Ikavi ko ñañemomɨ̈rata yayembobautisa vaerä

Jesús omboe yaiko vaerä cristiano, yayembobautisata ko (emongeta Mateo 28:19, 20). ¿Kërai pa yayembobautisa? ¿Mbae pa yayapota yayembobautisa vaerä?

1. ¿Kërai pa yayembobautisa?

Kuae ñee bautizar ou ñee griego güi jare oipota jei, “ombosäkambɨ” ɨ pe. Juan ombobautisa ma yave Jesús, ombosäkambɨ ɨ̈aka Jordán pe, javoi Jesús “oë ɨ güi” (Mateo 3:13, 16). Cristiano añetete vae reta oyembobautisa yave, ombosäkambɨ vi ɨ pe.

2. ¿Mbae pa oechauka kia oyembobautisa yave?

Kia oyembobautisa yave, oechauka omee jekove Jehová pe oyeokuai vaerä chupe. ¿Kërai pa yayapo jókuae? Yayapota metei yerure ñamopromete vaerä jaeño Jehová yamboeteta jare yayapo aveita jae oipota vae. Kuae yayapo ndei yayembobautisa mbove. Jare, yayapo Jesús yandemboe rami, jei yave: “Kia nunga vae ikɨ̈reɨ ojo cherupíe vae, tiñakañɨ iyeugüi [...] jare tou cherupíe” (Mateo 16:24). Ñamee yanderekove Jehová pe jare yayembobautisa ma yave, yandepuere yaiko Jehová iamigorä jare ñañemoïru oyeokuai Tumpa pe vae reta ndive.

3. ¿Mbae pa yayapota yayembobautisa vaerä?

Reipota reyembobautisa yave, tenonde reyemboeta Jehová re jare reroviata jese (emongeta Hebreos 11:6). Má reikuaa ramboeve Jehová re, ndeporogüɨrovia okuakuaata jare reaɨu yaeta Jehová. Jókuae nemokɨ̈reɨta remoërakua vaerä jare reiko Tumpa oipota rami (2 Timoteo 4:2; 1 Juan 5:3). Kia oyapo “avei opaete mbaembae ikavi vae” Tumpa oipota rami, ipuere omee jekove Jehová pe jare oyembobautisa (Colosenses 1:9, 10).a

YAIKUAA KATU VAERÄ

4. Jesús ibautismo yandemboe vae

Peikuaa kavi vaerä Jesús ibautismo re, pemongeta Mateo 3:13-17. Javoi peyemongeta jese:

• Jesús oyembobautisa yave, ¿michia raɨ pa?

• ¿Jaeño pa opɨyere michi mi ɨ iñäka re? Jayave, ¿kërai pa oyembobautisa?

Jesús oyembobautisa yave, omboɨpɨ iparavɨkɨ ikavi ete Tumpa oyókuai vae. Pemongeta Lucas 3:21-23 jare Juan 6:38, jare peyemongeta jese:

• Oyembobautisa güire, ¿mbae mbaravɨkɨ pa ombotenonde Jesús?

5. Yandepuere ko yayembobautisa

Güɨramoi rekɨɨye reipota yave remee nderekove Jehová pe jare reyembobautisa. Ërei, jekuaeño reyemboe yave Jehová re jare reikuaa kavi jese, jókuae nemokɨ̈reɨta reyembobautisa vaerä. Yaecha mbae pa oyapo amogüe kia reta oyembobautisa vaerä, pemae VIDEO re.

VIDEO: Fortalece tu amistad con Jehová (1:11)

Pemongeta Juan 17:3 jare Santiago 1:5, jare peyemongeta jese:

• ¿Mbae pa omborɨ metei kia ipuere vaerä oyembobautisa?

1. Ñamee yanderekove Jehová pe ñamopromete yave yayeokuai aveita.

2. Yayembobautisa yave, yaechauka ïru reta pe ñamopromete ma Jehová pe yayeokuai aveita chupe vae.

6. Yayembobautisa yave yaiko ma Jehová jëtara

Yayembobautisa yave, yaiko metei tëtara espiritual pe metei ramiño opaete ɨvɨ rupi. Yepe tëi ketɨ ketɨ yaiko ani yayapose vae, opaete vae yarovia jare yaiko Biblia omboe rami. Pemongeta Salmo 25:14 jare 1 Pedro 2:17, jare peyemongeta jese:

• Jei rami kuae versículo reta, ¿kërai pa yandemborɨ yayembobautisa yave?

YAYEMBOE MA VAE

Jesús jei yaiko vaerä cristiano, yayembobautisata ko. Yayembobautisa vaerä, yarovia katu Jehová re, yaiko jae oipota rami jare ñameeta chupe yanderekove.

Emoësaka

• ¿Kërai pa yayembobautisa jare maera pa ikavi ete?

• Yayembobautisa ma yave, ¿mbae pa yaechauka?

• ¿Mbae pa yayapota ndei ñamee yanderekove Jehová pe jare yayembobautisa?

EEKA KUAE

Conozca algunos conceptos erróneos sobre el bautismo y lo que realmente significa.

“¿Qué es el bautismo?” (Artículo de jw.org)

Repase algunas sugerencias que le ayudarán a llegar al bautismo.

“El amor y la gratitud a Jehová conducen al bautismo” (La Atalaya, marzo de 2020)

Lea sobre un hombre que tomó la decisión de bautizarse sin dejarse llevar por la emoción.

“Querían que descubriera la verdad por mí mismo” (La Atalaya, 1 de febrero de 2013)

Vea por qué el bautismo es una meta que vale la pena alcanzar y cómo puede prepararse usted.

“¿Debería bautizarme ya?” (Lo que los jóvenes preguntan. Respuestas prácticas [volumen 2], capítulo 37)