7 Sølkantø amtrai tap wammera kusrenanøp

¿CHI KERA?

Tap wammera kusrenanilø øsik amønainuk tap amøñintrai purukupik wamintilan møra marøp pøntramik. ¿Tapelan marik køtrømistraimpe mur trantrapik køtitru? Marøpik kuape, ñui urekwan trektøwai tapelø martrain kusrenantrun.

Kan misak tap wammera ketilan mantrau tøkaikkucha kuallip misak køn kanelantø tap inchimøta mayelampa lata tap ashipik, chiyukøpentø martrap kaima wapene purukupik chikutrimpunø nepua asilan tøkakømikpe murik kømøn srusr urekkutri ikwan tøkakømik køn.

BIBLIA CHI TAIKWAN: “Unan kusrennan mu maywan ik pasramikwan kusrennan køllik misakkucha lelachimøntrun” (Proverbios 22:6).

¿CHINCHATRE NUIK KØ?

Møya tecnologías pasrøpen tap wammera kusrenaniløpe nøtrelø køn. “Namui urekmera celularesmerayu computadoresmerayu tøkakuinuk inchippape tap kømelø martrap isuntrun –kan usri Karyn munchi taik trentan–. Namuin pulu putrøpentø inchippape celularesyu trømpøtelø aship putrapkun”.

BIBLIA CHI TAIKWAN: “Ñimui urekwan tap amtrai tapelø mara kenamartrai ikwan tøkakøntrai kenamaramik køn, chi kalø kui chi tapik kui” (Hebreos 5:14 TNM).

Tapelø martrai kusrenanikpe nuik køn. Churastøkucha “tiusmanta” tamik “unkua” tamik latrø tapik køn, treektøwai katøkanelankucha chi palai pøntrøpen purukup. Ilø møik kualømmerawan trupilø køn misakmerape celularmeran mas ke pasran misakmeranken kømø.

BIBLIA CHI TAIKWAN: “Ñimgurrima katøganelø ñimuyasig tabig maramig palai inchibeløbe, ñimgucha katøganelan treetøwei tab inday chibig køn” (Lucas 6:31).

¿CHI MARØPSRUKU?

Tap wammera mailø kui tørtø eshkau. Møilø nøtrø kusrepelø trenchipelø køn møskalø relaciones sexualeswaimpurap urektøkutri wamintikpe tapik køn, kalø maywan ammøntrai.

IKWAN MARTRAP ISU: Ñim warai utu trømpøik purayaikwan waminchi, treeløtøwai marmøntrai. Por ejemplo, kan misak tsalø asha trømpøik maren, nui unan paya mør “¿chinchatre misakmerape øyeelø marøpelø kera?”.

“Urekmera tap maywan kemøra amtraimpe nømtøwai nepua asamik køn chi kalø kui chi tapik kui” (Brandon).

Kusrenanay tapelø martrai. Srusr urekcheløken isum kusrentrapelø køn misakmeran trentan: “tiusmanta” tan, “unkua” tan. Asin kilka Parenting Without Borders trenchipik køn: Urekmera mas cuenta køtrintø tapik køntrapik køn, nømuntø mas kepasrtrain kømø isumik køn, treek kømøtø nømtø yawelø tøkar køn, kusrenanik ya tøkar køn pøtøkatan misakmera kucha køn. Ikwan tap nepua asinkatikpe katøkanalaimpurap tapelø martrap pøntrentrun.

IKWAN MARTRAP ISU: Chikøpentø martrai karuik urekwan katøkanelan purukumikpe tapik kui nepua ashchai.

“Ñimui urekmera yau chikøpentø maran purukupeløpe chukøpentø nømtø ampa warainuk peshekui murik kui mørmøntrun. Katøkanelan martrain kømø nøm aship marøp pøntrøntrun, chikucha pøik inchimø” (Tara).