5 Ampukutri ikkutri tsøntatø tap mørøp wamintikpe

¿CHI KERA?

Ampukutri ikkutri tsøntatø tap mørøp nøm waminchen møskaløpe urekwan nøm chi isuilan, mantrø umpu chi tøkakuilan møra purukup.

¿CHICHAKUTRI NUIK KØ?

Nurap yainkuintø unø matsinøpa wamintamikpe murik køpik køn. Ik asin kilka Tú no me escuchas, yo no te entiendo møskai maik isui waikwan tørtø kenamarøpik køn, marikwansrømpe “namui urekpa trak kementa nøm chi marøp pøntrailan isuilan tsørømø waminchipelø kuik køn, møyasrømpe purø murik køn namui urekpa trak kementa pøntramik nøm øsik amønainuk chi marøp amønailan isuilan nampe kuentakenkar pøntrainapik køn”. Inchippape nam asiløpe cierton kømøn: Treeløyu pasrøpen ñui nusrkai ñipa wamintamik mas palapik køn.

¿CHI MARØPSRUKU?

Ñui nusrkai chu uras utøtøka wapen truyu pasrau. Kanmaywane ñui nusrkainpa yem tøpøtaksrønkatik waminchip wamik nepupene treekwan mar.

“‘¡Mawa ørøpa pailø lincha amønaik køn, wamintik kui inchene kanmaywane ka tamtik køpik køn ¿møimpe waminchip kuita?!’. Pero ¿chincha nørø martrap ñui nusrkai mantrøwan kura waminchai inchen? ¿Møskaløpe øyeek martraiwai isupelø kømuitatru?” (Lisa).

“Nane tørpatø kintrap yamik chull køpik køn, pero kanmaywane nai urektø matsøreløpa mas tap wammera latrøpitchip wamintikpe yem tøpøtakkutrin køn” (Herbert).

BIBLIA CHI TAIKWAN: “Mutøgucha ñuimburabigwandø tab kønrrai lamøtø, katøganelaimburab tab kønrrai lamig køn” (1 Corintios 10:24).

Ashiptø kuy. Kan møskai nepua asha trentan: “Kanmaywane nai nusrkalø waminchip putrøpen peksrøntø isup wainapik køn, inchen nømkucha ikwan nepua asan”.

Ñunkucha trektøwai purep pasrøpene, televisiónwan kuetcha, celularwan nørø mara tarømara trash. Ñui nusrkai waminchip wapen kalu pepa mør, treek marape ñui urekwan isuintelø putrøpen lamøtelø kuintøkucha, ñuimpurapkucha nøtrelø kui kenamartrun.

“Namui urekwan kenamaramik køn nøm chi isuiløpe namunkucha nøtrelø kui. Treek marmuinkatikpe nømtø esekawa chikøpentø isuilan peksrø purukuntrai lantrun” (Maranda).

“Ñui nusrkai trømpøik marar cha waminchene chikøpentø purø trømpøik isup namømøta” (Anthony).

BIBLIA CHI TAIKWAN: “Ñim mørigwane tab isua asha kuy” (Lucas 8:18).

Chu urastøkucha utøchelan tap martrap intay. Kanmaywane ya umpu tap putrøpen urekmerape nøm chi isuilan møskaløpa waminchip kui inchipelø køn.

“Nampe chumay køpen viaje ampinuk utø wesrua waminchipelø ker. Pintrø ketø putramisra wamintikpe mas tap latrøpitcha wamintamtik køpik køn, kan malauke wamintamikpe mur køpik køn” (Nicole).

Mamik map putrainukkucha tap utømera køn nusrkaløpa wamintamik.

“Maapen map putrainuk søteløpa waminchipelø ker chi tapik kømui trektøwai mawa ørøpa chi tapik purayailan. Øyamay marikpe kanpalatø putramik purukupik køn, incha isunkarupik køn chikøpentø tap kømelø pupen namtø pøntrømuik” (Robin).

BIBLIA CHI TAIKWAN: “Ñim mayeeløba møramigwane muniitø purramig køn. Inchen wamindamigwanba, […] tsøndatø isuptø maramig køn” (Santiago 1:19).