmo 96:2).

Eyepɨayemongeta kia nungape reipota remombeu ñee ikavi vae Tumpa Irreinore jare ipuereta vae oupitɨ kuae rupi. Agüɨye eñovatu ndembaerä kuae ñee ikavi vae reikuaa vae, nemiaritako jese ndepuere yave.

• ¿Mbae “ñee ikavi vae” ñamoërakuata?

• ¿Këraipa testigo de Jehová omomoe Jesús omoërakua yave?

Precursor jaeko kia omboɨpɨ jare oyapo tape ipɨau vae ani ojo ketɨa ipɨau vae yogüeru vae jaɨkue rupi guarä. Jesúsko precursor vae rami, echa oñemondo ɨvɨpe oyeókuai vaerä jare oyapo vaerä tape güɨraja vae tekove opambae vae kotɨ (Mateo 20:28). Añave rupi royapo Jesús oyapo rami jare romborɨ orerapicha reta oiko vaerä Jesús jemimboerä (Mateo 28:19, 20). Jaeramo oime oiparavo vae oyapo vaerä precursor jembiapo.

Precursor jaeko omoërakua vae opa ara rupi. Opaete ore testigo de Jehová romoërakua ñee ikavi vae Tumpa Irreinore. Ërei, oime oï oñono kavi jekove vae ipuere vaerä oyapo precursorado regular jare yasɨ ñavo oupitɨ omoërakua 70 hora. Jaeramo oiparavo ara oparavɨkɨ vaerä. Ïru reta oyeparavoko oyapo vaerä precursorado especial jare oñemondo reta oata oïape omoërakua vaerä; jae reta omoërakua 130 hora ani jeta ye yasɨ ñavo. Precursor reta mbaetɨ ipɨatɨtɨ mbae güɨnoiä vaere jare güɨrovia Jehová omee retata oata chupe vae (Mateo 6:31-33; 1 Timoteo 6:6-8). Ipuereä oyapo vae precursorado regular ani especial vae reta ipuereko oyapo precursorado auxiliar, jare omoërakua 30 ani 50 hora metei yasɨpe.

Mboroaɨu Tumpa jare japichare omokɨ̈reɨ vae precursor. Jesús rami, ore roecha kërai tëtara reta oata oikuaa Tumpare (Marcos 6:34). Jare romombeu yave ikavi yaupitɨta vae, añavema omborɨ reta. Oaɨu ramo japicha reta precursor oiporu jekove omborɨ ïru reta oikuaa vaerä Tumpare (Mateo 22:39; 1 Tesalonicenses 2:8). Kuaeko omborɨ omomɨ̈rata vaerä iporogüɨrovia jare oyemboya katu vaerä Tumpare, jaeramo oyerovia katu reve oiko (Hechos 20:35).

• ¿Mbaepako metei precursor?

• ¿Maerapa oime oï oyapo vae precursorado?

Testigo de Jehová reta oipotatëi opaete oikuaa kavi Tumpa Iñee oporomboe vae. Jaeramo güɨnoi kiape oyemboe katu vaerä precursor reta. Jökorai jae reta ipuere oyapo kavi jembiapo oporomboe yave Tumpa Iñeere (2 Timoteo 4:5).

Escuela del Servicio de Precursor. Kuaeko metei escuela ova ara rupi oyeapo vae precursor regular reta peguarä, jare ipuere oyeapo metei Salón del Reinope. Ipuere vaerä metei precursor ojo kuae escuelape, tenonde oyapota iprecursorado metei arasa ramboeve. Kuae escuela oipota precursor reta oyemboya Jehováre, omborɨ oyapo kavi vaerä jembiapo omboe yave Tumpa Iñeere jare omokɨ̈reɨ reta jekuaeño omoërakua vaerä.

Escuela Evangelizadores del Reino peguarä. Kuae escuela oyeapo mokoi yasɨ ramboeve, ndei omenda vae reta jare omenda vae reta peguarä. Ipuereta ojo güɨnoi vae 23 año güive 65 añope, oikatu oyapo precursor jembiapo vae jare oipota ojo omoërakua ïru tëta retape. Ombojaanga vaerä Jesucristo, precursor ikavi yae vaepe, jei reta: ¡Ko aï che, chemondo! (Isaías 6:8; Juan 7:29). Ojo yave oiko ïru tëtape, jae reta ipuere oyepokuaa pɨau ye jeta mbaere, ara pochɨ jare tembíu retare. Oime vi oyemboe vae ïru ñeere. Kuae escuelape oyeporomboe jeta mbae ikavi vae Tumpa Iñee regua omborɨta reta vae oñemondoape. Jare oyemboe kavita kërai ipuere omborɨ katu Jehová jare iorganización.

Escuela Bíblica de Galaad de la Watchtower. Hebreo ñeepe Galaad oipota jei “ita yemboatɨ omoërakua vae”. Kuae escuela iyɨpɨko 1943pe. Kuae cursope oimema oasa 8.000 oë vae, oñemondo misionero rami jare ikaviko jembiapo, omoërakua reta opaete ɨvɨ rupi (Hechos 13:47). Misionero reta oväe iyɨpɨ Perúpe yave mbaetɨko oime congregación, añave oasama 1.000. Japónpe ou oväe yave, mbaetɨ oime oupitɨ 10 Testigo, añave oasa 200.000. Pandepo yasɨ ramboeve, kuae escuelape oyeyemboe Tumpa Iñeere jësaka kavi vaerä jare oyemboe katu kërai jae reta ipuere oyapo kavi jembiapo ñemoërakua ñee kavi regua. Kuae escuelape ipuere ojo precursor especial, misionero omoërakua oï vae, superintendente de circuito ani oparavɨkɨ Betelpe vae reta.

• ¿Maerako oyeapo Escuela del Servicio de Precursor?

• ¿Kiara oyepuere oñemondo Escuela Evangelizadores del Reino  pe?